ខេត្តបាត់ដំបង ៖ គិតត្រឹមថ្ងៃទី១៧ វិច្ឆិកា នេះ ផែនការបង្ក្រាបទីតាំងល្បែងតាម «អនឡាញ» របស់លោកស្នងការខេត្ត ដែលបានបញ្ជាឲ្យលោកស្នងការរងមួយរូបសហការជាមួយលោកអធិការក្រុង ចាត់វិធានការបង្ក្រាប…
ខេត្តបាត់ដំបង ៖ គិតត្រឹមថ្ងៃទី១៧ វិច្ឆិកា នេះ ផែនការបង្ក្រាបទីតាំងល្បែងតាម «អនឡាញ» របស់លោកស្នងការខេត្ត ដែលបានបញ្ជាឲ្យលោកស្នងការរងមួយរូបសហការជាមួយលោកអធិការក្រុង ចាត់វិធានការបង្ក្រាប គឺមានរយៈពេលជាង១ខែហើយ ។ បទបញ្ជានេះត្រូវបានផ្សព្វផ្សាយយ៉ាងទូលំទូលាយតាមរយៈ«ផេក»របស់ស្នងការខេត្តឲ្យមហាជនបានជ្រាប ។ ប៉ុន្តែផែនការនេះហាក់ងាប់ស្ដូកគ្មានកម្រើកឡើយ ខណៈទីតាំងល្បែងនេះជាង២០កន្លែងកំពុងដំណើរការយ៉ាងរលូន ក្រោមក្រសែភ្នែកមន្ត្រីជំនាញ និងលោកស្នងការខេត្ត ដែលធ្វើឲ្យមហាជនដាក់ការសង្ស័យថា ផែនការនេះទំនងបានក្លាយជាផែនស្ករយ៉ាងផ្អែមជាប់មាត់បាត់ទៅហើយ ឬក្លាយជាក្រដាសអនាម័យ ឬក្លាយជាក្រដាស់ខ្ចប់មាសប្រាក់ទេដឹង?
លោកឧត្តមសេនីយ៍ត្រី សាត គឹមសាន ស្នងការខេត្តបានដាក់ចេញនូវបទបញ្ជាដែលមើលទៅហាក់ម៉ឺងម៉ាត់បំផុតឲ្យមន្ត្រីជំនាញក្រោមឪវ៉ាទ ចុះបង្ក្រាបទីតាំងភ្នាល់ល្បែងតាម«អនឡាញ» ខុសច្បាប់នានា ដែលកំពុងប្រព្រឹត្តទៅយ៉ាងអនាធិបតេយ្យ ស្ទើរពាសពេញក្នុងក្រុងបាត់ដំបង ។ ផែនការដ៏ក្ដៅគគុករបស់លោកស្នងការខេត្តនេះ ត្រូវបានផ្សព្វផ្សាយជាសាធារណៈតាមរយៈផេក «ស្នងការដ្ឋាននគរបាលខេត្តបាត់ដំបង» តាំងពីថ្ងៃទី១៣ តុលា កន្លងទៅនេះ ដើម្បីជាការជួនដំណឹងដល់អ្នកសារព័ត៌មាន និងប្រជាពលរដ្ឋបានជ្រាប ក្រោយពីមានការរិះគន់ខ្លាំងពីមហាជន ។
យោងលើខ្លឹមសារនៃបទបញ្ជាដែលបានផ្សព្វផ្សាយនៅលើ «ផេក» របស់ស្នងការខេត្ត ដែលគ្រប់គ្រងដោយក្រុមការងារប្រតិកម្មរហ័សរបស់ស្នងការដ្ឋាន លោកឧត្តមសេនីយ៍ត្រី សាត គឹមសាន បានចាត់តាំងលោក លឹម ពុទ្ធីឡា ស្នងការរងទទួលផែនព្រហ្មទណ្ឌ និងលោក ឆាង វណ្ណឆៃ អធិការក្រុងបាត់ដំបង ត្រូវទទួលភារកិច្ចនេះ ចុះបង្ក្រាបបនល្បែងតាមអនឡាញខុសច្បាប់ទាំងនោះ ។
ប៉ុន្តែរហូតមកដល់ត្រឹមថ្ងៃទី១៧ វិច្ឆិកា នេះ មានរយៈពេលជាង១ខែហើយ បញ្ជានេះហាក់កំពុងងាប់ស្ដូកគ្មានកម្រើកអ្វីបន្តិចឡើយ ខណៈទីតាំងល្បែងអនឡាញគ្មានច្បាប់ដែលប៉ាន់ប្រមាណថា មានជាង២០កន្លែង កំពុងបើកដំណើរការយ៉ាងគគ្លើន ។ រីឯលោកស្នងការ និងលោកស្នងការរងទទូលបន្ទុក បានត្រឹមតែផ្ដល់ចម្លើយតបវិញ ក្នុងន័យឲ្យរួចផុតពីមាត់ថា «យើងកំពុងធ្វើការស្រាវជ្រាវ និងត្រៀមបង្ក្រាប» តែប៉ុណ្ណោះ ។
លោក លឹម ពុទ្ធីឡា ស្នងការរងដែលទទួលបទបញ្ជាពីលោកស្នងការខេត្ត ចុះបង្ក្រាបទីតាំងល្បែងអនឡាញ ហាក់មិននិយាយអំពីចំណាត់ការច្បាស់លាស់នៅឡើយ នៅពេលសាកសួរអំពីផែនការបង្ក្រាបល្បែងអនឡាញនេះ ។ លោកស្នងការរងរូបនេះ បានបំភ្លឺប្រាប់កោះសន្តិភាព កាលពីថ្ងៃទី១៦ វិច្ឆិកា តាមទូរស័ព្ទជុំវិញផែនការបង្ក្រាបទីតាំងល្បែងអនឡាញនេះយ៉ាងដូច្នេះថា «ពេលនេះមន្ត្រីជំនាញកំពុងធ្វើការស្រាវជ្រាវ ហើយកំពុងសុំគោលការលោកស្នងការ តែមិនទាន់មានបទបញ្ជា» ។ នៅពេលសួរថា បទបញ្ជារបស់លោកស្នងការខេត្ត បានផ្សព្វផ្សាយតាមរយៈផេកស្នងការខេត្ត តាំងពីថ្ងៃទី១៣ តុលា ហើយតើ ហេតុអ្វីថាមិនទាន់មាន ? លោក លឹម ពុទ្ធីឡា បានផ្ដល់ចម្លើយត្រឡប់ក្រោយវិញដដែលថា «យើងបានស្រាវជ្រាវហើយ តែកំពុងសុំគោលការបង្ក្រាប»។
ប្រហាក់ប្រហែលនឹងការពន្យល់របស់លោក លឹម ពុទ្ធីឡា ស្នងការរងខាងលើនេះដែរ ដែលលោកសាត គឹមសាន ស្នងការខេត្ត បានបភ្លឺប្រាប់កោះសន្តិភាព នៅពេលសាកសួរអំពីផែនការបង្ក្រាបល្បែងអនឡាញខុសច្បាប់នេះ ដែលលោកបានចេញបទបញ្ជារួចហើយ តែបែរជាគ្មានកម្រើកអ្វីបន្តិចសោះ ជាង១ខែកន្លងទៅនេះ ។ លោកសាត គឹមសាន បានថ្លែងប្រាប់ដូច្នេះដែរថា «ឥឡូវខ្ញុំកំពុងឲ្យខាងការិយាល័យជំនាញ ចុះស្រាវជ្រាវធ្វើការបង្ក្រាបហើយ ។ ដោយសារប៉ុន្មានថ្ងៃកន្លងទៅនេះ ខ្ញុំជាប់រវល់.. តែយ៉ាងណាយើងនឹងចាត់វិធានការហើយ ។ ហើយធ្វើបានកម្រិតណា.. ខ្ញុំនឹងពិនិត្យទៀត.. តែអត់អីទេ ខ្ញុំនឹងឲ្យកម្លាំងបង្ក្រាបហើយ» ។
ពាក់ព័ន្ធនឹងបនល្បែង «អ៊ីនធើណិត ឬអនឡាញ» ដែលកំពុងបើកដំណើរការយ៉ាងអនាធិបតេយ្យអង្រូនពេញក្រុងបាត់ដំបងនេះ បើតាមប្រភពនានា ដែលកោះសន្តិភាពទទូលបាន និងអាចចាត់ទុកជារបាយការណ៍បឋមបានប៉ាន់ប្រមាណថា ល្បែងនេះមានយ៉ាងតិចជាង២០ទីតាំង ដែលកំពុងបើកដំណើរការយ៉ាងរលូន ។ ទីតាំងល្បែងដ៏លីលានេះភាគច្រើន ត្រូវគេកត់សម្គាល់ថា សុទ្ធតែមានសមត្ថកិច្ច ឬមន្ត្រីមានអំណាចចាំកាងការពារដ៏រឹងមាំនៅពីក្រោយខ្នងទៀតផង ។
នេះបើតាមការអះអាងពីប្រភពព័ត៌មាន ។ ចំពោះអ្នកគ្មានខ្សែ គ្មានខ្នងជាមន្ត្រីរាជការ ឬសមត្ថកិច្ចមិនអាចបើកល្បែងនេះបានទេ ។មិនត្រឹមតែប្រព្រឹត្តល្បែងភ្នាល់គ្រប់ប្រភេទនៅតាមអនឡាញប៉ុណ្ណោះទេ ។ បើតាមអ្នកដឹងរឿងនេះបាននិយាយថា ទីតាំងល្បែងនេះមួយចំនួន កំពុងប្រែក្លាយជាជម្រកនៃការជួញដូរ និងប្រើប្រាសគ្រឿងញៀនយ៉ាងវក់វីដល់ក្រុមអ្នកញៀននឹងល្បែងនេះ ។ មិនតែប៉ុណ្ណោះ ក្រោយពីប្រព្រឹត្តលេងល្បែងស៊ីសង និងសេពថ្នាំញៀន ពួកគេអាចឈានដល់ការចេញប្រព្រឹត្តអំពើចោរកម្មនានា នៅតាមមូលដ្ឋានថែមទៀត ។ ម្លឹងៗបានជាខេត្តបាត់ដំបងកើតមានចោរហារយស្ទើរចូលភ្នែកចូលច្រមុះ ។
ជារឿយៗ គេដឹងថា ក្រុមគណៈបញ្ជាការកងឯកភាពខេត្ត ដែលមានសមាជិកមកពីគ្រប់ស្ថាប័នរដ្ឋនៅក្នុងខេត្ត តែងបើកការប្រជុំដើម្បីពិភាក្សារកដំណោះស្រាយរាល់បញ្ហា ឬភាពអសកម្មនានា ដែលបានកើតឡើងនៅក្នុងខេត្ត ទាំងភាពវិជ្ជមាន និងអវិជ្ជមាន ក្នុងនោះក៏បាននិយាយពីរឿងល្បែងស៊ីសងគ្មានច្បាប់គ្រប់ប្រភេទផងដែរ ។ ប៉ុន្តែរាល់ពេលក្រោយបញ្ចប់នៃកិច្ចប្រជុំម្ដងៗ គេមិនដែលឃើញមានការចុះដោះស្រាយនូវបញ្ហានានា ដែលបានវែកញែករកឃើញនៅក្នុងអង្គប្រជុំនោះទេ ។
ផ្ទុយទៅវិញអ្វីៗ ដែលជាបញ្ហា នៅតែមានបញ្ហាដដែលជាដដែល ។ ជាក់ស្ដែងដូចជារឿងល្បែងស៊ីសងនេះ គឺជាផ្នែកដ៏សំខាន់មួយដែលមាននៅក្នុងគោលនយោបាយ«ភូមិ-ឃុំមានសុវត្ថិភាព» ដែលមន្ត្រីខ្លះ បានលើកយកមកជជែកឡើងបែកពពុះមាត់នៅក្នុងអង្គប្រជុំ តែចុងក្រោយសាបដូចទឹកទន្លេ គ្មានបានការឡើយ ។
សូម្បីតែលោកស្នងការបានដាក់ផែនការរួចហើយ រហូតផ្សព្វផ្សាយតាមផេកស្នងការដ្ឋានខេត្ត ឲ្យមហាជនរង់ចាំទស្សនាអំពីស្នាដៃបង្ក្រាបនេះយ៉ាងណាក្ដី ។ ប៉ុន្តែរហូតមកដល់ពេលនេះជាង១ខែទៅហើយ ផែនការរបស់លោកស្នងការ ដែលទើបចូលកាន់ដំណែងថ្មីនេះ ហាក់ងាប់ស្ដូកស្ដឹងមិនកម្រើកឡើយ ។ សង្ស័យក្លាយជាក្រដាស់ខ្ចប់មាសខ្ចប់ប្រាក់ទេដឹង? ឬក្រដាស់អនាម័យ ?
យ៉ាងណាក៏ដោយពេលនេះ ទាំងលោកស្នងការខេត្ត ទាំងលោកស្នងការរងផែនព្រហ្មទណ្ឌ សុទ្ធតែបានប្ដេជ្ញាចិត្តជាថ្មីថា «ពេលនេះកំពុងត្រៀមកម្លាំងបង្ក្រាបគ្មានសំចៃដៃឡើយ នូវទីតាំងល្បែងអនឡាញខុសច្បាប់ ដែលគេប៉ាន់ស្មានថា អាចមានជាង២០កន្លែង ដែលកំពុងបើកទ្វារនៅចំកណ្ដាលបេះដូងក្រុងបាត់ដំបង» ។ ប៉ុន្តែសង្ស័យបង្ក្រាបខ្យល់ទៀតផង កុំឱ្យថៅកែខាតបង់ច្រើនពេកពេលបង្ក្រាប… ហេ ! ហេ !
ចែករំលែកព័តមាននេះ