ខេត្តបាត់ដំបង ៖ គិតត្រឹមថ្ងៃទី១៧ វិច្ឆិកា នេះ ផែនការបង្ក្រាបទីតាំងល្បែងតាម «អនឡាញ» របស់លោកស្នងការខេត្ត ដែលបានបទបញ្ជាឲ្យលោកស្នងការរងមួយរូបសហការជាមួយលោកអធិការក្រុងចាត់វិធានការបង្ក្រាប គឺមានរយៈពេលជាង១ខែហើយ។…
ខេត្តបាត់ដំបង ៖ គិតត្រឹមថ្ងៃទី១៧ វិច្ឆិកា នេះ ផែនការបង្ក្រាបទីតាំងល្បែងតាម «អនឡាញ» របស់លោកស្នងការខេត្ត ដែលបានបទបញ្ជាឲ្យលោកស្នងការរងមួយរូបសហការជាមួយលោកអធិការក្រុងចាត់វិធានការបង្ក្រាប គឺមានរយៈពេលជាង១ខែហើយ។ បទបញ្ជានេះ ត្រូវបានផ្សព្វផ្សាយយ៉ាងទូលំទូលាយតាមរយៈ «ផេក» របស់ស្នងការខេត្តឲ្យមហាជនបានជ្រាប។ ប៉ុន្តែផែនការនេះ ហាក់ងាប់ស្ដូកគ្មានកំរើកឡើយ ខណៈទីតាំងល្បែងនេះជាង២០កន្លែង កំពុងដំណើរការយ៉ាងរលូន ក្រោមក្រសែភ្នែកមន្ត្រីជំនាញ និងលោកស្នងការខេត្ត ដែលធ្វើឲ្យមហាជនដាក់ការសង្ស័យថា ផែនការនេះ ទំនងបានក្លាយជាផែនស្ករយ៉ាងផ្អែមជាប់មាត់បាត់ទៅហើយ ឬសង្ស័យក្លាយជាក្រដាសអនាម័យទេដឹង ?
លោកឧត្តមសេនីយ៍ត្រី សាត គឹមសាន ស្នងការខេត្ត បានដាក់ចេញនូវបទបញ្ជាដែលមើលទៅហាក់ម៉ឺងម៉ាត់បំផុត ឲ្យមន្ត្រីជំនាញក្រោមឱវាទ ចុះបង្ក្រាបទីតាំងភ្នាល់ល្បែងតាម «អនឡាញ» ខុសច្បាប់នានា ដែលកំពុងប្រព្រឹត្តទៅយ៉ាងអនាធិបតេយ្យ ស្ទើរពាសពេញក្នុងក្រុងបាត់ដំបង ។ ផែនការដ៏ក្ដៅគគុករបស់លោកស្នងការខេត្តនេះ ត្រូវបានផ្សព្វផ្សាយជាសាធារណៈតាមរយៈផេក «ស្នងការដ្ឋាននគរបាលខេត្តបាត់ដំបង» តាំងពីថ្ងៃទី១៣ តុលា កន្លងទៅនេះ ដើម្បីជាការជួនដំណឹងដល់អ្នកសារព័ត៌មាន និងប្រជាពលរដ្ឋបានជ្រាប ក្រោយពីមានការរិះគន់ខ្លាំងពីមហាជន។
យោងលើខ្លឹមសារ នៃបទបញ្ជាដែលបានផ្សព្វផ្សាយនៅលើ «ផេក» របស់ស្នងការខេត្ត ដែលគ្រប់គ្រងដោយក្រុមការងារប្រតិកម្មរហ័សរបស់ស្នងការ លោកឧ្តមសេនីយ៏ត្រី សាត គឹមសាន បានចាត់តាំង លោក លឹម ពុទ្ធីឡា ស្នងការរងទទូលផែនព្រហ្មទណ្ឌ និង លោក ឆាង វណ្ណឆៃ អធិការក្រុងបាត់ដំបង ត្រូវទទូលភារកិច្ចនេះ ចុះបង្ក្រាបបនល្បែងតាមអនឡាញខុសច្បាប់ទាំងនោះ។
ប៉ុន្តែរហូតមកដល់ត្រិមថ្ងៃទី១៧ វិច្ឆកា នេះមានរយៈពេលជាង១ខែហើយ បញ្ជានេះហាក់កំពុងងាប់ស្ដូកគ្មានកំរើកអ្វីបន្តិចឡើយ ខណៈទីតាំងល្បែងអនឡាញគ្មានច្បាប់ដែលប៉ាន់ប្រមាណថា មានជាង២០កន្លែងកំពុងបើកដំណើរការយ៉ាងគគ្លើន។ រីឯលោកស្នងការ និង លោកស្នងការរងទទូលបន្ទុក បានត្រិមតែផ្ដល់ចម្លើយតបវិញ ក្នុងន័យឲ្យរួចផុតពីមាត់ថា «យើងកំពុងធ្វើការស្រាវជ្រាវ និង ត្រៀមបង្ក្រាប» តែប៉ុណ្ណោះ។
ព័ត៌មានបន្ថែមមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ