ខេត្តបាត់ដំបង ៖ បុរសម្នាក់ត្រូវបានឃាត់ខ្លួន កាលពីវេលាម៉ោង០៣និង៣០នាទីទៀបភ្លឺ ថ្ងៃទី១៧ វិច្ឆិកា នៅលើដងផ្លូវមួយកន្លែង ត្រង់ចំណុចបាញ់ក្របី ស្ថិតក្នុងភូមិគួយជីកដី ឃុំរបស់មង្គល ស្រុកមោងប្ញស្សី ជាមួយនឹងម៉ូតូ១គ្រឿង ដែលពាក់ព័ន្ធនឹងំពើចោរកម្ម។
ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា ជនសង្ស័យរូបនេះ ឈ្មោះ សុខ សាត ហៅម៉ាប់ អាយុ៤១ឆ្នាំ រស់នៅភូមិរ៉ា ឃុំមោង ស្រុកមោងឬស្សី។ ជននេះ ត្រូវកម្លាំងនគរបាលស្រុកមោងប្ញស្សី ឃាត់ខ្លួននៅតាមដងផ្លូវ ពេលកំពុងចេញល្បាត ដែលសង្ស័យថា ជននេះបានលួចយកម៉ូតូគេមួយគ្រឿង រួចជិះគេចខ្លួន តែត្រូវក្របួចជាប់នៅចំណុចខាងលើ។
បើតាមរបាយការណ៍អធិការស្រុកមោងប្ញស្សី បានឲ្យដឹងថា ជនសង្ស័យនេះ បានធ្វើសកម្មភាពលួចយកម៉ូតូមួយគ្រឿងម៉ាកវ៉េវ អាល់ហ្វា ពណ៌ខ្មៅ ស៊េរីឆ្នាំ២០១២ ពាក់ស្លាកលេខពោធិ៍សាត់ 1D-3038 នៅវេលាម៉ោង ៩និង៣០នាទីយប់ថ្ងៃទី១៦ វិច្ឆកា នៅភូមិអន្លង់ត្រាច ឃុំរបស់មង្គល ស្រុកមោងប្ញស្សី របស់ជនរងគ្រោះឈ្មោះ ញេន រ៉ឹម ស្រីអាយុ២៧ឆ្នាំ។
ប៉ុន្តែក្រោយពីលួចបាន ជននេះបានជិះគេចខ្លួនមកផ្ទះ ស្ថិតនៅភូមិ ឃុំខាងលើ ក៏ប្រទះនឹងកម្លាំងសមត្ថកិច្ចដែលកំពុងជិះល្បាត ហើយកាក់សួរនាំក៏ប៉ះចំម៉ូតូលួចគេ ទើបសមត្ថកិច្ចឃាត់ខ្លួនតែម្ដង។ លោក ឈឿង គឹមសុង បាននិយាយថា ពេលនេះ មន្ត្រីជំនាញ អធិការស្រុកមោងប្ញស្សី កំពុងសួរនាំជនសង្ស័យរូបនេះនៅឡើយ។
បើតាមចម្លើយបឋម គឺជនសង្ស័យបានសារភាពថា ខ្លួនពិតជាបានលួចម៉ូតូរបស់ជនរងគ្រោះខាងលើនេះមែន។ ពេលនេះ មន្ត្រីជំនាញកំពុងសួរនាំជនសង្ស័យ ដើម្បីចាត់ការតាមនីតិវិធីហើយ ៕
ចែករំលែកព័តមាននេះ