រាជធានីភ្នំពេញ ៖ សេចក្តីរាយការណ៍ព័ត៌មានបានអោយដឹងថា នាព្រលប់ថ្ងៃទី១៧ ខែវិច្ឆិកានេះ ចៅក្រមស៊ើបសួរសាលាដំបូងរាជធានីភ្នំពេញលោក វ៉ាន់ សែនវិសុទ្ធ បានសម្រេចមិនឃុំខ្លួន អតីតពិធីករទូរទស្សន៍ប៉ុស្តិ៍លេខ៣ នោះទេ ដែលជាប់ពាក់ព័ន្ធបទល្មើសចេញសែក គ្មានសាច់ប្រាក់អោយម្ចាស់បំណុល ។
ប្រភពដដែល បានអោយដឹងទៀតថា លោកចៅក្រមសម្រេចដោះលែងឲ្យនៅក្រៅឃុំវិញ ដោយតម្រូវអោយអតីតពិធីករលោក ភោ សុផានិត ដាក់ប្រាក់តម្កល់ធានាសំណង (ទឹកប្រាក់ចំនួនប៉ុន្មាន នៅពុំទាន់ដឹងនៅឡើយ) ។
សូមជម្រាបថា នៅរសៀលថ្ងៃទី១៧ ខែវិច្ឆិកា ឆ្នាំ២០២០នេះ កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានបញ្ជូនអតីតពិធីករទូរសទស្សន៍ប៉ុស្តិ៍លេខ៣ ទៅកាន់សាលាដំបូងរាជធានីភ្នំពេញ ពាក់ព័ន្ធបទល្មើសចេញសែកគ្មានប្រាក់ឲ្យម្ចាស់បំណុល ។
លោក ភោ សុផានិត អាយុ៤៤ឆ្នាំ ជនជាតិខ្មែរ មុខរបរពាណិជ្ជករ មានទីលំនៅបច្ចុប្បន្ន ផ្ទះគ្មានលេខ ផ្លូវបេតុង ភូមិត្រពាំងថ្លឹង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ត្រូវបានសមត្ថកិច្ចឃាត់ខ្លួន នាវេលាម៉ោង៧យប់ថ្ងៃទី១៦ ខែវិច្ឆិកា ឆ្នាំ២០២០ នៅចំណុចហាងកាហ្វេ អាម៉ាហ្សូន ផ្លូវ ព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ ពីបទមិនបំពេញកាតព្វកិច្ច ចំពោះឧបករណ៍ដែលអាចជួញដូរ បានប្រព្រឹត្តនៅរាជធានីភ្នំពេញ កាលពីថ្ងៃទី១៦ ខែមិថុនា ឆ្នាំ២០២០ តាមដីកាបង្គាប់ឲ្យនាំខ្លួន លេខ ១៣០០” ឃ ១”ដ . ច . ន ចុះ ថ្ងៃទី២៩ ខែកញ្ញា ឆ្នាំ២០២០ ចេញដោយលោក វ៉ាន់ សែនវិសុទ្ធ ចៅក្រមស៊ើបសួរសាលាដំបូង រាជធានីភ្នំពេញ បញ្ជូនមកការិយាល័យចាត់ការតាមនីតិវិធី ៕
ចែករំលែកព័តមាននេះ