ខេត្តបាត់ដំបង៖ អំពើចោរកម្មហាក់គ្មានសញ្ញាថមថយឡើយ ហើយថែមទាំងបានកើតឡើងស្ទើរទាំងយប់ទាំងថ្ងៃទៀតផង រហូតពេលខ្លះចោរបានធ្វើសកម្មភាពលួចម៉ូតូនិងគាស់ផ្ទះលួចទ្រព្យសម្បត្តិមួយថ្ងៃ៣លើកក៏មាន.. ធ្វើឲ្យពលរដ្ឋមានការព្រួយបារម្ភយ៉ាងខ្លាំងអំពីបញ្ហាអសន្តិសុខនៅក្នុងមូលដ្ឋាន។ ប៉ុន្តែបែរជាសមត្ថកិច្ចស្ទើរគ្រប់ជាន់ថ្នាក់ឆ្លើយថា មិនបានដឹងពីអំពើចោរកម្មដ៏កក្រើកនេះទៅវិញ ?
ជាក់ស្ដែងគ្រាន់តែនៅថ្ងៃទី១៥ វិច្ឆិកា អំពើចោរកម្មបានកើតឡើងចំនួន០៣លើកជាបន្តបន្ទាប់ គឺចោរលួចយកម៉ូតូពេលថ្ងៃចំនួន០២លើក និង ហែកទ្វារផ្ទះចូលលួចទ្រព្យសម្បត្តិនៅពេលយប់០១លើក នៅក្នុងក្រុងបាត់ដំបង តែមេដឹកនាំសមត្ថកិច្ចស្ទើរគ្រប់ជាន់ថ្នាក់ បែរជាបដិសេធថា «មិនបានដឹងរឿងនេះ»។ បើយោងតាមព័ត៏មានបឋមដែលកោះសន្តិភាពទទូលបាន ពីអំពើចោរកម្មចំនួន០៣លើក ដែលកើតឡើងនៅថ្ងៃទី១៥ វិច្ឆិកា គឺលើកទី១- មានការផ្ដល់ព័ត៏មានថា ជនម្នាក់បានហែកទ្វារផ្ទះមួយកន្លែងចូលលួចទ្រព្យសម្បត្តិ នៅវេលាម៉ោងជាង២រំលងអាធ្រាត្រឈានចូលថ្ងៃទី១៥ វិច្ឆិកា នៅក្នុងបូរីរោងចក្រ ស្ថិតនៅខាងមុខអធិការនគរបាលក្រុងបាត់ដំបង តែម្ដង។ សកម្មភាពចោររាងសង្គមម្នាក់នោះ បានជាប់នៅក្នុងកាមេរ៉ាសុវត្ថិភាពយ៉ាងច្បាស់ក្រឡែតផង។
ម្ចាស់ផ្ទះបានអះអាងថា លោកចោរបានហែកចូលតាមទ្វារក្រោយ ដែលខ្លួនដេកភ្លេចចាក់សោរខាងក្នុង។ ជននោះបានរើកកាយលួចយកកុំព្យូទ័រយូរដៃ០១គ្រឿង និង ទូរស័ព្ទ០២គ្រៀង រួចចាកចេញដោយសុវត្ថិភាព។ ព័ត៏មាននេះ បែបទំនងមិនទាន់ជ្រាបដល់សមត្ថកិច្ចផង ស្រាប់តែនៅវេលាម៉ោងជាង១០ព្រឹកថ្ងៃដដែល ប្រភពបានរាយការណ៏ថា កម្មករសំណង់ម្នាក់ ត្រូវចោរកាច់សោរ.កលួចយកម៉ូតូមួយគ្រឿងជិះគេចខ្លួនដោយសុវត្តិភាព ពេលគាត់កំពុងធ្វើសំណង់មួយកន្លែង នៅម្ដុំប៉ុស្ដ៏រដ្ឋបាល និង សាលាសង្កាត់អូរចា ក្រុងបាត់ដំបង។ ម៉ូតូនោះម៉ាកហុងដាឌ្រីមស៊េរីឆ្នាំ២០១៩ តែគេមិនបានប្រាប់ស្លាកលេខច្បាស់លាស់ទេ។
គេមិនដឹងថា តើមន្ត្រីនគរបាលប៉ុស្ដ៏ ឬ មន្ត្រីអធិការក្រុង ឬ មន្ត្រីការិយាល័យជំនាញ នៃស្នងការដ្ឋានខេត្ត បានជ្រាបអំពីដំណឹងដ៏អកុសល្យនេះហើយឬនៅនោះទេ ? ស្រាប់តែនៅវេលាម៉ោង២និង៣០នាទីរសៀលថ្ងៃដដែលនេះទៀត កោះសន្តិភាព បានទទូលដំណឹងដ៏អាក្រក់នេះជាលើកទី៣ ថា មានកម្មករសំណង់ម្នាក់ទៀត ត្រូវចោរលួយកម៉ូតូបាត់ ពេលកំពុងធ្វើសំណង់ផ្ទះល្វែងនៅម្ដុំអគារលក់បន្លែ ក្នុងតំបន់ផ្សារទំនើប«ភូ ពុយ» ដែលស្ថិតក្នុងសង្កាត់អូរចា ក្រុងបាត់ដំបង។
កម្មករសំណង់ម្នាក់នេះឈ្មោះ អឿន សារ៉ើន ប្រុសអាយុ៣៣ឆ្នាំ រស់នៅភូមិគោកដូង ឃុំពាមឯក ស្រុកឯកភ្នំ។ បើតាមកម្មករសំណង់រូបនេះ បានប្រាប់កោះសន្តិភាពតាមទូរស័ព្ទ នៅព្រឹកថ្ងៃទី១៦ វិច្ឆិកាថា ម៉ូតូរបស់គាត់ដែលត្រូវចោរលួចនោះម៉ាកហុងដាឌ្រីមស៊េរីឆ្នាំ២០១៩ ពាក់ស្លាកលេខ បាត់ដំបង 1AF-8195។ លោកសារ៉ើន បានប្រាប់ថា ម៉ូតូនោះលោកទុកខាងក្រោម នៃអគារសំណងជាមួយនឹងម៉ូតូ០២គ្រឿងទៀតរបស់កម្មករដូចគ្នា ហើយនាំគ្នាឡើងធ្វើការជាន់ខាងលើ។ លុះពេលលោកចុះមកយកអីវ៉ាន់នៅខាងក្រោម ស្រាប់តែបាត់ម៉ូតូរបស់លោក ទើបមានការផ្អើលឆោឡោតែម្ដង។
កម្មកររូបនេះបានបញ្ជាក់ដែរថា ម៉ូតូនោះលោកបានទិញបង់រំលស់ នៅ៤ខែទៀតទើបរួចខ្លួន តែពេលនេះត្រូវចោរលួចបាត់ទៅហើយ។ ក្រោយបាត់ភ្លាម លោកបានទៅដាក់បណ្ដឹងនៅប៉ុស្ដីរដ្ឋបាលអូរចា តែក្រោយទទូលបណ្ដឹងរហូតដល់ព្រឹកថ្ងៃទី១៦ វិច្ឆិកា នេះ មិនទាន់ឃើញមន្ត្រីណាម្នាក់ចុះទៅពិនិត្យទីតាំងកើតហេតុទេ។ ប៉ុន្តែមន្ត្រីប៉ុស្ដ៏បានប្រាប់នៅពេលទទូលបណ្ដឹងថា «បាត់ចំថ្ងៃអាទិត្យសមត្ថកិច្ចសម្រាក គ្មានមន្ត្រីធ្វើការទេ»។
ជុំវិញអំពើចោរកម្មដែលបានកើតឡើងជាបន្តបន្ទាប់ចាប់តាំងពីវេលារំលងអាធ្រាត្រ រហូតដល់ថ្ងៃជិតលិច យ៉ាងកក្រើកក្រុងខាងលើនេះ ហាក់មិនរំខានដល់សមត្ថកិច្ចឡើយ បើទោះជាមន្ត្រីប៉ុស្ដ៏រដ្ឋបាល បានទទូលបណ្ដឹងជនរងគ្រោះក្ដី។ នៅម៉ោងជាង៦ល្ងាចថ្ងៃទី១៥ វិច្ឆិកា អធិការក្រុងបាត់ដំបង លោក ឆាង វណ្ណឆៃ បានទូរស័ព្ទមកសួរនាំ កោះសន្តិភាព អំពីសកម្មភាពបទល្មើសខាងលើនេះ ដោយលោកប្រាប់ថា លោកមិនបានដឹងរឿងនេះ។ បើទោះជាមានអំពើចោរកម្មកើតឡើងនៅខាងមុខអធិការក្រុងរបស់លោកក្ដី ព្រោះគ្មានអ្នករាយការណ៏។
ដោយឡែក ស្នងការរងផែនព្រហ្មទណ្ឌវិញ លោកលឹម ពុទ្ធីឡា ក៏មិនខុសពីលោកអធិការក្រុងដែរ ដោយលោកបានបញ្ជាក់ប្រាប់កោះសន្តិភាព នៅព្រឹកថ្ងៃទី១៦ វិច្ឆិកា នេះដែរថា «ខ្ញុំមិនបានដឹងរឿងនេះទេ ព្រោះគេមិនរាយការណ៏។ ម្យ៉ាងខ្ញុំជាប់រវល់បេសកកម្មមកភ្នំពេញ»។ ប៉ុន្តែលោកឧត្តមសេនីយ៏ត្រី សាត គឹមសាន ស្នងការខេត្ត បានបញ្ជាក់តាមទូរស័ព្ទ បន្ទាប់ពីការបំភ្លឺរបស់លោកស្នងការរងយ៉ាងដូច្នេះថា «ព័ត៏មានហ្នឹង.. ខ្ញុំបានបញ្ជូនឲ្យក្រុមប្រតិកម្មរហ័សចាត់ការ ជាមួយអធិការក្រុង និង ការិយាល័យជំនាញ។
ហើយខ្ញុំបានឲ្យលោកស្នងការរងដែលទទូលព័ត៏មានហ្នឹង ចាត់ចែងហើយ»។ ប៉ុន្តែនៅពេលផ្ដល់ចម្លើយថា ខ្ញុំបានសួរទៅលោក លឹម ពុទ្ធីឡា អំពីរឿងនេះ តែលោកបានប្រាប់ថា លោកមិនបានដឹងទេ តើរឿងនេះយ៉ាងម៉េចដែរ ? លោកសាត គឹមសាន បានប្រាប់ថា «ចាំមើលខ្ញុំ ឆែកឡើងវិញមើល បើមានករណីចឹង.! »
សូមបញ្ជាក់ថា កាលពីព្រលប់ថ្ងៃទី១១ វិច្ឆិកា ក៏មានករណីលួចម៉ូតូម៉ាកស្កុពីពណ៏ស មួយគ្រឿងផងដែរ នៅម្ដុំខាងលិចផ្សារណាត់ ក្រុងបាត់ដំបង។ កាមេរ៉ាសុវត្ថិភាព បានថតជាប់សកម្មភាពលោកចោរម្នាក់ដើរយ៉ាងស្លុយទៅលួចយកម៉ូតូនោះនៅខាងមុខផ្ទះ ខណៈជនរងគ្រោះកំពុងនៅខាងក្នុងផ្ទះ។ ជននោះពាក់មួកកន្តិប ពាក់ម៉ាស់មុខ បានដើរតម្រង់ម៉ូតូ រួចឡើងជិះចេញយ៉ាងស្រូល រហូតដល់ពេលនេះសមត្ថកិច្ចនូវមិនទាន់មានតម្រុយនៅឡើយទេ។
ពាក់ព័ន្ធនឹងសកម្មភាពចោរយ៉ាងគគ្លើនខាងលើនេះ គេសង្កេតឃើញចំណាត់ការរបស់សម្ថកិច្ច ហាក់កំពុងវិលវល់បាត់ម្ចាស់ការ ក្នុងការស៊ើបអង្កេត ឬ ការកំណត់មុខសញ្ញាជនសង្ស័យ។ មិនតែប៉ុណ្ណោះថ្នាក់ដឹកនាំខ្លះហាក់ឆ្លើយដោះបន្ទុករៀងៗខ្លួន ខណៈប្រជាពលរដ្ឋកំពុងព្រួយបារម្ភយ៉ាងខ្លាំង អំពីបញ្ហាអសន្តិសុខនៅក្នុងមូលដ្ឋាន ក្រោយពីពួកចោរកាន់តែបង្ហាញសកម្មភាពយ៉ាងគគ្លើនស្ទើររាល់ថ្ងៃ។បច្ចុប្បន្ នអំពើចោរកម្មដែលបានកើតឡើងលេចធ្លោជាងគេ ដោយគ្មានសញ្ញាថមថយនោះ គេសង្កេតឃើញមានដូចជា «ចោរលួច ចោរឆក់ និង ក្រុមចោរគាស់លំនៅឋាន» ។
ប៉ុន្តែបន្ថែមលើនេះអ្វីដែលកាន់តែធ្វើឲ្យមានការភ័យខ្លាចនោះគឺ « ក្រុមប្រព្រឹត្តគ្រឿងញៀន និង ក្រុមក្មេងទំនើង» ដែលកំពុងមានសន្ទុះកាន់តែខ្លាំងស្ទើរគ្រប់ទីកន្លែង មិនថា នៅទីប្រជុំជន ឬ ទីជនបទឡើយ បើទោះជាសមត្ថកិច្ចជំនាញ ធ្លាប់បង្ក្រាបបានជាបន្តបន្ទាប់ក្ដី៕
ចែករំលែកព័តមាននេះ