រាជធានីភ្នំពេញ ៖ ព្រះរាជាណាចក្រកម្ពុជាក្នុងរយៈពេលចាប់ពីថ្ងៃទី១៨ – ២៤ ខែវិច្ឆិកា ឆ្នាំ២០២០ ទទួលនូវឥទ្ធិពលនៃសម្ពាធខ្ពស់ពីភាគខាងជើង (ប្រទេសចិន) និងខ្យល់មូសុងឦសានខ្សោយ ។ នេះបើតាមក្រសួងធនធានទឹក និងឧតុនិយម ។
យោងតាមសេចក្តីប្រកាសព័ត៌មានរបស់ក្រសួងធនធានទឹកចេញផ្សាយ នៅថ្ងៃទី១៧ វិច្ឆិកាឆ្នាំ២០២០ថា ចាប់ពីថ្ងៃទី១៨ – ២៤ ខែវិច្ឆិកា ឆ្នាំ២០២០ ទទួលនូវឥទ្ធិពលនៃសម្ពាធខ្ពស់ពីភាគខាងជើង (ប្រទេសចិន) និងខ្យល់មូសុងឦសានខ្សោយដោយស្ថានភាពបែបនេះធ្វើឲ្យបណ្តាខេត្តនៅតំបន់វាលទំនាបកណ្ដាល ៖ សីតុណ្ហភាពអប្បបរមាមានពី២២ -២៤ °C សីតុណ្ហភាពអតិបរមា មានពី ២៩-៣១ °C ។
នៅថ្ងៃ១៨-២២ ខែវិច្ឆិកា ផ្នែកមួយចំនួននៃបណ្តារាជធានីខេត្ត នៅភាគខាងក្រោមនឹងអាចមានភ្លៀងក្នុងកម្រិតពីខ្សោយទៅមធ្យម ។ ចំណែកបណ្តាខេត្តជាប់ជួរភ្នំដងរែក និងខ្ពង់រាបឦសានសីតុណ្ហភាពអប្បបរមាមានពី ២១-២៣ °C សីតុណ្ហភាពអតិបរមា មានពី២៨-៣០ °C ចំពោះស្ថានភាពភ្លៀងស្ទើរតែគ្មានទាំងស្រុង ។
បើមានក្នុងកម្រិតតិចតួចតែប៉ុណ្ណោះ ។ ដោយឡែកតំបន់មាត់សមុទ្រសីតុណ្ហភាពអប្បបរមា មានពី ២៣-២៥ °C សីតុណ្ហភាពអតិបរមាមានពី ២៨-៣០ °C ។ ក្រសួងបានបន្តថានៅថ្ងៃទី១៩-២២ ខែវិច្ឆិកា នឹងអាចមានភ្លៀងក្នុងកម្រិតខ្សោយទៅមធ្យម ព្រមទាំងរលកសមុទ្រ អាចមានកម្ពស់ ០,៥ – ១ម៉ែត្រ ៕
ចែករំលែកព័តមាននេះ