រាជធានីភ្នំពេញ ៖ បាត់មុខពីមហាជន និងមិត្តសិល្បៈពេលនេះ លោកជុំ ស៊ីថា អតីតប្រុសស្អាតធ្លាប់លេចធ្លោ បានធ្វើរឿងមួយដោយសារខ្លួន និងភរិយាត្រៀមបានកាដូកូនភ្លោះដល់ទៅ៣នាក់។ នេះជាអ្នកសិល្បៈដំបូងគេដែលទទួលបានកូនភ្លោះដល់ទៅ៣នាក់…
រាជធានីភ្នំពេញ ៖ បាត់មុខពីមហាជន និងមិត្តសិល្បៈពេលនេះ លោកជុំ ស៊ីថា អតីតប្រុសស្អាតធ្លាប់លេចធ្លោ បានធ្វើរឿងមួយដោយសារខ្លួន និងភរិយាត្រៀមបានកាដូកូនភ្លោះដល់ទៅ៣នាក់។ នេះជាអ្នកសិល្បៈដំបូងគេដែលទទួលបានកូនភ្លោះដល់ទៅ៣នាក់ ក្នុងផ្ទៃម្តាយ ហើយតម្រូវឱ្យមើលថែទាំសុខភាពទាំងម្តាយ និងកូន ឱ្យបានមុតមាំជាទីបំផុត។
ពិតជាភ្ញាក់ផ្អើល ដោយសារនៅលើបណ្តាញសង្គមរបស់អតីតតារាសម្តែង និងបង្ហាញម៉ូដ ជុំ ស៊ីថា ស្រាប់តែបង្ហោះរូបថតកំពុងមានក្តីសុខនោះ ព្រោះតារារូបនេះសាងភាពចាប់អារម្មណ៍ដែលភរិយាខ្លួនពពោះម្តងកូន៣នាក់។ នេះជាភាពនឹកស្មានមិនដល់មួយ និងកក្រើកពេញសង្គមសិល្បៈ ហើយមានអ្នកខ្លះនិយាយថា ជុំ ស៊ីថា និងភរិយា នឹងបានកាដូពីសម្តេចនាយករដ្ឋមន្ត្រី ដែលជាផែនការតាំងពីដើមមកមិនខាន។
ដោយឡែកថ្មីៗនេះ អតីតតារាសម្តែងប្រុសរូបនេះ បានបង្ហោះរូបថតយ៉ាងផ្អែមល្ហែមជាមួយនឹងភិរិយា ដែលកំពុងពរពោះ។ តែអ្វីដែលបានធ្វើឲ្យគេចាប់អារម្មណ៍នោះ គឺលោកបានសរសេររៀបរាប់បញ្ជាក់បែបនេះថា ភរិយារបស់លោកកំពុងពរពោះកូនភ្លោះចំនួន៣នាក់ ហើយពេលនេះបាន៨ខែហើយ ត្រៀមនឹងសម្រាលក្នុងរយៈពេលដ៏ខ្លីខាងមុខនេះផងដែរ។
ជារួមនេះ គឺជាដំណឹងដែលគួរឲ្យចូលរួមអបអរ ហើយក៏ជាដំណឹងដ៏គួរឲ្យភ្ញាក់ផ្អើលមួយ ផងដែរ ព្រោះជាក់ស្តែងកន្លងមក កម្រមានអ្នកពរពោះកូនភ្លោះម្តង៣រូបបែបនេះខ្លាំងណាស់។ ហើយចំណុចមួយទៀត ដែលធ្វើឲ្យអ្នកលេងបណ្តាញសង្គមកត់សម្គាល់នោះ គឺត្បិតតែភិរិយារបស់អតីតរូបនេះ ពរពោះកូនភ្លោះ៣នាក់បានរយៈពេល៨ខែក៏ពិតមែន តែមើលទៅផ្ទៃពោះក៏មិនធំខ្លាំងដែរ ចំណែករូបសម្រស់វិញក៏នៅតែស្រស់ស្អាតដដែល។
យោងតាមការបង្ហោះនោះកូនក្នុងផ្ទៃ គឺប្រុស២ ស្រី១ ដោយកូនទាំង៣រឹងមាំល្អ។ យ៉ាងណា ឃើញថា តារាសិល្បៈគ្រប់គ្នាដែលស្គាល់តារាសម្តែងរូបនេះបានចូលរួមអបអរ ហើយបានផ្ញើសាជូនពរឱ្យម្តាយ និងកូនក្នុងផ្ទៃរឹងមាំល្អ និងសុខភាពល្អហើយ សម្រាលកូនប្រកបដោយជោគជ័យ។
គួរបញ្ជាក់ថា លោកជុំ ស៊ីថា បានបាត់មុខពីកញ្ចក់ទូរទស្សន៍ជាច្រើនឆ្នាំមកហើយ ដោយងាកមកបង្កើតមុខជំនួញផ្ទាល់ខ្លួនដែលកំពុងជោគជ័យ។ លោកជាអតីតប្រុសស្អាតប្រចាំស្ថានីយទូរទស្សន៍ស៊ីធីអិនផងដែរ។ ជុំ ស៊ីថា ធ្លាប់សម្តែងបទចម្រៀងភាគច្រើនឱ្យផលិតកម្មហង្សមាស និងថតស្បតមួយចំនួន។ ក្រៅពីនេះ ក៏ធ្លាប់ដើរម៉ូដប្រចាំកម្មវិធី «រាត្រីកម្សាន្ត» កាលពីច្រើនឆ្នាំមុន។ ក្រោយមកបានបាត់មុខមួយរយៈធំ ក៏លេចឮថា បានភរិយា ហើយបង្កើតមុខរបរពុះដីឡូតិ៍លក់រហូតមកដល់ពេលនេះ។
ចែករំលែកព័តមាននេះ