រាជធានីភ្នំពេញ ៖ បញ្ហាកូវីដ១៩ ដែលកំពុងមានការព្រួយរបាម្ភនៅក្នុងប្រទេសកម្ពុជានាពេលនេះ បានធ្វើឲ្យអ្នកសិល្បៈមួយចំនួនបាត់បង់ចំណែកទីផ្សាររបស់ខ្លួនជាថ្មីម្តងទៀត បន្ទាប់ពីពួកគេបានបាត់បង់រួចមកហើយកាលពីជំងឺនេះកំពុងរីករាលដាលខ្លាំងជាសាកល ។ ពិតណាស់ បន្ទាប់ពីបញ្ហាជំងឺកូវីដ១៩នៅក្នុងប្រទេសកម្ពុជា ត្រូវរាជរដ្ឋាភិបាលកម្ពុជាបានចាត់វិធានការទប់ស្កាត់យ៉ាងល្អនោះ បានធ្វើឲ្យពិធីជួបជុំមួយចំនួនបានចាប់ផ្តើមដំណើរការឡើងវិញជា បណ្តើរៗ ដោយនៅក្នុងនោះរាប់ទាំងពិធីសិល្បៈ មង្គលការ និងការបើកដំណើរការរោងកុនឡើងវិញ ជាដើម ។
ការចាប់ផ្តើមដំណើរការជាថ្មីឡើងបានធ្វើឲ្យអ្នកសិល្បៈ និងអ្នកពាក់ព័ន្ធសិល្បៈ ជាពិសេសអ្នកមានទីផ្សារខ្ពស់ អាចរកប្រាក់ចំណូលរបស់ពួកគេ បើទោះបីជាការដំណើរការឡើងវិញនេះនៅមានការត្បិតត្បៀត និងការរក្សាការពារខ្ពស់នៃការរីករាលដាលនៃជំងឺកូវីដក៏ដោយ ។ យ៉ាងណាក្ដីបន្ទាប់ពីការបារម្ភពីកូវីដបានកើតឡើងវិញថ្មីនោះ កម្មវិធីសិល្បៈ មង្គលការ ពិធី ផ្សេងៗ និងរោងកុនជាដើម ត្រូវរាជរដ្ឋាភិបាលប្រកាសផ្អាកជាថ្មី នាំឲ្យអ្នកសិល្បៈមួយចំនួនក៏រងប៉ះពាល់ទីផ្សារជាថ្មីផងដែរ ។
កាលពីថ្ងៃទី១៣ វិច្ឆិកា ២០២០ អ្នកនាង ខាត់ សុឃីម បានអះអាង ពេលនេះរូបនាងក៏រងផលប៉ះពាល់ជាថ្មីផងដែរ ពីការរកស៊ីទទួលទាននៅក្នុងផ្នែកសិល្បៈនេះ បន្ទាប់់ពីនាងរងផលប៉ះពាល់ម្តងហើយកាលពីពេលកន្លងទៅ ។ អ្នកនាងសុឃីមថា «កូវីដប្រហាររោងការទៀតហើយ មានរោងខ្លះនៅក្នុងខែវិច្ឆិកានេះ ត្រូវបានគេលុបចោលជា បណ្តើរៗហើយ នៅឡើយតែរង់ចាំមើលនៅខែធ្នូជាបន្តបន្ទាប់ទៀត ព្រោះខ្លាចជិតដល់គេលុបចោលទៀត »។
យ៉ាងណាក្ដីបើតាមអ្នកនាងខាត់ សុឃីម បើទោះបីជាពេលនេះមិនទាន់មានម្ចាស់ដើមការច្រើនលុបចោល ពោលគឺនៅមាន មួយៗក៏ដោយ ប៉ុន្តែនាងនៅតែបារម្ភ ព្រោះនៅរោង ថ្មីៗនាខែ ក្រោយៗទៀតដែលអាចនឹងត្រូវគេលុបចោលដូចគ្នា ។
ចំណែកពិធីការិនីដ៏ល្បី និងមានទីផ្សារខ្ពស់អ្នកនាងកែវ ចាន់និមល បានអះអាងពីការខាតបង់ប្រាក់ចំណូលរបស់ខ្លួនពីការលុបចោលពិធីនានាផងដែរ ដោយសារបញ្ហាជំងឺកូវីដក្នុងប្រទេសកម្ពុជានាពេលនេះ ។ អ្នកនាងបានបង្ហោះសារតាមហ្វេសប៊ុកបញ្ជាក់ថា «ឃើញគេផុសថ្ងៃ11/11/2020 ជាថ្ងៃល្អ ល្អមែនទេដឹង ! cancelគ្រប់រោងអ៊ីចឹង »។
តាមរយៈសារដែលបានបង្ហោះពីពិធីការិនីកែវ ចាន់និមល បញ្ជាក់ថា ការងារជាពិធីការិនីតាមមង្គលការ និងកម្មវិធីសម្ពោធនានារបស់នាងគឺត្រូវបានលុបចោលទាំងអស់ ដែលនាងអះអាងថា នោះជាការលុបចោលជាទ្រង់ទ្រាយធំតែម្តង ។
តារាសម្តែង និងជាពិធីការិនីសុខ សុម៉ាវត្តី ក៏បានលើកឡើងពីការបាត់បង់ទីផ្សារប្រាក់ចំណូលពីអាជីពសិល្បៈរបស់នាង ដោយសារជំងឺកូវីដដែរ ។ នាងបានបង្ហោះសារតាមបណ្តាញសង្គមថា« Cancel ជាង១០រោង ថ្ងៃល្អ11.11 នៅមានផ្សេងទៀតកំពុងចាំស្ដាប់ដំណឹង»។
ជាមួយគ្នានោះដែរចាងហ្វាងផលិតកម្មកថាជ័យភាពយន្តលោកហ៊ុយ យ៉ាឡេង បានត្អូញត្អែរពីការខាតបង់នៅក្នុងការរកប្រាក់ចំណូលពីការចាក់បញ្ចាំងឡើងវិញភាពយន្តរឿង«ដើម្បីកូន» បន្ទាប់ពីរោងភាពយន្តទាំងអស់ត្រូវបានផ្អាកដំណើរការជាថ្មី ដោយសារបញ្ហាជំងឺកូវីដ ។ លោកបានបង្ហោះសារតាមហ្វេសប៊ុករបស់លោកថា «រាត្រីចុងក្រោយ ទស្សនីយភាពចុងក្រោយនៅរោងកុន ពេលឯងបើកខ្ញុំក៏រត់មកស្វាគមន៍ឯងមុនគេ ពេលឯងបិទខ្ញុំក៏រត់មកលាឯងមុនដូចគ្នា សុំទោសផងមិត្តអ្នកគាំទ្រក៏ដូចជាភ្ញៀវកិត្តិយសទាំងអស់ដែលបានអញ្ជើញហើយត្រូវសុំពន្យារពេលទាល់តែរោងភាពយន្តបើកវិញ ។ អរគុណបងប្អូនដែលត្រៀមជួយប៉ាវមួយហលៗសម្រាប់បុគ្គលិកដើម្បីគាំទ្រភាពយន្តខ្មែរ សង្ឃឹមថាមួយកំផ្លៀងទៀតរបស់កូវីដនេះអាចតស៊ូបានទៀតទៅចុះ »។
ទោះជាយ៉ាងណាក៏ដោយបើទោះបីជាអ្នកសិល្បៈមួយចំនួនត្រូវខាតបង់ពីការប្រាក់នៅក្នុងរលកថ្មីនៃជំងឺកូវីដនេះក៏ដោយ ប៉ុន្តែពួកគេនៅតែយល់ស្របទៅនឹងវិធានការចាំបាច់ដែលរាជរដ្ឋាភិបាលបានសម្រេចនាពេលនេះ ព្រោះជាវិធានការដ៏សំខាន់ក្នុងការទប់ស្កាត់ការរីករាលដាលនៃជំងឺកូវីដនៅក្នុងប្រទេសកម្ពុជា ៕
ចែករំលែកព័តមាននេះ