ខេត្តក្រចេះ ៖ ប្រជាពលរដ្ឋនៅលើកោះទ្រង់សឹងគ្រប់គ្នា តែងនិយមដាំក្រូចធ្លុងនៅក្នុងបរិវេណផ្ទះរបស់ខ្លួនពេញដេរដាស ព្រោះតែក្រូចធ្លុងលើដីកោះដ៏មានជីវជាតិនេះ ផ្អែមឆ្ងាញ់ប្លែកពីក្រូចធ្លុងដែលដាំនៅកន្លែងដទៃ ដែលភ្ញៀវទេសចរនិយមចូលចិត្តច្រើន ប៉ុន្តែបើតាមការត្អូញត្អែររបស់អាជីវករ តម្លៃក្រូចធ្លុងនៅទីនោះរាងខ្ពស់បន្តិច ។ នេះជាផលិតផលទេសចរណ៍ថ្មីមួយទៀត ដែលភ្ញៀវទេសចរបានយល់និងបានគាស់កកាយរកឃើញនៅលើទឹកដីកោះទ្រង់ ។
កោះទ្រង់ជាកោះមួយនៅកណ្ដាលទន្លេមេគង្គលើ ស្ថិតនៅសង្កាត់កោះទ្រង់ ក្រុងក្រចេះ ខេត្តក្រចេះ។ នៅលើកោះនេះ មានភូមិចំនួន២ភូមិ គឺភូមិក្បាលកោះ និងភូមិចុងកោះ។ តាមរយៈមន្ទីរទេសចរណ៌ខេត្ត ក៏ដូចជាប្រជាពលរដ្ឋនៅលើកោះបានឱ្យដឹងថា ការដាំដុះក្រូចធ្លុងនៅលើកោះទ្រង់នេះ ភាគច្រើនធ្វើតាមរបៀបបំបៅ បន្ទាប់ពីបំបៅបានពី ២-៣ខែ គេយកវាទៅផ្សាំ រួចហើយគេយកមែកផ្សាំនោះទៅដាំ។ លុះបានរយៈពេលពី ៤-៥ឆ្នាំក្រោយ ទើបក្រូចចេញផ្លែផ្កា។
ក្រូចធ្លុងដែលដាំនៅទីនោះ មានរសជាតិផ្អែមឆ្ងាញ់ សាច់ទន់ល្មើយ សំបកក៏មិនជាក្រាស់ប៉ុន្មានឡើយ ចំណែកដើមមានកម្ពស់ជាមធ្យមប្រមាណ៣ម៉ែត្រ ។ ប្រជាពលរដ្ឋនៅទីនោះប្រាប់ថា ក្នុងមួយដើមៗអាចមានផ្លែរហូតដល់ ១០០ផ្លែឯណោះ។ ពលរដ្ឋដដែលបានបញ្ជាក់ទៀតថា ការលក់ក្រូចធ្លុងកោះទ្រង់នេះ ក្នុងមួយផ្លែគេលក់ពី ១០,០០០ ទៅ១២០០០រៀលនៅខេត្តក្រចេះ និងពី១២០០០ ទៅ១៤,០០០រៀលនៅភ្នំពេញ។
ជាមួយគ្នានេះដែរ អាជីវករដែលយកក្រូចធ្លុងកោះទ្រង់មកលក់បន្ត ក៏បានបង្ហាញការត្អូញត្អែរចំពោះតម្លៃក្រូចនេះផងដែរ ដោយគាត់បានបញ្ជាក់ថា ភ្ញៀវភាគច្រើនចូលចិត្តទទួលទានក្រូចនេះណាស់ ប៉ុន្តែនៅពេលដឹងពីតម្លៃលក់ក្រូចធ្លុងកោះទ្រង់ ភ្ញៀវហាក់បង្ហាញអារម្មណ៍សុញសាញមិនចង់ទិញទៅវិញ។
ទោះជាយ៉ាងណាក្ដី ក៏ទីផ្សារក្រូចខ្លុងកោះទ្រុងរបស់បងប្អូនប្រជាពលរដ្ឋនៅខេត្តក្រចេះ
នៅតែមានទីផ្សារល្អ ដែលអាចជួយបង្កើន និងដោះស្រាយជីវភាពរបស់ពួកគាត់ក្នុងមួយរដូវៗបានផងដែរ ។
ចែករំលែកព័តមាននេះ