រាជធានីភ្នំពេញ ៖ពេលបង្ហាញខ្លួនក្នុងកម្មវិធីMiss Universe Cambodia កញ្ញារ៉េត សារីតា ជាបេក្ខនារីស្រស់ស្អាតម្នាក់ ក្នុងចំណោមបេក្ខនារីជាច្រើននាក់ទៀត ។ នាងប្រាកដជាស្ថិតក្នុងចំណាប់អារម្មណ៍អ្នកតាមដានទស្សនាកម្មវិធីជាច្រើននាក់ ។
នៅវគ្គប្រកួតពាក់កណ្តាលផ្តាច់ព្រត្រ័រ៉េត សារីតា បានសាងភាពចាប់អារម្មណ៍ដោយលើកយកក្បាច់គុនល្បុក្កតោទាក់ធាក់លើឆាកបង្ហាញគណៈកម្មការ ។
ការប្រកួតបវរកញ្ញាចក្រវាល បានឈានដល់វគ្គពាក់កណ្តាលផ្តាច់ព្រ័ត្រកាលពីយប់ថ្ងៃទី១២ វិច្ឆិកា ឆ្នាំ២០២០ ។ កញ្ញាដ៏ស្រស់សោភា ចំនួន២០នាក់ត្រូវបានជ្រើសរើសឲ្យប្រជែងគ្នាដើម្បីឈានទៅលើកមកុដ Miss Universe Cambodia ២០២០។ ក្នុងចំណោមនោះកញ្ញា រ៉េត សារីតា ពាក់ស្លាកលេខ១៨ ទាក់ទាញការចាប់អារម្មណ៍គួរសមក្រោយពេលឃើញទេពកោសល្យសម្តែងរបស់នាង ។ នាងចេញបង្ហាញខ្លួនពីមួយវគ្គទៅមួយវគ្គមានការតាមដានខ្ពស់មិនចាញ់គេប៉ុន្មានទេ ។
រ៉េត សារីតា ចេះនិយាយភាសាអង់គ្លេស ដោយសារតែនាងចប់បរិញ្ញាបត្រផ្នែកភាសាអង់គ្លេស ។ នាងក្លាយជាពិធីការិនីច្រើនឆ្នាំមកហើយ ដោយបានបង្ហាញខ្លួនដំណើរការកម្មវិធីភាគច្រើនជាកម្មវិធី ធំៗ ដែលចូលរួមដោយជនបរទេស ។ សារីតាក៏ធ្លាប់មានប្រវត្តិចូលរួមសម្តែង ដោយស្នាដៃរឿងនាងបានដាក់ប្រកួតនៅក្នុងមហោស្រពភាពយន្តថ្នាក់ជាតិ ។
រ៉េត សារីតា មានរូបឆោមស្រស់ ស្នាមញញឹមសម ដំណើរល្អ និងមានភាពឆ្លាតវៃ ។ ការសម្តែងនៅវគ្គពាក់ កណ្តាលផ្តាច់ព្រ័ត្រ សារីតា ទទួលបានចំណាត់ថ្នាក់សម្តែងល្អជាងគេដោយបង្ហាញក្បាច់គុនល្បុក្កតោ លោតទាន់ធាក់ ។
ការប្រកួតវគ្គផ្តាច់ព្រ័ត្រ នឹងធ្វើឡើងនៅថ្ងៃទី២៦ វិច្ឆិកា ឆ្នាំ២០២០ នៅស្ថានីយទូរទស្សន៍បាយ័នស្ទឹងមានជ័យ ។ ទស្សនិកជនកំពុងរង់ចាំតាមដានមើលថា កញ្ញាសារីតា ឬបេក្ខនារីណាដែលឆ្នើមហើយអាចពាក់មកុដបាន និងក្លាយជាអ្នកតំណាងកម្ពុជាឆ្ពោះទៅកាន់ការប្រកួតបង្ហាញខ្លួនMiss Universe លើឆាកអន្តរជាតិនោះ ។
កញ្ញារ៉េត សារីតា ដែលពាក់ស្លាកលេខ១៨ មានជំនាញផ្នែកពិធីការិនី និយាយថា នាងនឹងខិតខំប្រឹងប្រែងធ្វើឲ្យបានល្អទៅតាមវិញ្ញាសា ដែលបានដាក់ជូន ។ « នាងខ្ញុំចង់ឲ្យគេមើលឃើញថានារីកម្ពុជា ក៏មានសមត្ថភាពអាចធ្វើបានទាំងឆាកក្នុងស្រុក និងលើឆាកអន្តរជាតិ ។ នាងខ្ញុំសង្ឃឹមថាស្ត្រីខ្មែរដែលមានសម្រស់ហើយឆ្លាត និងពូកែ ព្យាយាមយកឲ្យ អស់ពីកម្លាំងកាយចិត្តដើម្បីបង្ហាញឲ្យគេដឹង ហើយក៏ដូចជាជម្រុញខ្លួនយើងឲ្យល្បីល្បាញដែរ »។
តាមការឲ្យដឹងពីលោកម៉ែន និមលរតន៍ អ្នករៀបចំកម្មវិធីប្រកួត Miss Universe Cambodia 2020 ថា វិញ្ញាសារការប្រកួតឆ្នាំនេះប្លែកជាង ហើយលំបាកជាងឆ្នាំ មុនៗ គឺទាមទារឲ្យបេក្ខនារីមានការយកចិត្តទុកដាក់ និងពង្រឹងសមត្ថភាពប្រកួតប្រជែងឲ្យកាន់តែខ្លាំងក្លា ។ នៅវគ្គពាក់កណ្តាលផ្តាច់ព្រ័ត្រ ស្រីស្អាត២០រូបប្រជែងគ្នាដូចជាវគ្គបង្ហាញឈុតសម្លៀកបំពាក់ប្រពៃណីខ្មែរ វគ្គបង្ហាញនូវទេពកោសល្យផ្ទាល់ខ្លួន វគ្គបង្ហាញរូបរាត្រីសមោសរ និងវគ្គឈុតហែលទឹក ។
ជាលក្ខខណ្ឌការប្រកួតចុងក្រោយរើសយកបេក្ខនារី៥រូបប្រឡងខាងបង្ហាញទេពកោសល្យល្អ ហើយលេខ១បានទៅរ៉េត សារីតា ធ្វើបានល្អជាងគេខាងសម្តែងក្បាច់គុនល្បុក្កតោ ។ ក្រៅពីនេះមានរបាំក្បាច់ស្វា ការច្រៀងភាសាអង់គ្លេស ការរាំក្បាច់ពិសេសជាងគេ និងបង្ហាញការសម្តែងបទទុំទាវ ៕
ចែករំលែកព័តមាននេះ