រាជធានីភ្នំពេញ ៖ តារាចម្រៀងវ័យក្មេងកញ្ញា យូរី កំពុងត្រូវបានមជ្ឈដ្ឋានមួយចំនួនបានដាក់ការសង្ស័យថា តារារូបនេះអាចនឹងមានភាគរយខ្ពស់នៅក្នុងការមកជ្រកកោននៅក្នុងផលិតកម្មហង្សមាស បន្ទាប់ពីនាងបានចាកចេញពីផលិតកម្មសាន់ដេ ក្រោយចប់កុងត្រា។ ការកត់សម្គាល់របស់មហាជនបានស្តែងឡើង បន្ទាប់ពីគេបានមើលឃើញវត្តមានរបស់…
រាជធានីភ្នំពេញ ៖ តារាចម្រៀងវ័យក្មេងកញ្ញា យូរី កំពុងត្រូវបានមជ្ឈដ្ឋានមួយចំនួនបានដាក់ការសង្ស័យថា តារារូបនេះអាចនឹងមានភាគរយខ្ពស់នៅក្នុងការមកជ្រកកោននៅក្នុងផលិតកម្មហង្សមាស បន្ទាប់ពីនាងបានចាកចេញពីផលិតកម្មសាន់ដេ ក្រោយចប់កុងត្រា។
ការកត់សម្គាល់របស់មហាជនបានស្តែងឡើង បន្ទាប់ពីគេបានមើលឃើញវត្តមានរបស់ យូរី ដែលបានបង្ហាញវត្តមានច្រៀងជាញឹកញាប់នៅលើឆាកប្រគំតន្ត្រីរបស់ស្ថានីយទូរទស្សន៍ហង្សមាសជាញឹកញាប់ ដែលនោះគឺអាចជាតម្រុញមួយដ៏សំខាន់សម្រាប់នាងដែលអាចមានភាគរយខ្ពស់ចូលក្នុងផលិតកម្មដ៏ធំមួយនេះ។
ប៉ុន្តែយ៉ាងណា ទាំងអស់នោះគ្រាន់តែជាការសន្និដ្ឋានក្រៅផ្លូវការប៉ុណ្ណោះ ខណៈភាពពិតជាក់ស្តែងយ៉ាងណានោះ គឺមិនត្រូវបាន យូរី បញ្ជាក់ឲ្យបានច្បាស់លាស់នៅឡើយទេ ក្នុងពេលដែលតារាចម្រៀងរូបនេះកំពុងតែត្រៀមខ្លួននៅក្នុងការបញ្ចេញបទថ្មីៗនៅអំឡុងខែនេះ ឬខែក្រោយ។
ពាក់ព័ន្ធនឹងបញ្ហាខាងលើនេះ ម្ចាស់បទដ៏ល្បី និងពេញនិយម ចាក់ទឹកដូង នាង យូរី បានអះអាងប្រាប់កោះសន្តិភាពតាមសារអេឡិចត្រូនិចថា ចំពោះព័ត៌មានដែលថា នាងអាចនឹងចូលទៅផលិតកម្មហង្សមាសនោះ គឺនាងមិនអាចឆ្លើយតបបាននៅពេលនេះឡើយ។ នាងថា «សុំទោសបង ញ៉ុមអត់ទាន់អាចឆ្លើយតបបាននៅឡើយទេបង ក្នុងពេលនេះ ព្រោះវាជាគោលការណ៍របស់ក្រុមហ៊ុនថ្មី ដែលគាត់មិនអាចឱ្យយើងបកស្រាយអ្វីបានឱ្យក្បោះក្បាយនោះឡើយ»។
នាងបញ្ជាក់ថា «សម្រាប់រូបនាង ទោះនៅក្នុងផលិតកម្មណាក៏ដោយ ក៏នាងនៅតែសប្បាយចិត្តដែរ ព្រោះនោះគឺជាអ្វីដែលនាងចង់បានសម្រាប់បង្កើនអាជីពសិល្បៈ និងអាចមានឱកាសបញ្ចេញបទថ្មីបន្ថែមទៀតសម្រាប់ប្រិយមិត្តដែលធ្លាប់គាំទ្រដល់រូបនាងពីមិនដល់ឥឡូវ»។
បើតាម យូរី តាមគម្រោងថ្មីរបស់នាងជាច្រើនបទអាចនឹងចេញនៅក្នុងខែនេះ ឬខែក្រោយ ព្រោះបទទាំងអស់នោះបានថតរួចរាល់ហើយ ពោលគឺរង់ចាំតែថ្ងៃចេញផ្សាយប៉ុណ្ណោះ។
ជាការកត់សម្គាល់តាមអ្វីដែល យូរី បានលើកឡើងខាងលើនេះ វាអាចជាតម្រុយមួយជាក់លាក់ច្រើន សម្រាប់វិថីឆ្ពោះទៅកាន់ផលិតកម្មហង្សមាស គ្រាន់តែពេលនេះនាងមិនអាចបញ្ជាក់ឲ្យច្បាស់នៅឡើយ ព្រោះនោះជាគោលការណ៍របស់ផលិតកម្មថ្មី ក៏ដូចជាបណ្តាផលិតកម្មផ្សេងៗមួយចំនួនទៀត។
ទោះជាយ៉ាងណាក៏ដោយ គេរំពឹងថា ប្រសិនបើ យូរី អាចនឹងចូលក្នុងផលិតកម្មហង្សមាសពិតប្រាកដមែននោះ នាងអាចនឹងមានឱកាសសម្រាប់ចាប់ឈោងភាពល្បីល្បាញបន្ថែមទៀត នៅក្នុងអាជីពចម្រៀងរបស់នាង ព្រោះហង្សមាសជាផលិតកម្មធំ ហើយអាចនឹងផ្តល់ឱកាសឲ្យនាងចេញច្រៀងតាមខនសឺតនានាច្រើន។ ជាងនេះទៅទៀតគេរំពឹងថា យូរី អាចនឹងជំនួសកន្លែងរបស់នាង ទេព បូព្រឹក្ស ដែលបានចាកចេញ ព្រោះទាំងទឹកដមសំនៀង និងក្បាច់រាំ គឺអ្នកទាំងពីរមិនសូវចាញ់គ្នាឡើយ ស្របពេលដែល យូរី ក៏មានប្រិយមិត្តគាំទ្រច្រើនផងដែរ បន្ទាប់ពីនាងបានចេញបទចម្រៀងល្បីៗជាច្រើននៅក្នុងផលិតកម្មសាន់ដេ៕
ចែករំលែកព័តមាននេះ