ស្ថានីយរថភ្លើងដ៏អាថ៌កំបាំងចំនួន5របស់ជប៉ុន
រថភ្លើង គឺជាយានដែលមានអ្នកធ្វើដំណើរច្រើនបំផុតនៅប្រទេសជប៉ុន ប៉ុន្តែអ្នកទេសចរភាគច្រើនបានស្គាល់ត្រឹមតែស្ថានីយរថភ្លើងសំខាន់ៗនៅក្នុងទីក្រុង ធំៗ និងទីតាំងទេសចរណ៍ដ៏ពេញ
រថភ្លើង គឺជាយានដែលមានអ្នកធ្វើដំណើរច្រើនបំផុតនៅប្រទេសជប៉ុន ប៉ុន្តែអ្នកទេសចរភាគច្រើនបានស្គាល់ត្រឹមតែស្ថានីយរថភ្លើងសំខាន់ៗនៅក្នុងទីក្រុង ធំៗ និងទីតាំងទេសចរណ៍ដ៏ពេញនិយមប្រកបដោយមនុស្សណែនណាន់តាន់តាប់ ប៉ុន្តែប្រសិនបើធ្វើដំណើរទៅជនបទរបស់ជប៉ុននឹងបានឃើញស្ថានីយរថភ្លើង តូចៗស្អាត ប្រណីតនិងមួយចំនួនស្ថិតក្នុងភាពជាអាថ៌កំបាំង ។
ខាងក្រោមនេះជាស្ថានីយរថភ្លើងគួរឱ្យចាប់អារម្មណ៍នៅជប៉ុន ៖
១-ស្ថានីយរថភ្លើង Okuoikojo នៅខេត្តស៊ីស៊ូអូកា
Okuoikojo ស្ថិតនៅស្រុកហៃបារ៉ា ជាជនបទរបស់ក្រុងអ៊ូមេជី ដែលមានប្រជាជនមិន ដល់៤ម៉ឺននាក់ទេ ។ ទីតាំងរបស់ស្ថានីយស្ថិតនៅលើខ្នងទំនប់ «ណាកាស៊ីម៉ា» ដោយមានស្ពានឆ្លងបឹងដ៏ធំកម្រមាន ។ អ្នកដំណើរតាមរថភ្លើងមួយខ្សែនោះអាចទស្សនាភាពស្រស់ត្រកាលរបស់ទំនប់ និងផ្ទៃទឹក ឯនៅបញ្ជរង់ចាំសម្រាប់អ្នកដំណើរក៏អាចទស្សនាបឹងនៅផ្នែកខាងក្រោមបាន ។
២-ស្ថានីយរថភ្លើង Shimonada នៅខេត្តអេហ៊ីមេ
ស្ថានីយរថភ្លើង Shimonada ស្ថិតនៅជិតសមុទ្របំផុតក្នុងប្រទេសជប៉ុន ដោយនៅឆ្ងាយពីទីក្រុងម៉ាតស៊ូយ៉ាម៉ា របស់ខេត្តអេហ៊ីម៉ា ដោយចំណាយពេលធ្វើដំណើរប្រហែល១ម៉ោង ។ នៅបញ្ជរបស់ស្ថានីយរថភ្លើង មានកៅអីវែងសម្រាប់អង្គុយចំនួន២ អាចមើលសមុទ្រដ៏ល្វឹងល្វើយនៅផ្នែកខាងមុខ ។ ភាពស្រស់ស្អាតបានបង្កប់ដោយលក្ខណៈលេចធ្លោធ្វើឱ្យស្ថានីយនោះប្រើប្រាស់ជាកន្លែងថតខ្សែភាពយន្ត និងឃោសនាផ្សព្វផ្សាយ ។
៣-ស្ថានីយរថភ្លើង Koboro station នៅលើកោះហុកកៃដូ
Koboro station មានឈ្មោះថាជាស្ថានីយរថភ្លើងដ៏អាថ៌កំបាំងនៅជប៉ុន ព្រោះទីតាំងរបស់ស្ថានីយឡោមព័ទ្ធដោយល្អាង២នៅភាគខាងកើត និងខាងលិច ចំណែកផ្នែកខាងលើជាភ្នំដោយមានផ្លូវចេញចូលស្ថានីយតែមួយគត់នៅទិសខាងត្បូងជាប់នឹងឆ្នេរសមុទ្រ ។ ស្ថានីយនោះមានទីតាំងតូចមួយដែលរថភ្លើងអាចឈប់ចតបានរយៈពេលតិច ប៉ុន្តែអ្នកដំណើរអាចគយគន់ទេសភាពដ៏ស្រស់ស្អាត មានលក្ខណៈដូចរូងដ៏ងងឹតនៅខាងក្នុងល្អាង ។
៤-ស្ថានីយរថភ្លើង Doai នៅខេត្តគុនម៉ា
ស្ថានីយ Doai មានទីតាំងនៅក្រោមដីក្នុងជម្រៅប្រហែល៧០ម៉ែត្រ ។ សម្រាប់បញ្ជរបស់ស្ថានីយរថភ្លើងនោះត្រូវដើរពីកន្លែងលក់សំបុត្រចុះតាមជណ្តើរចំនួន៤៦២កាំ ឬប្រហែល ៣៣៨ម៉ែត្រ។
៥- ស្ថានីយរថភ្លើង Tsutsuishi ក្នុងខេត្តនីកាតា
ទីតាំងស្ថានីយរថភ្លើង Tsutsuishi ស្ថិតនៅក្នុងរូងក្រោមដីនៅទីក្រុងអីុថូកាវ៉ា ដោយបញ្ជរង់ចាំត្រូវចុះតាមជណ្តើរ២៩០កាំ ទោះបីជាស្ថានីយរថភ្លើងគ្មានភាពស្រស់ស្អាតក៏ដោយ ប៉ុន្តែភាពអាថ៌កំបាំងតម្រូវឱ្យស្ថិតក្នុងលំដាប់ថ្នាក់មួយជាស្ថានីយរថភ្លើងដែលមាននិមិត្តរូបល្អបំផុតក្នុងប្រទេសជប៉ុន ៕
ចែករំលែកព័តមាននេះ