ខេត្តមណ្ឌលគិរី ៖ អភិបាលខេត្តបានជម្រុញដល់មន្ទីរអភិវឌ្ឍន៍ជនបទត្រូវពន្លឿនក្នុងការជួសជុលស្ពានយោលមួយកន្លែងដែលបាក់ដោយសារតែជំនន់ទឹកភ្លៀង និងស្តារឡើងវិញនូវផ្លូវលំជាច្រើនខ្សែដែលរងការខូចខាត។
លោក ស្វាយ សំអ៊ាង អភិបាលខេត្តមណ្ឌលគិរីបានឲ្យដឹងថា ក្នុងរយៈពេលកន្លងមក ដែលប្រទេសកម្ពុជា បានទទួលរងនូវឥទ្ធិពលព្យុះ និងមានភ្លៀងធ្លាក់ពីតិចទៅមធ្យម នៅតាមបណ្តាខេត្តមួយចំនួន ក្នុងនោះខេត្តមណ្ឌលគិរី ក៏បានរងនូវឥទ្ធិពលព្យុះ និងភ្លៀងធ្លាក់ជោកជាំផងដែរ បណ្តាលឲ្យជំនន់ទឹកភ្លៀងប៉ះពាល់ដល់ហេដ្ឋារចនាសម្ព័ន្ធផ្លូវលំជនបទមួយចំនួន នៅតាមបណ្តាស្រុក ក្នុងខេត្តមណ្ឌលគិរី។
លោកអភិបាលខេត្តបានបន្ថែមថា ដោយយោងតាមបទបញ្ជារបស់សម្តេចតេជោ នាយករដ្ឋមន្ត្រី នៃព្រះរាជាណាចក្រកម្ពុជា បានណែនាំដល់ក្រសួងស្ថាប័នពាក់ព័ន្ធ ជាពិសេស ក្រសួងអភិវឌ្ឍន៍ជនបទ ដើម្បីឲ្យចុះត្រួតពិនិត្យវាយតម្លៃ អំពីការខូចខាតនូវហេដ្ឋារចនាសម្ព័ន្ធដោយជំនន់ទឹកភ្លៀងនាពេលកន្លងមក ដើម្បីលើកគម្រោងផែនការ ស្ដារ និងជួសជុលឡើងវិញ បន្ទាប់ពីភ្លៀងមានការថបថយទៅវិញ។
លោកបញ្ជាក់ថា ខេត្តមណ្ឌលគិរី ដែលរងផលប៉ះពាល់ដោយជំនន់ទឹកភ្លៀងខ្លាំងជាងគេ គឺនៅក្នុងស្រុកកោះញែក ដែលធ្វើឲ្យបាក់រលំស្ពានយល ១កន្លែង និងខូចខាតផ្លូវលំជនបទ រួមទាំងស្ពាន និងលូមួយចំនួនទៀត ដូច្នេះដើម្បីជាវិធានការឆ្លើយតប លោកអភិបាលខេត្ត បានជំរុញដល់មន្ទីរពាក់ព័ន្ធ ជាពិសេសមន្ទីរអភិវឌ្ឍន៍ជនបទខេត្ត ត្រូវរៀបចំជួសជុលឡើងវិញជាបន្ទាន់ នៅស្ពានយោលដែលបាក់រលំ ក្នុងភូមិកែរពៅ ឃុំសុខសាន្ត នឹងត្រូវត្រួតពិនិត្យមើលស្ថានភាពផ្លូវលំជនបទ ស្ពានដែលរងការខូចខាត និងជំរុញការជួសជុលស្ពានឈើមួយចំនួន នៅក្នុងឃុំណង់ឃីលឹក ក្នុងស្រុកកោះញែក ដើម្បីឲ្យស្ពានទាំងនោះ មានលក្ខណៈរឹងមាំ ក្នុងការធ្វើដំណើររបស់ប្រជាពលរដ្ឋនៅក្នុងមូលដ្ឋាន ជាពិសេស ការដឹកកសិផលនានានៅកាន់ទីផ្សារមានភាពងាយស្រួល។
ម្យ៉ាងទៀត ក្រៅពីការខូចខាតនូវហេដ្ឋារចនាសម្ព័ន្ធនានានៅក្នុងខេត្ត មិនមានផលប៉ះពាល់ដល់អាយុជីវិត ទ្រព្យសម្បត្តិ និងខូចខាតដល់ដំណាំប្រជាពលរដ្ឋធ្ងន់ធ្ងរនោះឡើយ។
បន្ថែមលើសនេះ លោក ស្វាយ សំអ៊ាង អភិបាលខេត្ត បានស្នើដល់មន្ទីរអភិវឌ្ឍន៍ជនបទខត្ត ត្រូវសហការជាមួយក្រសួងអភិវឌ្ឍន៍ជនបទ ក្នុងការចុះពិនិត្យ និងសិក្សានូវហេដ្ឋារចនាសម្ព័ន្ធនានា ដែលរងផលប៉ះពាល់ដោយជំនន់ទឹកភ្លៀង ដើម្បីលើកគម្រោងផែនការជួសជុល និងស្តារឡើងវិញ ក្នុងការភ្ជាប់ចរាចរណ៍ជូនប្រជាពលរដ្ឋឲ្យមានលក្ខណៈងាយស្រួលផងដែរ៕
ចែករំលែកព័តមាននេះ