ផ្សោតនៅកម្ពុជា៖ មានការព្រួយបារម្ភយ៉ាងខ្លាំងក្រោយផ្សោតមួយក្បាលទៀតត្រូវបានស្លា.ប់
- ត្បូងឃ្មុំ
ខេត្តត្បូងឃ្មុំ ៖ ក្រោយប្រជាពលរដ្ឋក្នុងភូមិបានប្រទះឃើញ មានសត្វផ្សោតមួយក្បាលស្លាប់ នៅថ្ងៃទី ១៤ ខែ វិច្ឆិកាឆ្នាំ ២០២០ នៅក្នុងឃុំរការខ្នុរ…
ខេត្តត្បូងឃ្មុំ ៖ ក្រោយប្រជាពលរដ្ឋក្នុងភូមិបានប្រទះឃើញ មានសត្វផ្សោតមួយក្បាលស្លាប់ នៅថ្ងៃទី ១៤ ខែ វិច្ឆិកាឆ្នាំ ២០២០ នៅក្នុងឃុំរការខ្នុរ…
ខេត្តត្បូងឃ្មុំ ៖ ក្រោយប្រជាពលរដ្ឋក្នុងភូមិបានប្រទះឃើញ មានសត្វផ្សោតមួយក្បាលស្លាប់ នៅថ្ងៃទី ១៤ ខែ វិច្ឆិកាឆ្នាំ ២០២០ នៅក្នុងឃុំរការខ្នុរ ស្រុកក្រូចឆ្មា ខេត្តត្បូងឃ្មុំ ហើយបានរាយការណ៍មក អង្គការ មូលនិធិសកលសម្រាប់អភិរក្សធម្មជាតិ ហៅកាត់ថា (WWF) ភ្លាមៗនោះមន្ត្រីជំនាញរបស់អង្គការ បានចុះធ្វើកោសល្យវិច្ច័យសាកសព និងបានធ្វើសេចក្តីថ្លែងការណ៍មួយ ដោយមានការសោកស្តាយនិងក្រៀមក្រំជាទីបំផុតក្នុងបាត់បង់សត្វផ្សោតមួយក្បាលទៀត។
នៅថ្ងៃដដែលនោះដែរ យោងតាមការធ្វើកោសល្យវិច្ច័យសាកសព អង្គការ WWF បានសន្មត់ថា សត្វផ្សោតមួយក្បាលនោះ បានស្លាប់ប្រមាណជារយៈពេលពីរថ្ងៃហើយ។ លទ្ធផលនៃការវិភាគបឋម បានបង្ហាញថាសត្វផ្សោតមួយក្បាលនេះ ជាកូនសត្វផ្សោតឈ្មោល ដែលមានអាយុប្រមាណជា ៧ថ្ងៃប៉ុណ្ណោះ ហើយមានទម្ងន់ចំនួន ១២គីឡូក្រាម និងមានប្រវែង ១០៣ សង់ទីម៉ែត្រ។
ក្រុមជំនាញបានផ្តល់ព័ត៌មានបឋមថា ការវិភាគមិនបានរកឃើញស្លាកស្នាម នៃការរងបួសលើរាងកាយ ឬសញ្ញានៃការជាប់នឹងមងនេសាទទេ ហើយបានសន្មត់ជាបឋមថាសត្វផ្សោតនេះបានស្លាប់ ដោយមិនដឹងមូលហេតុពិតប្រាកដ។ ក្រុមអ្នកជំនាគបានផ្ទេរសាកសពផ្សោតទៅរក្សាទុកនៅទីតាំងមួយសមស្របសម្រាប់ធ្វើការប្រមូលសំណាកចាំបាច់ពីសាកសព ដើម្បិបន្តការអង្កេតវិភាគបន្ថែមទៀត ក្នុងគោលបំណងកំណត់ពីមូលហេតុនៃការស្លាប់នេះ។
អង្គការ WWF បានបន្តថា ការជាប់នឹងមងនេសាទដោយ ប្រើឧបករណ៍ច្បាប់ហាមឃាត់សុទ្ធសឹងតែជាមូលហេតុចំបងៗ ដែលបណ្តាលឱ្យសត្វផ្សោតពេញវ័យស្លាប់។ ដោយឡែក មូលហេតុនៃការស្លាប់របស់កូនសត្វផ្សោតនៅមិនទាន់ត្រូវបានអ្នកវិទ្យាសាស្រ្តអាចកំណត់ឱ្យបានច្បាស់លាស់នៅឡើយ ដែលជាកត្តាធ្វើឱ្យអ្នកវិទ្យាសាស្រ្តមានការព្រួយបារម្ភយ៉ាងខ្លាំងសម្រាប់ការរស់រានសត្វផ្សោតប្រភេទដ៏សំខាន់ជាសាកលមួយនេះទៅថ្ងៃអនាគត។
យើងត្រូវចាំបាច់អនុវត្តជាបន្ទាន់នូវវិធានការរួមគ្នាឱ្យខ្លាំង បន្ថែមទៀតដើម្បីការពារសត្វផ្សោតទន្លេមេគង្គ ឱ្យរួចផុតពីការបាត់បង់ ស្របពេលដែលលទ្ធផលនៃការធ្វើជំរឿនចុងក្រោយបង្អស់បាន បង្ហាញថាមានសត្វផ្សោតតែចំនួន ៨៩ ក្បាលប៉ុណ្ណោះ ដែលកំពុងរស់នៅក្នុងទន្លេមេគង្គនៃប្រទេសកម្ពុជា។
គួរបញ្ជាក់ផងដែរថា កាលពីរសៀលថ្ងៃទី៧ ខែវិច្ឆិកា ឆ្នាំ២០២០ នៅគុម្ពត្រែងមាត់ទន្លេភូមិទី៦ ឃុំព្រែកអាជី ស្រុកក្រូចឆ្មារ ខេត្តត្បូងឃ្មុំ មានករណីផ្សោតមួយក្បាលបានស្លាប់ ដែលជាសត្វផ្សោតញីពេញវ័យ មានអាយុប្រមាណជា ២៧ ឆ្នាំ និងមានប្រវែង ២,២ ម៉ែត្រ និងមានទម្ងន់ប្រហែល៧០គីឡូក្រមផងដែរ៕
ចែករំលែកព័តមាននេះ