រាជធានីភ្នំពេញ ៖អតីតារាចម្រៀងផលិតកម្មសាន់ដេលោកមាស សាលី បានបដិសេធព័ត៌មានដែលបានផ្សព្វផ្សាយថា លោកមានប្រពន្ធដោយមិនរៀបការ និងលួចលាក់រស់នៅសហរដ្ឋអាមេរិកដោយខុសច្បាប់ បន្ទាប់ពីលោកចេញទៅសម្តែងនៅទឹកដីមហាអំណាចមួយនេះ ។ ការបដិសេធពីម្ចាស់បទ «អង្គរក្សបេះដូង»…
រាជធានីភ្នំពេញ ៖អតីតារាចម្រៀងផលិតកម្មសាន់ដេលោកមាស សាលី បានបដិសេធព័ត៌មានដែលបានផ្សព្វផ្សាយថា លោកមានប្រពន្ធដោយមិនរៀបការ និងលួចលាក់រស់នៅសហរដ្ឋអាមេរិកដោយខុសច្បាប់ បន្ទាប់ពីលោកចេញទៅសម្តែងនៅទឹកដីមហាអំណាចមួយនេះ ។
ការបដិសេធពីម្ចាស់បទ «អង្គរក្សបេះដូង» រូបនេះ បានធ្វើឡើងបន្ទាប់ពីសារព័ត៌មានអនឡាញនៅក្នុងស្រុកមួយបានចុះផ្សាយពីជីវិតរបស់លោក មាស សាលី ដែលបានចេញទៅរស់នៅអាមេរិក និងមានភរិយានៅទីនោះដោយមិនរៀបការ ។ ការចុះផ្សាយនោះបានធ្វើឲ្យលោក មាស សាលី ខឹង និងបានឆ្លើយតបភ្លាមៗឲ្យមហាជនបានដឹងពាក់ព័ន្ធនឹងបញ្ហានេះ ។ លោកបានបដិសេធចោលទាំងស្រុងនូវការធ្វើអធិប្បាយពីសារព័ត៌មានអនឡាញដែលបានចុះផ្សាយនោះ ។
តាមរយៈហ្វេសប៊ុករបស់ខ្លួនលោក មាស សាលី បានលើកឡើងថា «កុំដើម្បីតែលុយសរសេរបង្ខូចកិត្តិយសគេអី មុននឹងផុសគួរតែស៊ើបរកព័ត៌មានពិតសិនទៅ ។ លោកសរសេររឿងមិនពិតបែបនេះ មិនយូរមិនឆាប់ website របស់អ្នកនឹងអស់អ្នកគាំទ្រ ខ្ញុំភ្ជាប់ពាក្យស្រុកខ្មែរ ហើយការនៅអាមេរិក ហើយមកនៅដោយស្របច្បាប់មិនបានខុសច្បាប់ទេលោក ហើយប្រពន្ធខ្ញុំគាត់ក៏មិនមែនមេម៉ាយដូចលោកនិយាយដែរ »។
មាស សាលី បន្តថា «បីចំណុចដែលលោកនិយាយថា រស់នៅជាមួយគ្នាមិនបានការ ខ្ញុំគេចនៅដោយខុសច្បាប់ និងថាគាត់ជាស្រីមេម៉ាយ គឺវាប៉ះពាល់កិត្តិយសគេណាស់ កុំដើម្បីប្រយោជន៍ផ្ទាល់ខ្លួនមកបំផ្លាញគេ »។
មហាជនចាប់អារម្មណ៍ក្រោយពីបានឃើញតារាចម្រៀងលោកមាស សាលី បង្ហាញរូបភាពផ្អែមល្ហែម ជាមួយនារីរូបស្រស់ម្នាក់ដែលជាអ្នករស់នៅសហរដ្ឋអាមេរិក ។ ទោះបីមិនធ្លាប់លេចឮព័ត៌មានតារាចម្រៀងរូបនេះ រៀបការក៏ពិតមែន តែគេចាប់អារម្មណ៍ឃើញនារីរូបស្រស់នោះហៅមាស សាលី ថា ជាប្តីផងដែរ ។ ជាក់ស្តែងពេលកន្លងមក គេធ្លាប់ឃើញអ្នកទាំងពីរថតរូបរៀបការ តែពិធីរៀបការផ្លូវការណាមួយនោះ គឺមិនទាន់ត្រូវបានគេដឹងច្បាស់នោះឡើយ ទើបតែពេលនេះលោកបានបញ្ជាក់ថា លោកពិតជាបានរៀបការរួចហើយនៅលើទឹកដីអាមេរិក ។
យ៉ាងណាលោក មាស សាលី បានបង្ហាញពីជីវិតរស់នៅតាមរបៀបសាមញ្ញៗ ជាមួយនឹងគ្រួសារយ៉ាងមានសេចក្តីសុខនៅទឹកដីសហរដ្ឋអាមេរិក តាមរយៈការបង្ហោះរូបភាពតាមបណ្តាញសង្គមហ្វេសប៊ុកជាបន្តបន្តបន្ទាប់ ។
តារាចម្រៀងលោក មាស សាលី បានចាកចេញពីប្រទេសកម្ពុជា ទៅរស់នៅសហរដ្ឋអាមេរិកបានរយៈពេល១ឆ្នាំហើយ ក្រោយពេលដែលលោកបានចេញសម្តែងនៅទីនោះ ហើយលោកមិនទាន់វិលមកស្រុកខ្មែរវិញនៅឡើយទេ ខណៈពេលដែលជំងឺកូវីដកំពុងរាតត្បាតខ្លាំងជាសាកល ។
ជាការកត់សម្គាល់កន្លងមក លោក មាស សាលី ធ្លាប់បានលើកឡើងថា លោកបានស្គាល់ និងសាងស្នេហ៍ជាមួយនារីដែលជាអណិកជនខ្មែរនៅអាមេរិកប្រមាណជា២ឆ្នាំមកហើយ។ លោកថា នារីដែលលោកស្គាល់នោះមានវ័យប្រមាណជាង២០ឆ្នាំប៉ុណ្ណោះ ហើយលោកបានស្គាល់នាងពេលដែលលោកបានចេញទៅច្រៀងនៅអាមេរិកនាពេលកន្លងមក ។ នារីម្នាក់នោះក៏ធ្លាប់មកស្រុកខ្មែរ ជួបរូបលោកផងដែរ។
ប្រិយមិត្តដែលធ្លាប់គាំទ្រទឹកដមសំឡេងរបស់លោក មាស សាលី រំពឹងថា តារាចម្រៀងរូបនេះនឹងអាចកសាងសុភមង្គលគ្រួសារបានយ៉ាងគាប់ប្រសើរនៅលើទឹកដីអាមេរិក ហើយតារារូបនេះក៏នឹងអាចវិលមកស្រុកកំណើតក្នុងពេលណាមួយ ហើយនៅតែបន្តចេញបទចម្រៀងថ្មីៗបន្ថែមទៀត ៕
ចែករំលែកព័តមាននេះ