រាជធានីភ្នំពេញ ៖ កែវ ពេជ្រពិសី នៅតែបន្តស្ងប់ស្ងាត់ពីអាជីពសិល្បៈ គឺមិនដូចជាច្រើនឆ្នាំកន្លងជាតារាចែងចាំងនោះទេ ។តើមកពីហេតុអ្វី ?
មួយរយៈពេលចុងក្រោយនេះ កែវ ពេជ្រពិសី ហាក់ខំប្រឹងប្រែងសិល្បៈឡើងវិញ តែមើលទៅមិនសូវលូតលាស់ទេ ដ្បិតត្រឹមតែឃើញវត្តមាន ខ្លះៗលើកញ្ចក់ទូរទស្សន៍នៃនាទីកម្សាន្តប៉ុណ្ណោះ ។ មកទល់ពេលនេះអ្នកនាងកែវ ពេជ្រពិសី នៅតែប្រកាសថាខ្លួនមិនបោះបង់ចោលសិល្បៈឡើយ ។ នាងនៅតែស្រឡាញ់ ហើយបន្តការងារនេះប្រសិនបើមានគេចង់បាន ។
ទោះជាយ៉ាងណាក្ដីប្រជាប្រិយភាពរបស់កែវ ពេជ្រពិសី មិនដូចពេលមុនទេ នាងស្ងប់ស្ងាត់ខ្លាំង គឺខ្លាំងរហូតមានគេនិយាយថាស្ងាត់ស្ទូចលែងចង់ឡើង ។ ប៉ុន្តែមានអ្នកនិយាយដែរថាពិសីពិតជាមានសង្ឃឹមដដែលឲ្យតែប្រឹងប្រែងតទៅទៀត។ គេមើលឃើញមូលហេតុថា ដោយសារតែនាងមិននិយាយឲ្យត្រូវរ៉ូវគ្នាជាមួយផលិតករណាមួយ ដូច្នេះហើយទើបមិនបានចូលរួមសម្ដែងក្នុងភាពយន្ត ឬចម្រៀងកាយវិការខារ៉ាអូខេដូចមុន ។
កែវ ពេជ្រពិសី ជាតារាស្រីដែលមានឈ្មោះបោះសំឡេងពេញពិភពសិល្បៈកាលពីប្រមាណជិត១០ឆ្នាំមុន ។ មានទាំងចម្រៀងខារ៉ាអូខេ ខ្សែភាពយន្តភាគ និងរឿងបុរាណ ត្រូវពិសីក្រសោបបានពេញណែន រកតែកម្លាំងធ្វើការមិនបាន ។ ម្ល៉ោះហើយការបាត់មុខច្រើនឆ្នាំជាកត្តាដែលរុញឲ្យនាង មិនអាចស្រោចស្រង់ពេលវេលាល្អមកវិញបាន។ បើទោះបីជានាងព្យាយាមរំកិលខ្លួនមកបម្រើសិល្បៈដូចមុនបែបណាក្ដី នៅតែហាក់មិនបានប្រសើរឡើងទេ ។
មានអ្នកលើកឡើងថា កែវ ពេជ្រពិស រើសតម្លៃខ្លួនបន្តិច ប្រសិនបើថ្លៃថតក្នុងកម្រិតមួយត្រូវគ្នា ម្ល៉េះនាងមានមុខនៅលើភាពយន្តបន្ទាប់ទៅហើយ ។ ចំណែកកែវ ពេជ្រពិសី វិញថា «បើចេះតែថតតួ ធម្មតាៗ ជាមួយតម្លៃទាបនោះកាន់តែធ្លាក់ ព្រោះយើងក៏តួមានគេស្គាល់ហើយមិនមានចេតនា ឫកពាអ្វីនោះទេ »។
ក្នុងគ្រាអាជីពសិល្បៈផិតផើយ កែវ ពេជ្រពិសី បានងាកទៅពង្រឹងមុខរបរហាងអ៊ុតសក់ផាត់មុខ និងរបរលក់ផលិតផលតាមអនឡាញ ។
អ្នកគាំទ្រមិននឹកស្មានថា ធ្លាប់ជាតារាចែងចាំង តែបែរជាជួបរឿងដែលស្មានមិនដល ់ដូចជាបរាជ័យស្នេហ៍ ហើយសិល្បៈស្ថិតក្នុងស្ថានភាពមិនលូតលាស់ ។ ក្នុងស្ថានភាពបែបនេះអ្នកគាំទ្រទទូចឲ្យនាង កុំដាក់តម្លៃច្រើនពេក ល្មមៗអាចថតបានថតទៅ ។ ប្រសិនបើនាងយល់ព្រមកម្រិតតម្លៃសមរម្យ គឺមិនទាន់ហួសពេលទេ នៅតែខ្លាំងដូចមុន ។ ជាក់ស្ដែងតារាស្រីមួយចំនួនវ័យស្របាលនាងក្លាយជាតួម្តាយ តួជំទាវ ឬលោកស្រី ។ ដូចនេះកែវ ពេជ្រពិសី គួរតែបើកចិត្តដដើម្បីបានឱកាសជាថ្មី ៕
ចែករំលែកព័តមាននេះ