ខេត្តប៉ៃលិន ៖ គេសង្កេតឃើញប្រជាពលរដ្ឋចំនួន៥នាក់ដែលបានដឹកកូនឈើហូបផ្លែ និងដើមផ្កាតាមរ៉ឺម៉កម៉ូតូ រួចធ្វើដំណើរលក់ដូរឆ្លងខេត្ត រហូតមកដល់ខេត្តប៉ៃលិន បន្តលក់ដូរអស់រយ:ពេល៣ទៅ៤ថ្ងៃកន្លងទៅនេះ ហាក់បីដូចជាមានការលំបាក អត់សូវមានអ្នកទិញ ខណៈពួកគាត់កំពុងនាំគ្នាស្នាក់នៅក្នុងវត្តពោធិមារាម…
ខេត្តប៉ៃលិន ៖ គេសង្កេតឃើញប្រជាពលរដ្ឋចំនួន៥នាក់ដែលបានដឹកកូនឈើហូបផ្លែ និងដើមផ្កាតាមរ៉ឺម៉កម៉ូតូ រួចធ្វើដំណើរលក់ដូរឆ្លងខេត្ត រហូតមកដល់ខេត្តប៉ៃលិន បន្តលក់ដូរអស់រយ:ពេល៣ទៅ៤ថ្ងៃកន្លងទៅនេះ ហាក់បីដូចជាមានការលំបាក អត់សូវមានអ្នកទិញ ខណៈពួកគាត់កំពុងនាំគ្នាស្នាក់នៅក្នុងវត្តពោធិមារាម ហៅវត្តប៉ាហ៊ី ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។
បើតាមប្រភពពីបុរសម្នាក់ឈ្មោះ សិទ្ធិ អាយុ២៧ឆ្នាំ និងឈ្មោះ វ៉ាន់ នី អាយុ២៥ឆ្នាំ រួមជាមួយម្ចាស់ម៉ូតូរ៉ឺម៉ក៣នាក់ទៀត បានរៀបរាប់ឱ្យដឹងថា ៖ ពួកគាត់មានស្រុកកំណើតរស់នៅភូមិរកា ឃុំរកា ស្រុកពារាំង ខេត្តព្រៃវែង បានបើកបរម៉ូតូរ៉ឺម៉កដឹកកូនឈើហូបផ្លែដូចជា ដើមម្កាក់ ដើមកន្ទួត ដើមស្វាយ ដើមខ្នុរ ដើមដូង ដើមកាឆាយ និងផ្កាចម្រុះពណ៌ដូចជា ផ្កាកូលាប ផ្កាក្រវ៉ាន់ ផ្កាម្ជុល ផ្កាម៉ោង១០ ដើមជ្រៃក្រឹម ដើមដូងព្រះ ព្រមទាំងប្រទាលគ្រប់មុខផងដែរ។
ប្រភពដដែលបន្តថា ការប្រកបរបរបើកម៉ូតូរ៉ឺម៉កលក់ដូរផ្កាឆ្លងដែនតាមបណ្តាខេត្តនេះ ពិតជាមានការលំបាកខ្លាំងណាស់ ដោយក្នុង១ថ្ងៃៗលក់ដាច់ត្រឹមតែ២ទៅ៣ដើមប៉ុណ្ណោះ ហើយក៏បានដឹកឆ្លងកាត់តាមខេត្តកំពង់ចាម កំពង់ធំ ពោធិ៍សាត់ បាត់ដំបង ដោយពួកគេក៏ហួសទៅទិញកូនឈើមួយចំនួនពីក្រុងប៉ោយប៉ែត ខេត្តបន្ទាយមានជ័យ រួចលើកដើរលក់បន្តទៀតផងដែរ ។
ពួកគាត់ត្អូញត្អែរថា មុខរបរមួយនេះ ពិតជាមានការលំបាកណាស់ ខណៈពេលបើកបរម៉ូតូលក់ដូរពីភូមិមួយទៅភូមិមួយ អត់សូវមានអ្នកទិញយកទៅដាំនោះទេ លុះធ្វើដំណើរលក់ដូររហូតដល់ពេលល្ងាច ទើបនាំគ្នាសម្រាកដាំបាយធ្វើម្ហូបទទួលទានជួបជុំគ្នា ដោយសុំវត្ត និងសាលាឃុំ-សង្កាត់ស្នាក់នៅ លុះដល់ពេលព្រឹកទើបបន្តដំណើរទៅមុខទៀត លុះដល់ពេលលក់ដាច់អស់ក្នុងរយ:ពេល២ទៅ៣ខែ ទើបចូលទៅលេងផ្ទះម្តង ដើម្បីជួបជុំក្រុមគ្រួសារ ។
ពួកគេបញ្ជាក់ថា ការស្នាក់ក្នុងវត្តអារ៉ាម តាមភូមិនានា ជួនកាលក៏មានក្មេងទំនើងមកអុកឡុកនាពេលយប់ដែរ តែអត់មានការបង្កស្នាមរបួសនោះទេ ដោយសារពួកគេចេះសម្របសម្រួល ណាមួយគ្មានអ្វីនឹងឱ្យក្មេងទំនើងទាំងនោះឡើយ ។
ជួនកាលទៀត បើសិនជាអត់មានកន្លែងចងអង្រឹងស្នាក់នៅទេ ពួកគេនាំគ្នាចងអង្រឹងដេកនៅលើរ៉ឺម៉ក លុះពេលភ្លៀងម្តងៗ បណ្តាលឱ្យទទឹកជោកទាំងយប់ ដេកមិនបានស្កប់ស្កល់នោះឡើយ ។ ពួកគេ ក៏មានសំណូមពរឱ្យប្រជាពលរដ្ឋរស់នៅតាមភូមិនានាក្នុងខេត្តប៉ៃលិន ក៏ដូចជាប្រជាពលរដ្ឋនៅទូទាំងប្រទេស ជួយទិញកូនឈើហូបផ្លែ និងផ្ការបស់ពួកគេយកទៅដាំផង ដើម្បីបានប្រយោជន៍ និងលំអគេហដ្ឋានឱ្យកាន់តែស្រស់បំព្រងផងដែរ ៕
ចែករំលែកព័តមាននេះ