ខេត្តមណ្ឌលគិរី ៖ ស្ពានយោលដ៏សំខាន់សម្រាប់អ្នកភូមិជាង៣០០គ្រួសារ ឆ្លងកាត់រាល់ថ្ងៃ ត្រូវទឹកជំនន់កួចដាច់បាក់ហូរទៅតាមទឹក នាវេលាម៉ោង៧ និង៣០នាទីព្រឹកថ្ងៃទី១២ វិច្ឆិកា នេះ ។
លោក យន់ សារ៉ោម ប្រធានមន្ទីរអភិវឌ្ឍន៍ជនបទខេត្តមណ្ឌលគិរីបានឲ្យដឹងថា ដោយសារមានភ្លៀងធ្លាក់ជាបន្តបន្ទាប់ជាច្រើនថ្ងៃ ធ្វើឲ្យទឹកអូរច្បារបានហក់ឡើងយ៉ាងគំហុក ដោយគិតត្រឹមម៉ោង៦ និង៣០នាទីព្រឹកថ្ងៃទី១២ កម្ពស់ទឹកនៅលើស្ពានយោលប្រមាណ២ម៉ែត្រ ហើយបន្តឡើងរហូតដល់ម៉ោងជាង៧ព្រឹកថ្ងៃដដែល ទឹកជន់ខ្លាំងពេកក៏ហូរកួចនាំយកស្ពានបាក់ទាំងស្រុងតែម្តង។
លោកប្រធានមន្ទីរបន្តថា ស្ពានយោលមួយខ្សែនេះ មន្ទីរអភិវឌ្ឍន៍ជនបទខេត្តមណ្ឌលគិរីបានសាងសង់កាលពីឆ្នាំ២០១៦ និងដាក់ឲ្យប្រើប្រាស់នាចុងឆ្នាំដដែល ដោយវាមានទំហំទទឹងពីរម៉ែត្រ បណ្តោយ៨០ម៉ែត្រ បម្រើដល់អ្នករស់នៅភូមិជីក្លប ឃុំសុខសាន្ត ស្រុកកោះញែក ប្រមាណ៣០០គ្រួសារធ្វើដំណើរឆ្លងកាត់ជារៀងរាល់ថ្ងៃ ពោលគឺវាជាស្ពានតែមួយគត់សម្រាប់ចេញចូលភូមិនេះបាន។មិនត្រឹមតែប៉ុនណោះនៅតាមផ្លូវលំជាច្រើនក្នុងភូមិក៏មានទឹកហូរដាក់ជាអន្លើៗដែរ។
ឯកឧត្តម ស្វាយ សំអ៊ាង អភិបាលខេត្តមណ្ឌលគិរី បានបញ្ជាក់នៅព្រឹកថ្ងៃទី១២ថា ចំពោះករណីទឹកភ្លៀងជននៅតាមដងអូរច្បារក្នុងឃុំសុខសាន ស្រុកកោះញែក កាលពីយប់មិញនេះ(ថ្ងៃទី១១)បានបណ្តាលឱ្យទឹកឡើងតាមដងអូរខ្លាំងនិងលេចស្ពានយោលមួយកន្លែង ហើយព្រឹកមិញនេះ(ថ្ងៃទី១២)បានបណ្តាលឱ្យស្ពាននោះបានដាច់ ។ ករណីនេះខ្ញុំបានបញ្ជាឱ្យកម្លាំងនិងអាជ្ញាធរចុះអន្តរាគមន៍ទាំងពីរយប់មិញ តែដោយសារទឹកហូរបុកខ្លាំងមិនអាចការពារបាន។ កម្លាំងអាជ្ញាធរនិងពិនិត្យអន្តរាគមន៍នៅកន្លែងផ្សេងៗទៀតដើម្បីដោះស្រាយបញ្ហានេះ។
ជុំវិញករណីនេះ ឯកឧត្តមអភិបាលខេត្តបានផ្តាំផ្ញើដល់បងប្អូនប្រជាពលរដ្ឋត្រូវបង្កើនការប្រុងប្រយ័ត្ន ជាពិសេស អ្នកមានកូនតូចៗមិនត្រូវបណ្តោយឲ្យលេងទឹកដាច់ខាត និងត្រូវការពារអនាម័យសុខភាព ព្រោះពេលនេះអាជ្ញាធរកំពុងចាត់វិធានការជួយសង្គ្រោះជាបន្ទាន់ហើយ ។
ចែករំលែកព័តមាននេះ