ខេត្តបន្ទាយមានជ័យ ៖ បុរសម្នាក់បានបាត់បង់ជីវិតភ្លាមៗនៅនឹងកន្លែងកើតហេតុ ខណៈពេលជួបគ្រោះថ្នាក់ចរាចរណ៍រវាងម៉ូតូបុកជាមួយរថយន្ត ។ ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៦និង៣០នាទីយប់ថ្ងៃទី១០ខែវិច្ឆិកា ឆ្នាំ២០២០ នៅលើកំណាត់ផ្លូវជាតិលេខ៥៦A ចម្ងាយ១.០០០ម៉ែត្រ ខាងជើងភូមិទ្រាស…
ខេត្តបន្ទាយមានជ័យ ៖ បុរសម្នាក់បានបាត់បង់ជីវិតភ្លាមៗនៅនឹងកន្លែងកើតហេតុ ខណៈពេលជួបគ្រោះថ្នាក់ចរាចរណ៍រវាងម៉ូតូបុកជាមួយរថយន្ត ។
ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៦និង៣០នាទីយប់ថ្ងៃទី១០ខែវិច្ឆិកា ឆ្នាំ២០២០ នៅលើកំណាត់ផ្លូវជាតិលេខ៥៦A ចម្ងាយ១.០០០ម៉ែត្រ ខាងជើងភូមិទ្រាស ស្ថិតក្នុងភូមិទ្រាស ឃុំទ្រាស ស្រុកស្វាយចេក ខេត្តបន្ទាយមានជ័យ ។
លោកវរសេនីយ៍ឯកជា ស្លូញ អធិការនគរបាល ស្រុកស្វាយចេក បានឲ្យដឹងថា ជនរងគ្រោះដែលបាត់បង់ជីវិតឈ្មោះ ឈុន រដ្ឋា ភេទប្រុស អាយុ៣២ឆ្នាំ រស់នៅភូមិស្វាយ ឃុំថ្មពួក ស្រុកថ្មពួកខេត្ត បន្ទាយមានជ័យ ជាអ្នកបើកបរម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ប.មានជ័យ 1N.1464 ។
លោកអធិការស្រុកស្វាយចេក បានឲ្យដឹងទៀតថា មុនពេលកើតហេតុ ជនរងគ្រោះបានបើកម៉ូតូក្នុងទិសដៅពីត្បូងទៅជើងក្នុងល្បឿនលឿន លុះមកដល់ចំណុចកើតហេតុខាងលើដែលជាចំណុចផ្លូវកោងបានជ្រុលចូលខាងស្តាំផ្លូវរថយន្ត ហើយក៏ត្រូវរថយន្តមួយគ្រឿងម៉ាកកាមម៉ារី ពណ៌សំបកឪឡឹក ស៊េរីឆ្នាំ៩៥ ពាក់ផ្លាកលេខ សៀមរាប 2A-1458 បើកបរបញ្ច្រាសទិសគ្នាពីជើងទៅត្បូង បុកបណ្តាលឲ្យអ្នកបើកបរម៉ូតូបាត់បង់ជីវិតភ្លាមៗនៅនឹងកន្លែង ចំណែកអ្នកបើកបររថយន្ត មិនស្គាល់អត្តសញ្ញាណរត់គេចខ្លួនបាត់ ។
លោកអធិការនគរបាលស្រុកស្វាយចេកបានបញ្ជាក់ថា ក្រោយពីកើតហេតុកម្លាំងនគរបាលជំនាញបានចុះទៅពិនិត្យដល់កន្លែងកើតនិងធ្វើការត្រួតពិនិត្យរួចបានប្រគល់សពជូនក្រុមគ្រួសារចាត់ចែងយកទៅធ្វើបុណ្យតាមប្រពៃណី ចំណែកវត្ថុតាងយករក្សាទុកនៅអធិការដ្ឋាននគរ បាលស្រុកដើម្បីរកម្ចាស់រថយន្តមកដោះស្រាយតាមនិតិវិធីច្បាប់។
លោកអធិការនគរបាលស្រុកស្វាយចេកបានបញ្ជាក់ថា មូលហេតុដែលបង្កឲ្យកើតមានគ្រោះថ្នាក់ខាងលើនេះ គឺអ្នកបើកបរម៉ូតូមានល្បឿនលឿន មិនប្រកាន់ស្តាំ លុះធ្វើដំណើរដល់ចំណុចកើតហេតុដែលជាកន្លែងផ្លូវកោង ក៏កើតមានគ្រោះថ្នាក់បែបនេះតែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ