ខេត្តក្រចេះ ៖ ក្នុងឱកាសអញ្ជើញជាតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ក្នុងពិធីសំណេះសំណាល និងចែកអំណោយជូនប្រជាពលរដ្ឋរងគ្រោះដោយទឹកជំនន់ចំនួន ២,៣៧២គ្រួសារ នៅក្នុងខេត្តក្រចេះ…
ខេត្តក្រចេះ ៖ ក្នុងឱកាសអញ្ជើញជាតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ក្នុងពិធីសំណេះសំណាល និងចែកអំណោយជូនប្រជាពលរដ្ឋរងគ្រោះដោយទឹកជំនន់ចំនួន ២,៣៧២គ្រួសារ នៅក្នុងខេត្តក្រចេះ នាថ្ងៃទី១១ ខែវិច្ឆិកា ឆ្នាំ២០២០ នេះលោក ហ៊ុន ម៉ាណែត បានលើកឡើងថា គោលការណ៍ដឹកនាំប្រទេសរបស់ សម្តេចតេជោ នាយករដ្ឋមន្ត្រី គឺផ្តោតលើការជួយសង្គ្រោះប្រជាពលរដ្ឋដោយជាក់ស្តែង និងប្រកបដោយនិរន្តរភាព។ គោលនយោបាយនេះ គឺត្រូវបានអនុវត្តជាប់រហូតមកក្នុងរយៈកាលកន្លងមកនេះ ហើយនឹងបន្តអនុវត្តជាហូរហែជាប់ទៅមុខទៀត។
ទីណាមានការលំបាក ពេលណាមានការលំបាក គឺមានការជួយសង្គ្រោះរបស់សម្តេចតេជោ នាយករដ្ឋមន្ត្រី មានការយកចិត្តទុកដាក់របស់ក្រុមការងារថ្នាក់ជាតិ និងមានការចុះជួយផ្ទាល់របស់អាជ្ញាធរដែនដីគ្រប់លំដាប់ថ្នាក់ ដោយគ្មានការរើសអើងអ្វីទាំងអស់។ នេះគឺជាភាពជាក់ស្តែង នៃការខិតខំប្រឹងប្រែង ដោយបានអនុវត្តពិតប្រាកដ និងមិនមែនជាការសន្យា ដោយខុសពីអ្នកនយោបាយមួយចំនួន ដែលមិនខ្វល់ខ្វាយអើពើ អំពីសុខទុក្ខរាស្ត្រ ហើយអ្វីដែលពួកគេបានធ្វើ គឺការញុះញង់បំបែកបំបាក់មិនរើសពេល មិនរើសវេលា សូម្បីតែក្នុងពេលរាស្ត្រមានទុក្ខនៅក្នុងគ្រោះទឹកជំនន់ដូចពេលនេះ ធ្វើយ៉ាងណាបង្កចលាចល និងអសន្តិសុខ ដើម្បីបម្រើឱ្យមហិច្ឆតានយោបាយរបស់ពួកគេ។
លោក ហ៊ុន ម៉ាណែត ក៏បានលើកពីព្រឹត្តិការណ៍ក្នុងឆ្នាំ២០២០នេះ នៅលើពិភពលោកទាំងមូល ជាពិសេសតំបន់អាស៊ាន គឺប្រទេសភាគច្រើនបានរងគ្រោះដោយទឹកជំនន់។ កម្ពុជាយើងក៏ដូចគ្នា គឺយើងមិនអាចគ្រប់គ្រងគ្រោះធម្មជាតិបានទេ ដោយយើងរងគ្រោះខ្លាំងនៅភាគខាងលិច បន្តមករាជធានីភ្នំពេញ ហើយឥឡូវភាគខាងកើតក៏បានរងគ្រោះដូចគ្នា។ ប៉ុន្តែអ្វីដែលយើងបានធ្វើ គឺការរួបរួមគ្នាដើម្បីជួយគ្នាទៅវិញទៅមកក្នុងគ្រាដ៏លំបាកនេះ។ ចាប់តាំងពីដើមទីនៃគ្រោះទឹកជំនន់មក សម្តេចតេជោ នាយករដ្ឋមន្ត្រី បានខិតខំអន្តរាគមន៍ដោះស្រាយទាំងក្នុងប្រតិបត្តិការសង្គ្រោះ និងការស្តារឡើងវិញ នៅគ្រប់តំបន់រងគ្រោះនៅទូទាំងប្រទេសទាំងអស់។
ទន្ទឹមនឹងនេះ សម្តេចតេជោ នាយករដ្ឋមន្ត្រី ក៏បានអំពាវនាវប្រមូលកៀងគរប្រភពធនធានពីគ្រប់យន្តការ ទាំងយន្តការរាជរដ្ឋាភិបាល និងយន្តការសប្បុរសជនក្នុង និងក្រៅប្រទេស ចូលរួមក្នុងចលនាសាមគ្គីមនុស្សធម៌នេះ ដោយទទួលបានការគាំទ្រ និងការចូលរួមជាច្រើន។ សប្បុរសជន តែងជួយគាំទ្រដល់អ្នកជួយពិត ព្រោះពួកគាត់ឃើញប្រជាពលរដ្ឋដែលកំពុងទទួលរងការលំបាកពិតផងដែរនោះ។ សូមបញ្ជាក់ថា ពិធីសំណេះសំណាល និងចែកអំណោយជូនប្រជាពលរដ្ឋរងគ្រោះដោយទឹកជំនន់ក្នុងខេត្តក្រចេះ សរុបមានចំនួន ២,៣៧២គ្រួសារ ដោយក្នុងមួយគ្រួសារទទួលបាន ស្រូវពូជ១០០គីឡូក្រាម និងថវិកា១០ម៉ឺនរៀល៕ ដោយ ៖ សុខ សារ៉ាយ
ចែករំលែកព័តមាននេះ