ខេត្តកណ្ដាល ៖ ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ ឈឿន សុចិត្រ ស្នងការនគរបាលខេត្តកណ្ដាល ក្នុងប្រតិបត្តិការបង្ក្រាបបទល្មើសគ្រឿងញៀន នៅចំណុច ភូមិថ្កុល ឃុំត្រើយស្លា…
ខេត្តកណ្ដាល ៖ ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ ឈឿន សុចិត្រ ស្នងការនគរបាលខេត្តកណ្ដាល ក្នុងប្រតិបត្តិការបង្ក្រាបបទល្មើសគ្រឿងញៀន នៅចំណុច ភូមិថ្កុល ឃុំត្រើយស្លា ស្រុកស្អាង ខេត្តកណ្ដាល អស់រយៈពេលជាច្រើនម៉ោង ជាមួយនឹងការ រងការប្រហារបាញ់ពីជនសង្ស័យជាមេក្លោងគ្រឿងញៀន មកលើសមត្ថកិច្ច នៅទីបំផុត នាវេលាម៉ោង២ រំលងអាធ្រាតឈានចូលថ្ងៃទី១១ ខែវិច្ឆិកា ឆ្នាំ២០២០ សមត្ថកិច្ចបានឃាត់ខ្លួនជនសង្ស័យបានសម្រេច ។
សូមបញ្ជាក់ថា មេខ្លោងគ្រឿងញៀន ឈ្មោះ លៀន ទិត្យ ត្រូវបានកម្លាំងសមត្ថកិច្ច នគរបាលស្រុកស្អាង សហការជាមួយកម្លាំងនគរបាលប្រឆាំងបទល្មើសគ្រឿងញៀន និងនគរបាលព្រហ្មទណ្ឌខេត្ត ក្រោមការដឹកនាំបញ្ជាផ្ទាល់ ពីលោកឧត្តមសេនីយ៍ទោ ឈឿន សុចិត្រ ស្នងការនគរបាលខេត្តកណ្ដាល ប្រកបដោយភាពឈ្លាសវៃ និងការទទួលខុសត្រូវ ធ្វើការឡោមព័ទ្ធ ជនសង្ស័យជាមេខ្លោងបទល្មើសគ្រឿងញៀន អស់រយៈពេលជាច្រើនម៉ោង ក៏ឈានបានរំដោះប្រពន្ធជនសង្ស័យក្នុងដំណាក់កាលដំបូង ។
ក្រោយមក អភិបាល នៃគណៈអភិបាលខេត្តកណ្ដាល, អភិបាលស្រុកស្អាង និងលោកឧត្តមសេនីយ៍ទោ ឈឿន សុចិត្ត បានប្រើវិធានការ លួងលោម ឲ្យជនសង្ស័យ ចូលខ្លួនសារភាព ជាមួយនឹងការលើកទឹកចិត្ត ដោយមិនចាប់កំហុស ឬផ្ដន្ទាទោស ដែលជាវិធានការ ឲ្យជនសង្ស័យចូលខ្លួនឲ្យសមត្ថកិច្ចចាប់ខ្លួន ។
បន្ទាប់ពីមានករណី ផ្ទុះអាវុធជាច្រើនគ្រាប់ បង្កឡើងដោយជនសង្ស័យ មេខ្លោងគ្រឿងញៀន បាញ់ជាច្រើនគ្រាប់ ដោយកាំភ្លើងអាកា មកលើសមត្ថកិច្ចនោះ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល ដែលបានដឹកនាំកម្លាំង ចុះដោយផ្ទាល់ ក្នុងប្រតិបត្តិការនេះ បានប្រើយុទ្ធសាស្ត្រ ឲ្យកម្លាំងធ្វើការដកថយ និងវិធានការការពារខ្លួន ។ ដំណាក់ការដំបូង បានរំដោះប្រពន្ធជនសង្ស័យ ពីទីតាំងកន្លែងពួកគេលាក់ខ្លួន ដើម្បីបញ្ចៀសពីការយកប្រពន្ធធ្វើជាចំណាប់ខ្មាំង គំរាមលើសមត្ថកិច្ច ក្នុងប្រតិបត្តិការ ។
លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានថ្លែងប្រាប់ អង្គភាព«កោះសន្តិភាព»ថា បន្ទាប់ពីរំដោះ និងឃាត់ខ្លួនប្រពន្ធជនសង្ស័យ ជាមេក្លោងគ្រឿងញៀន ហើយរកវិធានការឲ្យកូនជនសង្ស័យ ចាកចេញពីកន្លែងផ្ទះមេខ្លោងគ្រឿងញៀនលាក់ខ្លួន កម្លាំងរបស់លោក ក៏បានប្រឹងវិធានការ ជម្លៀសកូនជនសង្ស័យចេញពីទីតាំងកើតហេតុ ទៅកាន់ផ្ទះរបស់ឪពុកម្ដាយជនសង្ស័យ ។ ក្នុងអំឡុងពេលនោះ ជនសង្ស័យបានប្រើអាវុធ AK47 កាត់ស្វ័យ១ដើម បាញ់ជាច្រើនគ្រាប់ មកលើសមត្ថកិច្ច គេក៏បានដុតផ្ទះដើម្បីជាការបំភ័ន្ត សមត្ថកិច្ចនរបាលរកវិធីគេចខ្លួន ។
ប៉ុន្តែជនសង្ស័យ បានចេញពីកន្លែងផ្ទះ ដែលបានដុតបំផ្លាញ រួចក៏មកសំងំលាក់ខ្លួន ក្នុងផ្ទះឪពុកម្ដាយរបស់គេ ។ បន្ទាប់ពីបានទទួលព័ត៌មាន ជាមួយនឹងការស្រាវជ្រាវ ដោយយកចិត្តទុកដាក់បំផុត ពីលោកស្នងការនគរបាលខេត្តកណ្ដាល ជនសង្ស័យជាមេក្លោងគ្រឿងញៀន ក៏ត្រូវបានឃាត់ខ្លួននៅវេលាម៉ោង២ រំលងអធ្រាត្រ ឈានចូលថ្ងៃទី១១ ខែវិច្ឆិកា ឆ្នាំ២០២០ តាមរយៈប្រើវិធានការ ចូលរួម ពីលោកអភិបាល នៃគណៈអភិបាលខេត្តកណ្ដាល និងអភិបាលស្រុកស្អាង ក៏បានទូរស័ព្ទទៅកាន់ជនសង្ស័យ ឲ្យប្រគល់អាវុធមកឲ្យអាជ្ញាធរនិងសមត្ថកិច្ច ជាមួយនឹងការធានា មិនឃាត់ខ្លួន មិនធ្វើការផ្ដន្ទាទោស ហើយអ្វីដែលជនសង្ស័យបានបាញ់មកលើសមត្ថកិច្ច ក៏មិនឱ្យមានការជាប់ទោសទណ្ឌ ។
ចំពោះការដុតផ្ទះ ក៏អាជ្ញាធរ និងសមត្ថកិច្ច ធានាជួសជុលធ្វើថ្មីវិញ ។ ក្នុងនោះ ក៏ឲ្យជនសង្ស័យប្រគល់អាវុធ នឹងចូលសារភាព ផ្ដល់ជារង្វាន់លើកទឹកចិត្តចំនួន ៥០០ដុល្លារ ។ ដោយឡែក ប្រពន្ធជនសង្ស័យ ដែលសមត្ថកិច្ចរំដោះយក និងឃាត់ខ្លួន ក៏បានព្យាយាមទូរស័ព្ទ ទៅកាន់ប្ដី ដែលជាជនសង្ស័យ អោយចូលសារភាព និងបញ្ឈប់សកម្មភាព ការប្រើប្រាស់អាវុធបាញ់មកលើសមត្ថកិច្ចជាបន្តទៀតអី ។
ទីបំផុត ជនសង្ស័យជាមេក្លោងគ្រឿងញៀន ត្រូវបានសមត្ថកិច្ចឃាត់ខ្លួន បានដោយជោគជ័យ និងនាំខ្លួនមកកាន់ ស្នងការនគរបាលខេត្តកណ្ដាល ទាំងកណ្ដាលអាធ្រាត ដើម្បីធ្វើកំណត់ហេតុ ស្ដាប់ចម្លើយ នឹងបន្តធ្វើការស៊ើបអង្កេតស្រាវជ្រាវរកក្រុមជនសង្ស័យ ដែលបានពាក់ព័ន្ធក្នុងបទល្មើសគ្រឿងញៀន ។
សូមជម្រាបថា មុនពេលឃាត់ខ្លួនជនសង្ស័យជាមេក្លោងគ្រឿងញៀន សមត្ថកិច្ចបានប្រើគ្រប់វិធានការ ដើម្បីឲ្យជនសង្ស័យចូលខ្លួនសារភាព ប៉ុន្តែជនល្មើសប្រើប្រាស់កំភ្លើងអាកាជាមធ្យោបាយ បាញ់មកលើសមត្ថកិច្ច ជាច្រើនលើក ដើម្បីរំដោះខ្លួន ក្នុងនោះសមត្ថកិច្ចបានបាញ់ជនដៃដល់បណ្ដាលឲ្យរបួសភ្លៅខាងស្ដាំ ផងដែរ ។ បច្ចុប្បន្ន ជនសង្ស័យ កំពុងសង្គ្រោះបន្ទាន់ នៅមន្ទីរពេទ្យជ័យជំនះ ដោយសារតែជនសង្ស័យ ត្រូវរងរបួសជើងហូរឈាមមានសភាពស្លេកស្លាំង និងអស់កម្លាំងខ្លាំង ៕
បង្ក្រាបគ្រឿងញៀន ជនសង្ស័យមាន AK47 បាញ់មកលើសមត្ថកិច្ចកំពុងព័ទ្ធ គំរាមមិនឲ្យចូលចាប់
ចែករំលែកព័តមាននេះ