រាជធានីភ្នំពេញ ៖ យោងតាមការប្រកាស កាលពីថ្ងៃទី៤ ខែវិច្ឆិកា ឆ្នាំ២០២០កន្លងទៅដោយក្រសួងការបរទេសឱ្យដឹងថា ប្រមុខការទូតហុងគ្រី ដែលបានធ្វើទស្សនកិច្ចការងារនៅកម្ពុជា ត្រូវបានរកឃើញមានជំងឺកូវីដ១៩ ខណៈបានទៅដល់ប្រទេសថៃ ។
ទន្ទឹមនឹងនេះដែរ រាជរដ្ឋាភិបាលកម្ពុជា បានសម្រេចឲ្យថ្នាក់ដឹកនាំ និងមន្ត្រីទាំងអស់ដែលជួបនិងប្រាស្រ័យទាក់ទងផ្ទាល់ជាមួយប្រតិភូ ត្រូវធ្វើចត្តាឡីស័ក ដែលមកដល់ថ្ងៃទី៦ វិច្ឆិកា មានចំនួនជាង៨០០នាក់ ហើយត្រូវធ្វើចត្តាឡីស័ក ។
ជាមួយនឹងការបង្ការទប់ស្កាត់ការឆ្លងជំងឺនេះ កងប្រតិបត្តិការរុករក និងសង្គ្រោះ៧១១ នៃកងពលតូចលេខ៧០ បានចេញទៅបាញ់ថ្នាំសម្លាប់មេរោគ នៅអគារមិត្តភាពទីស្តីការគណ:រដ្ឋមន្ត្រី ដើម្បីប្រយុទ្ធប្រឆាំងនឹងជំងឺកូវីដ១៩ ហើយនឹងបន្តបាញ់ថ្នាំក្នុងវិមានសន្តិភាព ដែលជាកន្លែងធ្វើពិធីចុះហត្ថលេខារវាងកម្ពុជានិងហុងគ្រីផងដែរ ។
ប្រតិបត្តិការនេះធ្វើឡើងតាមបទបញ្ជាផ្ទាល់ពីឧត្តមសេនីយ៍ ហ៊ុន ម៉ាណែត មេបញ្ជាការកងទ័ពជើងគោក និងលោក ឧត្ដមសេនីយ៍ឯក ម៉ៅ សុផាន់ មេបញ្ជាការកងពលតូចលេខ៧០ បានបញ្ជូនកងប្រតិបត្តិការរុករក និងសង្គ្រោះ៧១១ចុះទៅបាញ់ថ្នាំសម្លាប់មេរោគនៅក្នុងអគារទីស្តីការគណៈរដ្ឋមន្ត្រី ក្រោយពីរដ្ឋមន្ត្រីហុងគ្រីដែលមានជំនួប ជាមួយថ្នាក់ដឹកនាំមួយចំនួននៅទីនោះ បានចាកចេញពីកម្ពុជានិងត្រូវបានធ្វើតេស្តរកឃើញថាមានផ្ទុកមេរោគកូវីដ១៩ពេលទៅដល់ទីក្រុងបាងកក ។
សូមជំរាបថា ការបាញ់ថ្នាំសម្លាប់មេរោគនេះ បានដឹកនាំដោយលោកឧត្តមសេនីយ៍ទោ សូយ ណារិទ្ធ មេបញ្ជាការរងកងពលតូចលេខ៧០ ទទួលការងារសង្គ្រោះ កាលពីយប់ថ្ងៃទី៤ ខែវិច្ឆិកា ឆ្នាំ២០២០ ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ