ខេត្តត្បូងឃ្មុំ ៖ ប្រជាកសិកររស់នៅតាមដងទន្លេមេគង្គត្រើយខាងកើត ក្នុងនោះមាន ស្រុកក្រូចឆ្មារ និងស្រុកត្បូងឃ្មុំ បាននាំគ្នាដាំដុះដំណាំពោតក្រហមច្រើនជាងតាមបណ្ដាស្រុកផ្សេងទៀត នៅក្នុងខេត្តត្បូងឃ្មុំ។ តែដោយឆ្នាំនេះ ទឹកទន្លេមេគង្គមិនបានឡើងមកជន់លិចតាមបឹងបួនានាជាហេតុ…
ខេត្តត្បូងឃ្មុំ ៖ ប្រជាកសិកររស់នៅតាមដងទន្លេមេគង្គត្រើយខាងកើត ក្នុងនោះមាន ស្រុកក្រូចឆ្មារ និងស្រុកត្បូងឃ្មុំ បាននាំគ្នាដាំដុះដំណាំពោតក្រហមច្រើនជាងតាមបណ្ដាស្រុកផ្សេងទៀត នៅក្នុងខេត្តត្បូងឃ្មុំ។ តែដោយឆ្នាំនេះ ទឹកទន្លេមេគង្គមិនបានឡើងមកជន់លិចតាមបឹងបួនានាជាហេតុ បណ្ដាលឱ្យកើតសត្វល្អិត និងហ្វូងកណ្ដុរ កាត់ស៊ីបំផ្លាញផលដំណាំរបស់កសិករដែលដាំដុះបានជាមួយនោះ ពួកគាត់ក៏ស្នើសុំឲ្យស្ថាប័នជំនាញមន្ទីរកសិកម្មបញ្ជូនក្រុមអ្នកបច្ចេកទេស មកជួយកម្ចាត់ហ្វូងកណ្ដុរទាំងនោះ។
លោកតា មួង យាន អាយុ៨៥ឆ្នាំ រស់នៅភូមិរកាធំ ឃុំជីរោទិ៍ទី១ ស្រុកត្បូងឃ្មុំ មានប្រសាសន៍ឲ្យដឹងនៅព្រឹកថ្ងៃទី៦ វិច្ឆិកា ឆ្នាំ២០២០ថា ចាប់តាំងពីក្រោយថ្ងៃរំដោះ០៧មករា១៩៧៩ គាត់បានដាំដុះដំណាំនៅលើដីចម្ការ ដោយដំណាំរួមផ្សំមាន ៖ ត្រឡាច ប៉េងប៉ោះ និងពោតច្រើនជាងគេ ដើម្បីលក់ឱ្យឈ្មួញ យកលុយមកដោះស្រាយជីវភាពគ្រួសារ។ហើយគាត់នៅតែបន្តចាប់យកអាជីពអ្នកចម្ការ រហូតមកដល់សព្វថ្ងៃនេះ។ តែនៅឆ្នាំ២០២០ នេះ ទឹកទន្លេមេគង្គមិនបានឡើងមកដល់ដីចំការនៅខាងក្រោយភូមិនោះទេ។
លោកតាវ័យ៨៥ឆ្នាំ មានប្រសាសន៍បន្តថា គាត់បានជួលគេភ្ជួររាស់ដាំពោតក្រហម ពេលដែលចេញផ្លែត្រូវបានពពួកហ្វូងកណ្ដុរ នាំគ្នាមកកាត់ស៊ីបំផ្លាញផលដំណាំ ដែលបានដាំដុះបណ្ដាលឱ្យរងការខូចខាតជាច្រើន រហូតដល់កាប់ចោល និងបានដាំជាលើកទី២ ដែលមកដល់ពេលនេះ ដើមពោតចេញបានពីរថ្នាំងដៃហើយ។ លុះពេលដែលគាត់ដើរមកមើលឃើញថា មិនមានការបំផ្លាញដោយសត្វកណ្ដុរបន្តទៀតនោះទេ។
ទោះជាបែបនេះក្តី គាត់នៅតែព្រួយបារម្ភក្រែងពោតធំបន្តិចទៀត អាចនឹងត្រូវកណ្ដុរមកស៊ីកាត់ដើមបន្តទៀត ហើយផ្ទៃដីដែលដាំពោតក្រហមនេះ គឺមានទំហំជាង១ហិកតា ចំណែកចំការមួយចំនួនទៀត ក៏បានបែងចែកឲ្យកូន ដើម្បីដាំពោត និងដំណាំរួមផ្សំផ្សេងៗទៀតក្នុងការផ្គត់ផ្គង់ជីវភាពគ្រួសារ។
លោកតាបានបញ្ជាក់ថា នៅឆ្នាំនេះ គាត់អាចនឹងត្រូវខ្វះខាត ដោយសារតែការកើតមានពពួកសត្វល្អិតស៊ីបំផ្លាញផលដំណាំរបស់គាត់ជាច្រើន ដូច្នេះថវិកាដែលប្រមូលបានមកពីលក់កូនក្រហម នឹងមិនអាចដោះស្រាយជីវភាពប្រចាំឆ្នាំឲ្យបានគ្រប់គ្រាន់នោះទេ ។ ជាមួយគ្នានោះ លោកតាក៏បានសំណូមពរដល់អាជ្ញាធរដែនដី ក៏ដូចជាស្ថាប័នជំនាញមន្ទីរកសិកម្មខេត្តត្បូងឃ្មុំ សូមមេត្តាជួយចាត់បញ្ជូនក្រុមអ្នកបច្ចេកទេស មកកំចាត់ហ្វូងកណ្ដុរដែលស៊ីបំផ្លាញផលដំណាំរបស់ប្រជាកសិករនៅភូមិរកាធំផង។
លោក ហេង ពិសិដ្ឋ ប្រធានមន្ទីរកសិកម្មរុក្ខា ប្រមាញ់ និងនេសាទខេត្តត្បូងឃ្មុំ បានប្រាប់ឲ្យដឹងនៅរសៀលថ្ងៃទី០៦ វិច្ឆិកានេះថា នៅក្នុងខេត្តត្បូងឃ្មុំ ស្រុកដែលដាំដំណាំពោតក្រហមច្រើនជាងគេ គឺមានតែពីរប៉ុណ្ណោះ គឺស្រុកក្រូចឆ្មារ និងស្រុកត្បូងឃ្មុំ ។ កាលពីឆ្នាំ២០១៩ កន្លងទៅ ផ្ទៃដីដាំពោតក្នុងរដូវប្រាំងសរុបប្រមាណ៦.០០០ហិកតា ហើយទិន្នផលដែលប្រមូលបានត្រូវក្រុមហ៊ុនផលិតចំណីសត្វចុះមកប្រមូលទិញ ឬប្រជាកសិករដឹកយកទៅលក់ដោយខ្លួនឯង។
លោកប្រធានមន្ទីរកសិកម្មខេត្ត បន្តឲ្យដឹងថា ដោយសារតែនៅឆ្នាំ២០២០ នេះ ទឹកទន្លេមិនបានឡើងមកជន់លិចតាមបឹងបួរ និងដីចំការរបស់ប្រជាកសិករ កត្តានេះអាចនឹងកើតមានពពួកសត្វល្អិតស៊ីបំផ្លាញផលដំណាំរបស់កសិករច្រើន។
បើតាមជំនាញរបស់កសិកម្មដូចជា កណ្ដុរបានស៊ីបំផ្លាញដំណាំពោតរបស់លោកតានៅភូមិរកាធំវិធីសាស្ត្រល្អ គឺត្រូវតែចងជាសហគមន៍យ៉ាងហោចណាស់ឱ្យបាន១០គ្រួសារ កសិករទាំងអស់ត្រូវតែប្រមូលផ្ដុំគ្នាបើកយុទ្ធនាការចុះបាញ់ថ្នាំ ដើម្បីសម្លា.ប់កណ្ដុរ ឬក៏ដាក់អង្គប់ ប្រសិនមានកណ្ដុរមួយទៅពីរក្បាលងា.ប់នោះ ហ្វូងកណ្ដុរទាំងនេះនឹងនាំគ្នារត់ទៅរកកន្លែងផ្សេងទៀតដើម្បីនៅជាមិនខាន។ ហើយរហូតមកដល់ពេលនេះ ដំណាំពោតដែលកសិករដាំដុះបាន នៅក្នុងខេត្តត្បូងឃ្មុំ នៅមិនទាន់មានទិន្នន័យសរុបច្បាស់លាស់នៅឡើយទេ៕
ចែករំលែកព័តមាននេះ