ខេត្តព្រះសីហនុ ៖ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តកុងតឺន័រមួយគ្រឿង បុកប៉ះគ្នាជាមួយនឹងរថយន្តតាកូម៉ា មួយគ្រឿងទៀត បណ្តាលឲ្យមានបុរសម្នាក់ជាព្រូរថយន្តកុងតឺន័រស្លាប់ និងអ្នកបើកបរថយន្តកុងតឺន័ររងរបួសធ្ងន់ នៅវេលាម៉ោងជាង០៩ព្រឹក ថ្ងៃទី០៤ ខែវិច្ឆិកា ២០២០នេះ នៅលើវិថីផែ ចំណុចកែងរ៉ារថភ្លើង ស្ថិតក្នុងភូម៣ សង្កាត់៣ ក្រុង/ខេត្តព្រះសីហនុ។
យោងតាមប្រភពសាក្សីដែលឃើញហេតុការណ៍បានឲ្យដឹងថា នៅមុនពេលកើតហេតុគេឃើញរថយន្តកុងតឺន័រមួយគ្រឿងពាក់ស្លាកលេខភ្នំពេញ 4A-5701 ពណ៌ស ចុះចំណោតក្នុងល្បឿនលឿន ក្រោយមកក៏បានជ្រុលទៅបុកនឹងរថយន្តតាកូម៉ាមួយគ្រឿងទៀត ក្នុងទិសដៅស្របគ្នាពីកើតទៅលិចបណ្ដាលឲ្យអូសរថយន្តទាំង២គ្រឿងក្រឡាប់ធ្លាក់ជ្រោះផ្ងាជើង។ ហេតុការណ៍នេះ បណ្ដាលបុរសម្នាក់ដែលជាអ្នកបើកបររថយន្តកុងតឺន័រនោះគឺរងរបួសធ្ងន់ និងម្នាក់ទៀតដែលជាព្រូបានស្លាប់ក្រោយពេលបញ្ជូនយកទៅដល់មន្ទីរពេទ្យ។
សមត្ថកិច្ចបានឲ្យដឹងថា តាមការសន្និដ្ឋានជាបឋម សង្ស័យថារថយន្តកុងតឺន័រនោះដាច់ហ្វ្រាំង ខណៈពេលដែលកំពុងតែបើកបរក្នុងស្ថានភាពផ្លូវចុះចំណោត រួចក៏ដាច់ហ្វ្រាំងបណ្ដាលឱ្យទៅបុកប៉ះនឹងរថយន្តតាកូម៉ាមួយគ្រឿងនោះទៀត តែសំណាងល្អភាគីខាងរថយន្តតាកូម៉ាគឺពុំមានមនុស្សរងរបួសទេ។ បច្ចុប្បន្នរថយន្តទាំងពីរគ្រឿងត្រូវបាននគរបាលចរាចរណ៍ផ្លូវគោកខេត្តព្រះសីហនុស្ទូចយកទៅរក្សាទុករង់ចាំការដោះស្រាយតាមនីតិវិធី៕ ដោយ ៖ ឈុន គឹមហៃ
ចែករំលែកព័តមាននេះ