ខេត្តកណ្តាល ៖ គេសង្កេតឃើញថា ករណីប្លន់ហាក់កំរើកឡើងវិញនាពេលបច្ចុប្បន្ន បន្ទាប់ពីមានករណីក្រុមចោរប្រដាប់ដោយដាវសាម៉ូរៃបានស្ទាក់កាប់ប្លន់យកម៉ូតូពីប្រជាពលរដ្ឋជាអ្នកធ្វើដំណើរបានដោយសុវត្ថិភាពនៅលើផ្លូវ២១ ជិតផ្ទះសំណាក់រស្មី៨៨ ក្រុងតាខ្មៅ ។
ហេតុការណ៌ខាងលើនេះបានកើតឡើងកាលពីវេលាម៉ោង១២និង២០នាទីរំលងអាធ្រាត្រថ្ងៃទី៤ ខែវិច្ឆិកា ឆ្នាំ២០២០ ចំណុចផ្លូវជាតិលេខ២១ជិតផ្ទះសំណាក់រស្មី៨៨ ភូមិទួលក្រសាំងសង្កាត់រកាខ្ពស់ ក្រុងតាខ្មៅ ខេត្តកណ្តាល។
ជនរងគ្រោះឈ្មោះតាវ ជ្រូ ភេទប្រុស អាយុ៣២ឆ្នាំ មុខរបរបុគ្គលិកក្រុមហ៊ុន ទីលំនៅបច្ចុប្បន្នភូមិពោធិ៍តាប៉ាង ឃុំស្វាយប្រទាល ស្រុកស្អាង ខេត្តកណ្តាល។ ជនរងគ្រោះមានរបួសស្នាម ត្រង់កដៃខាងឆ្វេង។ ចំណែកបុរសជាជនសង្ស័យ២នាក់ មិនស្គាល់អត្តសញ្ញាណ មានអាយុជាង២០ឆ្នាំ ។
បើតាមរបាយការណ៍របស់ស្នងការដ្ឋាននគរបាលខេត្តកណ្តាល បានបញ្ជាក់ថា មុនពេលកើតហេតុ ជនរងគ្រោះបានចូលរួមផឹកស៊ីជាមួយមិត្តភក្តិនៅកោះពេជ្រ លុះមកដល់វេលាម៉ោង៩យប់នាថ្ងៃទី៣ ខែវិច្ឆិកា ឆ្នាំ២០២០ ជនរងគ្រោះបានឈប់ផឹក ហើយជិះម៉ូតូតែម្នាក់ឯងត្រឡប់ទៅផ្ទះនៅឯភូមិពោធិ៍តាប៉ាង ឃុំស្វាយប្រទាល ស្រុកស្អាង ខេត្តកណ្តាល វិញ តែនៅពេលជិះមកដល់ម្តុំចាក់អង្រែលើ ត្រូវបានសមត្ថកិច្ចខណ្ឌមានជ័យ ដាក់កម្លាំងវាស់ជាតិអាល់កុល ហើយឃាត់ខ្លួនជនរងគ្រោះ ព្រមទាំងម៉ូតូយកទៅសាកសួរនៅប៉ុស្តិ៍ និងផាកពិន័យគាត់អស់លុយ៦ម៉ឺនរៀល។
តាមប្រភពខាងលើបានបន្តថា រហូតដល់វេលាម៉ោង១២និង៥នាទីរំលងអាធ្រាត្រឈានចូលថ្ងៃទី៤ វិច្ឆិកា ក៏បានអនុញ្ញាតឲ្យបុរសខាងលើយកម៉ូតូជិះត្រឡប់ទៅផ្ទះវិញ។ រហូតមកដល់វេលាកើតហេតុខាងលើ នៅពេលបុរសខាងលើជិះតាមផ្លូវ២១ ក្នុងភូមិទួលក្រសាំង សង្កាត់រកាខ្ពស់ ជិតដល់ផ្ទះសំណាក់រស្មី៨៨ មានម៉ូតូ១គ្រឿងជិះឌុបគ្នា២នាក់ភេទ ប្រុស អាយុជាង២០ឆ្នាំ រាងស្គម ជិះម៉ូតូមួយគ្រឿង ពណ៌ខ្មៅ មិនចាំស្លាកលេខ បានជិះមកកាក់ពីមុខម៉ូតូបុរសខាងលើឲ្យឈប់ ហើយបក្ខពួកជនសង្ស័យម្នាក់បានដកដាវសាម៉ូរៃ កាប់គាត់ចំត្រង់កដៃខាងឆ្វេង បណ្តាលឱ្យរយះដាច់សរសៃ រងរបួសស្នាមហូរឈាមយ៉ាងច្រើន ហើយក្រុមជនសង្ស័យបានដណ្តើមយកម៉ូតូរបស់បុរសរងគ្រោះ រួចនាំគ្នាជិះគេចខ្លួនទៅទិសខាងត្បូង បត់តាមផ្លូវថ្មី តាមផ្លូវសិត្បូ ទៅបាត់។
បច្ចុប្បន្នករណីខាងលើនេះ កម្លាំងយុត្តិធម៌ក្រុងតាខ្មៅនិងកម្លាំងជំនាញខេត្តសហការ កំពុងបន្តការ ស៊ើបអង្កេតស្រាវជ្រាវ ដើម្បីចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ