ខេត្តមណ្ឌលគិរី ៖ ដើម្បីការពារជម្លោះដីធ្លីកើតមានមិនចេះចប់ អភិបាលខេត្តមណ្ឌលគិរីបានបញ្ជាដល់អាជ្ញាធរមូលដ្ឋាន ជាពិសេសមេឃុំ-ចៅសង្កាត់ និងអភិបាលក្រុងស្រុកទាំងអស់ កុំទទួលស្គាល់លិខិតទាំងឡាយណាដែលមិនមានគំរូប្លង់ដីច្បាស់លាស់ពីមន្ត្រីជំនាញ ចៀសវាងដីមួយកន្លែងមានប្លង់កាន់កាប់ស្ទួនគ្នានាំជាបញ្ហាដោះស្រាយមិនចេញ។
ឯកឧត្តម ស្វាយ សំអ៊ាង អភិបាលខេត្តមណ្ឌលគិរី នាព្រឹកថ្ងៃទី០២ វិច្ឆិកា ២០២០ បានមានប្រសាសន៍ក្នុងកិច្ចប្រជុំពិនិត្យឡើងវិញ និងពង្រឹងអនុវត្តតួនាទីភារកិច្ចក្នុងនាមគណៈបញ្ជាការឯកភាពស្រុក និងផ្សព្វផ្សាយសារាចរណែនាំ លិខិតបទដ្ឋានគតិយុត្តិនានាពាក់ព័ន្ធនឹងវិធានការការពារទប់ស្កាត់ បង្ក្រាបបទល្មើសធនធានធម្មជាតិ និងបទល្មើសផ្សេងៗទៀតថា ដោយសារបច្ចុប្បន្នតម្លៃដីនៅខេត្តមណ្ឌលគិរី ជាពិសេសដីនៅតំបន់ស្រុកអូររាំងបានឡើងថ្លៃខ្ពស់ ធ្វើឲ្យមានក្រុមជនឆ្លៀតឱកាសកែនប្រជាពលរដ្ឋចូលកាន់កាប់ដីរដ្ឋធ្វើជាកម្មសិទ្ធិឯកជន ហើយខ្លះទៀតឈានដល់ប្រើប្រាស់ឯកសារគ្រប់គ្រងដីមិនប្រក្រតីដើម្បីលក់ដូរដីធ្លីទៅអ្នកដទៃ។
ឯកឧត្តមអភិបាលខេត្តបន្តថា ដើម្បីធានាបាននូវការប្រើប្រាស់ដីធ្លីស្របតាមច្បាប់ មន្ត្រីអាជ្ញាធរ និងមន្ត្រីជំនាញមុនទទួលស្គាល់លើលិខិតកាន់កាប់ដីណាមួយ ត្រូវចុះពិនិត្យ និងធ្វើគំនូសសម្គាល់ប្លង់ឲ្យបានត្រឹមត្រូវ ដើម្បីបង្ការករណីជម្លោះព្រំដី ឬដីមានប្លង់ជាន់គ្នាជាដើម។ មិនត្រឹមតែប៉ុណ្ណោះអភិបាលខេត្តបានប្រមាណដល់មន្ត្រីទាំងឡាយណា ដែលឃុបឃិបជាមួយឈ្មួញលួចលាក់ធ្វើលិខិតគ្មានចុះបញ្ជីលេខត្រឹមត្រូវ បើរកឃើញ និងចាត់វិធានការទៅតាមផ្លូវច្បាប់៕ ដោយ ៖ សាយ ករុណា
ចែករំលែកព័តមាននេះ