ខេត្តក្រចេះ ៖ កំណាត់ផ្លូវលំក្រាលក្រួសក្រហម២ខ្សែ ស្ថិតក្នុងសង្កាត់អូរប្ញស្សី ក្រុងក្រចេះ ត្រូវបានជួសជុលសាងសង់រួចរាលជាស្ថាពរ ដោយចាក់សាបបេតុងថ្មីឡើងវិញ។
លោក ឈឺន រិទ្ធ ចៅសង្កាត់អូរប្ញស្សី បានអោយដឹងតាម Page Facebok ឈ្មោះ Chheun Rith (ឈឺន រិទ្ធ) ថា កំណត់ផ្លូវលំពីរខ្សែនេះ ខុសពីសព្វមួយដង បានប្រែក្លាយពីផ្លូវក្រាលគ្រួសក្រហម ទៅជាថ្នល់មានផ្លូវបេតុងស្អាតល្អ សម្រាប់អ្នកភូមិរបស់យើង ។ ពិសេសផ្លូវបេតុងនេះ ស្ថិតនៅជាប់នឹងសាលារៀន និងមណ្ឌលសុខភាពទៀតផង ។
គម្រោងនេះជាលើកដំបូង ស្ថិតនៅក្នុងភូមិទាំងពីរ នៃសង្កាត់អូរប្ញស្សី ក្រុងក្រចេះ ជាកញ្ចប់ថវិកាអភិវឌ្ឍនៅថ្នាក់មូលដ្ឋាន។
ពិតមែនតែផ្លូវទាំងពីរនេះនៅមានប្រវែងខ្លី ហើយទើបតែមាននៅក្នុងភូមិ តែការអភិវឌ្ឍមិនបញ្ចប់ត្រឹមនេះនោះទេ។
ឆ្នាំក្រោយ និងឆ្នាំជាបន្តបន្ទាប់ទៀត ទាំងរដ្ឋបាលខេត្ត ក្រុង និងរដ្ឋបាលសង្កាត់ គ្រោងនឹងបន្តគម្រោងផ្លូវបេតុងបែបនេះ ឱ្យបានដល់ក្នុងភូមិទាំងមូល ក៏ដូចជានៅតាមបណ្តាភូមិផ្សេងៗទៀតនៅក្នុងសង្កាត់។
ដើម្បីភាពស្រស់ស្អាតថ្មីនៃផ្លូវបេតុងទាំងពីរខ្សែនេះ រដ្ឋបាលសង្កាត់អូរប្ញស្សី នឹងមានគម្រោងជាមួយបងប្អូន ដែលរស់នៅតាមដងផ្លូវ ធ្វើការបំពាក់អំពូលសូឡា តាមមុខផ្ទះគ្រប់ៗគ្នា ដើម្បីបំភ្លឺផ្ទះផង និងបំភ្លឺផ្លូវបេតុងផង។
ចែករំលែកព័តមាននេះ