ខេត្តប៉ៃលិន ៖ ប្រជាពលរដ្ឋមានការរអ៊ូរទាំ និងព្រួយបារម្ភយ៉ាងខ្លាំង ខណៈតម្លៃទីផ្សារស្វាយកែវរមៀត មានការធ្លាក់ចុះ ហើយការបង់ថ្លៃនាំចេញនៅច្រកទ្វារអន្តរជាតិ រហូតដល់ចំនួន៤កន្លែង ដែលធ្វើឱ្យពួកគាត់ម្នាក់ៗមានការលំបាក ជាពិសេសប្រឈមនឹងបញ្ហាខ្វះខាតក្នុងជីវភាពប្រចាំថ្ងៃផងដែរ ។
ជាក់ស្តែងកាលពីព្រឹកថ្ងៃទី០៣ ខែវិច្ឆិកា ឆ្នាំ២០២០នេះ មានការកសិករម្នាក់ឈ្មោះ ជា ភេទប្រុស អាយុ៥៥ឆ្នាំ មានប្រពន្ធឈ្មោះ ភៀន អាយុ៥០ឆ្នាំ រស់នៅក្រុងប៉ៃលិន បានដាំស្វាយកែវរមៀត ចំនួនជិត៥០០ដើម នៅភូមិក្ងោក ឃុំស្ទឹងកាច់ ស្រុកសាលាក្រៅ ខេត្តប៉ៃលិន ហើយកំពុងតែប្រមូលផលបានជាង៨តោន ដើម្បីលក់ឱ្យឈ្មួញដឹកយកទៅលក់បន្តនៅប្រទេសថៃ ខណៈស្វាយឆ្នាំ២០២០នេះ ហាក់បីដូចជាអត់សូវមានផ្លែច្រើនដូចឆ្នាំមុនទេ ។
បើតាមការរៀបរាប់ពីឈ្មួញម្នាក់ឈ្មោះ ជាន ធុច ភេទស្រី អាយុ៣៦ឆ្នាំ រស់នៅក្រុងប៉ៃលិន បានរៀបរាប់ឱ្យដឹងថា ៖ តម្លៃទីផ្សារស្វាយកែវរមៀតខៀវ (ខ្ចី) ឥឡូវមានការធ្លាក់ចុះជាងឆ្នាំមុន ដោយគាត់ទិញពីកសិករក្នុង១គីឡូក្រាមតម្លៃ៥០០ទៅ៨០០រៀលប៉ុណ្ណោះ ខណៈពេលឆ្នាំមុន គាត់ (ឈ្មួញ) ហ៊ានទិញក្នុងតម្លៃខ្ពស់ដោយ១គីឡូក្រាម១២០០រៀលទៅ១៥០០រៀលក្នុង១គីឡូក្រាម។
ស្ត្រីជាឈ្មួញខាងលើបន្តទៀតថា បើតម្លៃទីផ្សារមានការធ្លាក់ចុះបែបនេះ ធ្វើឱ្យប្រជាកសិករមានការលំបាក និងព្រួយបារម្ភខ្លាំងចំពោះជីវភាពប្រចាំថ្ងៃ ព្រោះទីផ្សារទាប គាត់ហ៊ានទិញពីកសិករក្នុងតម្លៃទាបដូចគ្នា ដោយគាត់នាំចេញទៅលក់ដូរមានការលំបាក ព្រោះត្រូវបង់ថ្លៃនាំចេញចំនួន៤កន្លែង គឺត្រូវបង់ឱ្យខាងមន្ត្រីគយប្រចាំច្រកទ្វារ ក្នុង១រថយន្តតម្លៃ៨០០០០រៀល តែសុំចុះនៅត្រឹម៥០០០០រៀល, បង់ឱ្យអ្នកយាមច្រកទ្វារ ៥០០០រៀល, បង់ឱ្យមន្ត្រីនៅក្បែរអ្នកយាមច្រកទ្វារ ថ្លៃទិញសំបុត្រ៥០០០០រៀល និងបង់ថ្លៃនាំចូលនៅខាងភាគីថៃ តម្លៃ២៥០០បាត (ប្រាក់ថៃ) សរុបទៅ គឺអស់ជាង៤០ម៉ឺនរៀល ពោលគឺក្នុងការដឹកនាំចេញទៅលក់ដូរនៅប្រទេសថៃតាមច្រកទ្វារអន្តរជាតិព្រំ ក្នុង១ជើង ឬមួយរថយន្ត ។
ពួកគាត់ក៏សំណូមពរឱ្យខាងភាគីខ្មែរ និងខាងភាគីថៃ មានការបន្ធូរបន្ថយតម្លៃបង់នៅច្រកទ្វារ ព្រោះតម្លៃទីផ្សារកសិផលទាប ហើយមានការបង់ថ្លៃច្រកអស់ច្រើនកន្លែងថែមទៀត ។
ពាក់ព័ន្ធនឹងបញ្ហាខាងលើនេះភ្នាក់ងារកោះសន្តិភាពយើងបានព្យាយាមទាក់ទងតាមទូរស័ព្ទទៅលោក ឃឹម ប៉េងថុង ប្រធានការិយាល័យច្រកទ្វារអន្តរជាតិព្រំ ដែលទើបនឹងឡើងកាន់តំណែងដែរ តែបានបិទទូរស័ព្ទ មិនអាចទាក់ទងបានឡើយ ។
តែទោះបីជាយ៉ាងណា ភ្នាក់ងារយើងនឹងធ្វើការស្រាយបំភ្លឺ បើសិនជាមិនមានការបង់ប្រាក់អស់ច្រើនកន្លែង ដូចជាការលើកឡើងរបស់ប្រជាពលរដ្ឋខាងលើ ៕
ចែករំលែកព័តមាននេះ