ខេត្តក្រចេះ ៖ នៅព្រឹកថ្ងៃទី៣ វិច្ឆិកា លោក ហឿ ស៊ីយ៉ែម ប្រធានក្រុមប្រឹក្សាខេត្តក្រចេះបានចុះចែកវិញ្ញាបនបត្រសំគាល់ម្ចាស់អចលនវត្ថុចំនួន៦៤១ ប័ណ្ណស្មើនិង៤០៥គ្រួសារ ទៅអោយម្ចាស់ដីនៅភូមិកំបោរ ក្នុងឃុំគោលាប់ ស្រុកចិត្របុរី ។
លោក យិន បុទុម អនុប្រធានមន្ទីររៀបចំដែនដីនគរូបនីកម្មសំណង់ និងសុរិយោដីខេត្តក្រចេះ បានអោយដឹងផងដែរថា គម្រោងបានធ្វើការចែកប័ណ្ណជូនប្រជាពលរដ្ឋនៅភូមិ កំបោរ ក្នុងឃុំគោលាប់ ស្រុកចិត្របុរី មានសរុបចំនួន៤០៥គ្រួសារ ស្មើនិង៦៤១ប័ណ្ណ ។
លោកអនុប្រធានមន្ទីររូបនេះ បានបន្ថែមទៀតថា ចំពោះបណ្ណសម្គាល់សិទ្ធិ កាន់កាប់ប្រើប្រាស់ដីធ្លីចាស់ ប្រភេទបណ្ណស្លាបមាន់ ដែលចេញដោយរដ្ឋបាលសុរិយាដីកន្លងទៅ ត្រូវអស់សុពលភាព តាមផ្លូវច្បាប់ចាប់ពីថ្ងៃនេះតទៅ ។ ជាក់ស្តែងការប្រគល់បណ្ណសម្គាល់ដីធ្លីនៅពេលនេះ គឺធ្វើឡើងបន្ទាប់ពីវាស់វែង ចុះបញ្ជីប្លង់ជាប្រព័ន្ធ និងបិទ ផ្សាយឯកសារនៃការវិនិច្ឆ័យដីធ្លីរួចមកហើយ ។
លោក ហឿ ស៊ីយ៉ែម បានថ្លែងថា ការចុះបញ្ជីដីធ្លីលក្ខណជាប្រព័ន្ធនេះធ្វើឡើងទូទាំងខេត្ត មិនថាតែដីរដ្ឋ ឬឯកជននោះទេ ។ ដោយម្ចាស់អចលនទ្រព្យ ចូលរួមសហការ និងមានឯកសារគោលសម្គាល់ទទួលស្គាល់ពីអាជ្ញាធរពាក់ព័ន្ធទៅតាមដំណាក់កាលនីមួយៗដើម្បីផ្តល់ប្រយោជន៍ដល់ម្ចាស់ដីធ្លីទាំងនោះមានសិទ្ធិពេញលេញ ក្នុងការកាន់កាប់ គ្រប់គ្រងដោយស្របតាមច្បាប់មានចែង ។
លោកប្រធានក្រុមប្រឹក្សាខេត្ត ក៏បានប្រាប់ពីសិទ្ធស្របច្បាប់របស់ប្រជាពលរដ្ឋដែលរាជរដ្ឋាភិបាលកម្ពុជាបានផ្ដល់ជូនការគ្រប់គ្រងដី ការអាស្រ័យផលសិទ្ធិប្រើប្រាស់លើដី និងសិទ្ធិក្នុងចាត់ចែងលើដីរបស់ខ្លួន។ ហើយការផ្ដល់កម្មសិទ្ធជូនប្រជាពលរដ្ឋនាពេលនេះគឺជាគោលនយោបាយរបស់រាជរដ្ឋាភិបាលក្នុងការរួមចំណែកជំរុញ និងលើកទឹកចិត្តអោយប្រជាពលរដ្ឋខិតខំបង្កើនផលិតភាព ក៏ដូចជាការវិនិយោគក្នុងវិស័យកសិកម្មអោយកាន់តែមានការកើនឡើងថែមទៀត ។
ម្យ៉ាងទៀត ការផ្ដល់ប័ណ្ណកម្មសិទ្ធជូនប្រជាពលរដ្ឋនាពេលនេះ ក៏ជាការរួមចំណែកជួយដោះស្រាយបញ្ហាទំនាស់ដីធ្លីរវាងប្រជាពលរដ្ឋ និងប្រជាពលរដ្ឋ រវាងក្រុមហ៊ុនដែលកន្លងមកបញ្ហានេះ តែងតែកើតឡើងធ្វើអោយប៉ះពាល់ដល់ជីវភាពរបស់ប្រជាពលរដ្ឋបង្កភាពស្មុគស្មាញយ៉ាងខ្លាំងដល់អាជ្ញាធរមានសមត្ថកិច្ច។
ចែករំលែកព័តមាននេះ