ខេត្តតាកែវ ៖ នៅឆ្នាំនេះបន្ទាប់ពីប្រមុខរាជរដ្ឋាភិបាលប្រកាសមិនប្រារព្ធធ្វើពិធីបុណ្យអុំទូក អកអំបុក និងសំពះខែ នៅរាជធានីភ្នំពេញ ដែលជាផ្នែកមួយនៃការការពារការរីករាលដាលនៃវីរុសកូវីដ ១៩ នោះគេសង្កេតឃើញប្រជាពលរដ្ឋនៅតាមបណ្តាខេត្តផ្សេងៗក៏បានរៀបចំការអុំទូក ឬកម្មវិធីផ្សេងៗលក្ខណៈតូចល្មមតាមតំបន់ដើម្បីផ្តល់ភាពរីករាយនៅក្នុងតំបន់របស់ខ្លួន ។
យ៉ាងណាមិញ ដើម្បីចូលរួមអបអរពិធីបុណ្យអុំទូកនេះផងដែរ ស្រាប់តែមានតំបន់មួយនៅខេត្តតាកែវបានរៀបចំពិធីប្រណាំងកម្សាន្តមួយ ដែលប្លែកភ្នែកមិនធ្លាប់មានពីមុនមក ផ្តល់ភាពរីករាយដល់ប្រជាពលរដ្ឋនៅក្នុងតំបន់ ។ ជាក់ស្តែង ចៅអធិកាវត្ត ព្រៃទប់ ស្ថិតក្នុងឃុំស្រង៉ែ ស្រុកទ្រាំង ខេត្តតាកែវបានបង្កើតឱ្យមានកម្មវិធីប្រណាំងជិះខ្ទះ ហើយអ្នកបានជ័យលាភីលេខ១ទទួលបានប្រាក់៤៥ម៉ឺនរៀល រួមនិងមីនិងទឹកផ្លែឈើមួយចំនួនផ្សេងទៀត។
ក្នុងការប្រណាំងជិះខ្ទះ រៀបចំកាលថ្ងៃទី១ ខេវិច្ឆិកា ឆ្នាំ២០២០ នេះបើតាមលោក អាចារ្យគណៈកម្មការវត្តមានយុវវ័យចូលរួមចុះឈ្មោះប្រណាំងជាង២០នាក់ ហើយក្នុងនោះស្ត្រីមានចំនួន៤នាក់។
បើតាម ព្រះតេជគុណ អ៊ីថា នៅឆ្នាំក្រោយបើសិនអាចព្រះតេជគុណគ្រោងទិញដើមត្នោតចំនួន៤ដើមធ្វើជាទូកត្នោតសម្រាប់ទុកអុំប្រណាំងគ្នានៅទំនាបវាលបឹងខាងភូមិព្រៃចង្រៀក ជំនួសឱ្យការជិះខ្ទះវិញ ព្រោះស្រះទឹកដែលបានកំពុងផ្តល់ភាពរីករាយនេះ នឹងក្លាយជាទីកន្លែងស្តុកទឹកស្អាតទុកសម្រាប់ប្រើប្រាស់វិញ។
បើយោងតាម ហ្វេសប៊ុក របស់ព្រះតេជគុណ អ៊ីថា ព្រះចៅអធិកាវត្តព្រៃទប់បានបង្ហាញថា«ខ្ញុំព្រះករុណា អាត្មាភាព ព្រះភិក្ខុ ឋិតមេធោ អ៊ីថា បានប្រគល់ប្រាក់អោយអ្នកជិះខ្ទះ ពីលេខ ១ ដល់ ៧ មានឈ្មោះដូចខាងក្រោម៖
លេខ ១ ប្អូនប្រុស រាជ្យ រស់នៅភូមិប្រហូត មី ២ កេះ ភេសជ: ១ កេះ បច្ច័យ ៤៥០.០០០៛
លេខ ២ ប្អូនប្រុស វ៉ាន់ រស់នៅភូមិព្រៃទប់ មី ២កេះភេសជ: ១ កេះ បច្ច័យ ២០០.០០០៛
លេខ ៣ ប្អូនប្រុស សុភាព រស់នៅភូមិព្រៃទប់ មី ១ កេះ ភេសជ: ១ កេះ បច្ច័យ ១៥០.០០០៛
លេខ ៤ ប្អូនប្រុស សុគន្ធា រស់នៅភូមិប្រហូត មី ១ កេះ ភេសជ: ១ កេះ បច្ច័យ ១០០.០០០៛
លេខ ៥ កញ្ញា សេង រស់នៅភូមិគ្រាំង មី ១ កេះ ភេសជ: ១ កេះ បច្ច័យ ៥០០០០៛
លេខ ៦ ប្អូនប្រុស វេង ភាព រស់នៅភូមិព្រៃទប់ មី ១ កេះ ភេសជ: ១ កេះ បច្ច័យ ៥០០០០៛
លេខ ៧ ប្អូនប្រុស ហេង រស់នៅភូមិប្រហូត មី ១ កេះភេសជ: ១ កេះ បច្ច័យ ៥០០០០៛ ៕
ចែករំលែកព័តមាននេះ