ខេត្តរតនៈគិរី ៖ គំនរឈើចំនួន២១ដុំដែលក្រុមឈ្មួញលាក់ទុកគររាយប៉ាយចំនួន២ទីតាំងផ្សេងគ្នា ហើយបម្រុងដឹកទៅប្រទេសវៀតណាមផងនោះ ត្រូវបានកម្លាំងសមត្ថកិច្ចចម្រុះ រួមមាន កម្លាំងអាវុធហត្ថខេត្ត, កម្លាំងនគរបាលប្រឆាំងបទល្មើសសេដ្ឋកិច្ច, កម្លាំងរដ្ឋបាលព្រៃឈើ, កម្លាំងអធិការនគរបាលស្រុកអណ្តូងមាស…
ខេត្តរតនៈគិរី ៖ គំនរឈើចំនួន២១ដុំដែលក្រុមឈ្មួញលាក់ទុកគររាយប៉ាយចំនួន២ទីតាំងផ្សេងគ្នា ហើយបម្រុងដឹកទៅប្រទេសវៀតណាមផងនោះ ត្រូវបានកម្លាំងសមត្ថកិច្ចចម្រុះ រួមមាន កម្លាំងអាវុធហត្ថខេត្ត, កម្លាំងនគរបាលប្រឆាំងបទល្មើសសេដ្ឋកិច្ច, កម្លាំងរដ្ឋបាលព្រៃឈើ, កម្លាំងអធិការនគរបាលស្រុកអណ្តូងមាស និងកម្លាំងអាវុធហត្ថមូលដ្ឋានស្រុកអណ្តូងមាស ដោយមានសម្របសម្រួលពីលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្តផងនោះ បានចុះបង្ក្រាប និងរឹបអូស រួចប្រគល់ឱ្យជំនាញផងដែរ។
ការចុះបង្ក្រាបនេះ ដោយមានបទបញ្ជាពីលោកថង សាវុន ប្រធានគណៈបញ្ជាការឯកភាព ខេត្តរតនៈគិរី ហើយកម្លាំងសមត្ថកិច្ចបានធ្វើឡើងកាលពីថ្ងៃទី៣១ ខែតុលា ឆ្នាំ២០២០នេះ។
តាមប្រភពពីកម្លាំងដែលចុះបង្ក្រាប់ផ្ទាល់បានប្រាប់ថា គំនរឈើនៅទីតាំងទី១ រឹបអូសបានចំនួន១១ដុំ ស្ថិតក្នុងភូមិមុយស្រែក្រោម និងទីតាំងទី២ រឹបអូសបានឈើចំនួន១០ដុំ ស្ថិតក្នុងភូមិកេតឃុំញ៉ាង ស្រុកអណ្តូងមាស ខេត្តរតនៈគិរី។
ប្រភពដដែលបន្តថា ឈើសរុបទាំង២ទីតាំងខាងលើមានចំនួន២១ដុំនេះ បានធ្វើការវាស់វែងនៅកន្លែងជាក់ស្តែងតែម្តង ដែលមានចំនួន៦.៧២០ម៉ែត្រគូប។ ក្រោយពីវាស់វែងរួចរាល់ វត្ថុតាងឈើខាងលើទាំងអស់នោះត្រូវបានកម្លាំងចម្រុះប្រគល់ឱ្យខណ្ឌរដ្ឋបាលព្រៃឈើ ខេត្តរតនៈគិរី ដើម្បីចាត់ចែងតាមច្បាប់ព្រៃឈើបន្ត។
គួរបញ្ជាក់ថា ការបង្ក្រាបឈើខាងលើនោះ គឺកាលពីប៉ុន្មានថ្ងៃមុននោះមានបណ្តាញសង្គម Facebook បានហោះរូបភាពម៉ូតូដឹកឈើដូចហែកឋិនទៅប្រទេសវៀតណាម ទើបលោក ថង សាវុន បានបញ្ជាឱ្យកម្លាំងចុះត្រួតពិនិត្យជាក់ស្តែង ក្នុងភូមិសាស្ត្រខាងលើ រួចក៏បានធ្វើការបង្ក្រាប និងរឹបអូសឈើបែបនេះតែម្តង។ ប៉ុន្តែក្នុងខណៈពេលនោះ គឺមិនបានប្រទះឃើញសកម្មភាពម៉ូតូដឹកឈើដូចក្នុងបណ្តាញសង្គម Facebook បង្ហោះនោះទៀតទេ។
គួររំលឹកថា គណៈបញ្ជាការឯកភាពខេត្តរតនៈគិរី ក៏បានរឹតបណ្តឹងការដឹកជញ្ជូនឈើខុសច្បាប់គ្រប់រូបភាពយ៉ាងណាមិនឱ្យនៅមានក្រុមឈ្មួញឈើ មកលបលួចធ្វើសកម្មភាពដោយខុសច្បាប់បន្តទៀតនោះដែរ៕
ចែករំលែកព័តមាននេះ