ខេត្តក្រចេះ ៖ រថយន្តសាំយ៉ុងយ៉ាងហោច៥គ្រឿង ដែលមន្ត្រីអាវុធហត្ថខេត្តក្រចេះអះអាងថា សុទ្ធសឹងជារថយន្តប្រមូលបានពីការចាប់បង្ក្រាបការដឹកជញ្ជូននឈើខុសច្បាប់ត្រូវបានក្រុមសមត្ថកិច្ចសម្រេចធ្វើការដុតកម្ទេចចោលទាំងស្រុង។ មន្ត្រីអាវុធហត្ថស្រុកស្នួលនិយាយថា រថយន្ត៥គ្រឿងជាវត្ថុតាងសម្រាប់ដឹកជញ្ជូនបទល្មើសព្រៃឈើ ត្រូវបានប្រមូលមកធ្វើការដុតកម្ទេចកាលពីថ្ងៃចុងសប្តាហ៍ ខណៈមានមនុស្ស៩នាក់ដែលជាម្ចាស់រថយន្តនិងជាម្ចាស់ឈើត្រូវបានឃាត់ខ្លួននិងត្រូវបានតុលាការសម្រេចឃុំខ្លួនបណ្តោះអាសន្ននៅពន្ឋនាគារខេត្តកាលពីថ្ងៃចុងខែតុលាមុននេះ។
សូមរំលឹកថា មនុស្ស៩នាក់សុទ្ធសឹងតែមានទីលំនៅក្នុងស្រុកមេមត់ ខេត្តត្បូងឃ្មុំ ។ ពួកគេត្រូវបានកម្លាំងអាវុធហត្ថស្រុកស្នួលចុះធ្វើការចាប់ខ្លួនបានកាលពីថ្ងៃទី២០ ខែតុលា ក្នុងសកម្មភាពការបង្ក្រាបរថយន្តដឹកឈើស្ថិតក្នុងភូមិស្រែរនាម ឃុំឃ្សឹម ស្រុកស្នួល ខេត្តក្រចេះ ក្នុងនោះក៏មានរថយន្តដឹកឈើប្រភេទសាំយ៉ុងមានផ្ទុកឈើអាឡាំងជ្រុងប្រភេទឈើលេខមួយពេញប្រៀបពេញក្នុងរថយន្តទាំងចំនួន៥គ្រឿងក៏ត្រូវធ្វើាការរឹបអូសផងដែរ។
បើតាមសេចក្តីរាយការណ៍និយាយឲ្យដឹងថា ក្រុមមនុស្សទាំង៩នាក់នេះសុទ្ឋសឹងជា មុខសញ្ញាក្នុងសកម្មភាពដឹកឈើខុសច្បាប់នាំចេញទៅលក់នៅវៀតណាមដែលបានធ្វើឡើងយ៉ាងសកម្មក្នុងរយះពេលច្រើនឆ្នាំមកហើយ។ ក្រោយសកម្មភាពដឹកឈើដែលបង្កឡើងពីក្រុមជនទាំងនេះយ៉ាងអនាធិប្បតេយ្យពាសពេញផ្លូវជាតិ កន្លងមកសមត្ថក៏ធ្លាប់មានវិធានការបង្ក្រាបក្រុមអ្នកដឹកជញ្ជូនឈើទាំងអស់នេះផងដែរ។ តែពួកគេនៅតែមិនរាងចាល និងថែមទាំងមកបង្កការតវ៉ាបង្កហឹង្សាដើម្បីរំដោះឡានដឹកឈើរបស់ពួគគេពីសមត្ថកិច្ចយកត្រឡប់ទៅវិញ។
មន្ត្រីអាវុធហត្ថបានបញ្ជាក់ថា ក្រោយការចាប់ខ្លួននិងបន្តនីតីវិធីលើមនុស្សទាំងចំនួន៩នាក់ សុទ្ឋសឹងជាម្ចាស់ឈើខុសច្បាប់និងម្ចាស់ឡាន។ កម្លាំងសមត្ថកិច្ចបានបន្តការដុតកម្ទេចវត្ថុតាងបទល្មើសលើរថយន្តទាំង៥គ្រឿងនេះចោលក្រោយសកម្មភាពបង្ក្រាបបានរយៈពេលជិត១០ថ្ងៃ៕
ចែករំលែកព័តមាននេះ