ខេត្តបាត់ដំបង ៖ លោកអធិការរងក្រុងបាត់ដំបង មួយរូបត្រូវអតីតភរិយាដែលលែងលះគ្នា៣ឆ្នាំទៅហើយនោះ បានដាក់ពាក្យបណ្ដឹងទៅកាន់ការិយាល័យព្រហ្មទណ្ឌកំរិតធ្ងន់ ដើម្បីឲ្យសមត្ថកិច្ចចាត់ការតាមនីតិវិធីច្បាប់ ដោយចោទប្រកាន់លោកអធិការរងក្រុងរូបនេះថា «បានព្យាយាមគំរាមសម្លា.ប់ញឹកញាប់ និងប្រើហិង្សា»។ ប៉ុន្តែពេលនេះ លោកអធិការរងរូបនេះបាននិងកំពុងសុំអន្តរាគមន៍ពីមេកើយរបស់ខ្លួន ដើម្បីជួយរកដំណោះស្រាយបញ្ចប់រឿងក្រៅផ្លូវច្បាប់។
ភាគីដើមបណ្ដឹង អ្នកស្រី សុខ សោភ័ណ នៅភូមិចំការសំរោង២ សង្កាត់ចំការសំរោង ក្រុងបាត់ដំបង បានថ្លែងប្រាប់កោះសន្តិភាពតាមទូរស័ព្ទ នៅព្រឹកថ្ងៃទី៣១ ខែតុលាថា គាត់បានដាក់ពាក្យបណ្ដឹងជាផ្លូវការទៅកាន់ការិយាល័យព្រហ្មទណ្ឌកំរិតធ្ងន់ កាលពីថ្ងៃទី២៨ តុលា ឆ្នាំ២០២០ ដើម្បីប្ដឹងលោក កាយ វណ្ណធី អធិការរងក្រុងបាត់ដំបង ដែលធ្លាប់ជាអតីតស្វាមីកាលពី៣ឆ្នាំមុន។
អ្នកស្រីបានរំលឹកពីដំណើររឿងថា គាត់ និងលោក កាយ វណ្ណធី ធ្លាប់ជាប្ដីប្រពន្ធស្របច្បាប់ មានកូន៣នាក់ ក្នុងនោះស្រីម្នាក់។ ក្រោយមកប្ដីប្រពន្ធ គាត់បានចែកផ្លូវគ្នាជ្រះស្រឡះតាមផ្លូវតុលាការ រហូតដល់ពេលនេះ សាលក្រមលែងលះបានចូលជាស្ថាពរចំនួន៣ឆ្នាំហើយ។
គាត់និយាយថា សាលក្រមបានសម្រេចប្រគល់ផ្ទះសម្បែងមកឲ្យគាត់ និងទទួលថែទាំកូនទាំង៣ រីឯឈ្មោះ កាយ វណ្ណធី មានសិទ្ធិត្រឹមតែចេញចូលមើលកូន និង មានភារកិច្ចផ្ដល់អាហារកិច្ចដល់កូនៗប៉ុណ្ណោះ។ ប៉ុន្តែមួយរយៈចុងក្រោយនេះ ឈ្មោះ កាយ វណ្ណធី នេះ បានបំពានសាលក្រមយ៉ាងធ្ងន់ធ្ងរ និងបំពានទៅលើរូបគាត់ និងកូនៗ។ ជននេះតែងតែចូលទៅបង្កជម្លោះជាមួយគាត់ គំរាមបាញ់សម្លា.ប់គាត់ជាញឹកញាប់ វាយបំផ្លាញទ្រព្យសម្បត្តិនៅក្នុងផ្ទះគាត់ និង ប្រើហិង្សាទៅលើកូនស្រីដែលទើបតែមានអាយុ១០ឆ្នាំទៀត។
អ្នកស្រី សុខ សោភ័ណ បានបញ្ជាក់ថា មូលហេតុដែលលោកអធិការរងក្រុងនោះ នៅមិនជ្រះស្រឡះជាមួយគាត់ តែងទៅបង្កជម្លោះប្រើហិង្សាលើកូន និងគំរាមបាញ់សម្លា.ប់គាត់បន្តបន្ទាប់បែបនេះ ដោយសារតែអតីតស្វាមីរូបនេះ ចង់សុំផ្អែមល្ហែមជានាជាមួយគាត់វិញ តែគាត់មិនព្រម ហើយជននេះថែមទាំងចោទគាត់ថា កំពុងទំនាក់ទំនងជាមួយប្រុសថ្មីទៀតផង។ ហើយប៉ុន្មានថ្ងៃចុងក្រោយនេះ ជននេះបានបង្កជម្លោះ និងគំរាមសម្លា.ប់គាត់ញឹកញាប់ពេក ទើបគាត់សម្រេចដាក់ពាក្យបណ្ដឹងតាមផ្លូវច្បាប់តែម្ដង។
ប្រធានការិយាល័យព្រហ្មទណ្ឌកំរិតធ្ងន់ លោក កោ ស៊ុនកាំង បានបំភ្លឺរឿងនេះ ប្រាប់កោះសន្តិភាពនៅថ្ងៃដដែលនេះដែរថា ការិយាល័យរបស់លោកពិតជាបានទទួលបណ្ដឹងស្ត្រីរងគ្រោះខាងលើមែន។ លោកកោ ស៊ុនកាំង បានបញ្ជាក់ថា ស្ត្រីរងគ្រោះបានប្ដឹងចោទប្រកាន់លោកកាយ វណ្ណធី អធិការរងក្រុងបាត់ដំបង ( អតីតស្វាមី) ដោយចោទថា លោកអធិការរងរូបនេះ បានគំរាមសម្លា.ប់ និងប្រើហិង្សា។ ប៉ុន្តែក្រោយទទួលបណ្ដឹង ការិយាល័យរបស់លោកមិនទាន់បានចាត់ការតាមនីតិវិធីនៅឡើយទេ តែបានបញ្ជូនបណ្ដឹងនោះបន្តទៅកាន់ការិយាល័យបុគ្គលិក ដើម្បីដោះស្រាយ តាមគោលការណ៍របស់លោកស្នងការខេត្ត។
ប្រធានការិយាល័យបុគ្គលិក នៃស្នងការខេត្ត លោក វេ គឹមស៊ីម បានប្រាប់ដែរថា ជាគោលការណ៍លោកស្នងការ បានប្រគល់សំណុំរឿងនេះ ឲ្យទៅលោកអធិការក្រុង ជួយសម្របសម្រួលរវាងភាគីទាំង២សិន។ ប៉ុន្តែបើសម្របសម្រួលចប់ លោកនឹងអញ្ជើញលោកអធិការរងក្រុងរូបនេះ មកសាកសួរបន្តតាមវិន័យរបស់កងកម្លាំង។
កោះសន្តិភាព មិនអាចទំនាក់ទំនងសុំការបំភ្លឺពីលោក កាយ វណ្ណធី អធិការរងក្រុង ដែលត្រូវអតីតភរិយាប្ដឹងនោះបាននៅឡើយទេ នៅរសៀលថ្ងៃទី៣១ ខែតុលានេះ។ ប៉ុន្តែបើតាមប្រភពព័ត៌មានបានបង្ហើបប្រាប់កោះសន្តិភាពថា ពេលនេះ លោកកាយ វណ្ណធី កំពុងសុំជំនួយពីមេកើយរបស់ខ្លួន ដើម្បីជួយសម្របសម្រួលបញ្ចប់រឿងក្រៅផ្លូវច្បាប់។
ដោយឡែក លោក ឆាង វណ្ណឆៃ អធិការក្រុងបាត់ដំបង បានបញ្ជាក់ដដែលៗប្រាប់កោះសន្តិភាពយ៉ាងខ្លីថា លោកបានហៅភាគីមកសម្របសម្រួលបញ្ចប់រឿងហើយ។ ប៉ុន្តែផ្ទុយពីការឆ្លើយតបរបស់លោកអធិការក្រុង អ្នកស្រី សុខ សោភ័ណ (ដើមបណ្ដឹង) បានបញ្ជាក់ថា គិតត្រឹមវេលាថ្ងៃត្រង់ ថ្ងៃទី៣១ តុលានេះ មិនទាន់មានមន្ត្រីរូបណាហៅគាត់ទៅសាកសួរ ក្រៅតែពីថ្ងៃទៅដាក់ពាក្យបណ្ដឹងដំបូងទេ។
អ្នកស្រី សុខ សោភ័ណ បាននិយាយដោយបង្ហាញពីអារម្មណ៍ភ័យខ្លាចបំផុត គឺការគំរាមបាញ់សម្លា.ប់ ដែលលោក កាយ វណ្ណធី បានគំរាមអ្នកស្រីម្ដងហើយម្ដងទៀតដដែល ពេលជននេះទៅបង្កជម្លោះដល់ផ្ទះគាត់ម្ដងៗ។ ជាពិសេសពេល ជននេះផឹកស្រវឹងជោកជាំ។ ជាមួយនឹងក្ដីបារម្ភនេះ ជាដំបូងអ្នកស្រី ចង់ឲ្យសមត្ថកិច្ចហៅឈ្មោះ កាយ វណ្ណធី ទៅសាកសួរនាំពីរឿងកាំភ្លើង។ ព្រោះកន្លងទៅ អ្នកស្រីធ្លាប់ដឹងថា ឈ្មោះ វណ្ណធី នេះ មានកាំភ្លើងខ្លីជាប់ខ្លួន។ ដូច្នេះអ្នកស្រីចង់ឲ្យសមត្ថកិច្ចដកកាំភ្លើងពីឈ្មោះ កាយ វណ្ណធី ជាបណ្ដោះអាសន្នសិន ចៀសវាងខ្លាចមានបញ្ហាកើតឡើងធ្ងន់ធ្ងរជាងនេះ៕
ចែករំលែកព័តមាននេះ