ខេត្តបន្ទាយមានជ័យ ៖ បើតាមសេចក្តីរាយការណ៍បានឲ្យដឹងថា មានការភ្ញាក់ផ្អើលមួយកើតឡើងកាលពីរសៀលថ្ងៃទី៣០ ខែតុលា ឆ្នាំ២០២០ ដោយមានក្មេងប្រុសម្នាក់អាយុ៥ឆ្នាំ បានលង់ទឹក បណ្តាលឱ្យបាត់បង់ជីវិត ខណៈជីដូននាំទៅស្តាប់ធម៌ក្នុងវត្តប្រាសាទស្រះឈ្នួរ ឃុំឈ្នួរមានជ័យ ស្រុកព្រះនេតព្រះ ខេត្តបន្ទាយមានជ័យ ចំណែកឪពុកម្តាយចេញទៅប្រកបកិច្ចការងាររកស៊ីនៅប្រទេសថៃ ។
សេចក្តីរាយការណ៍បន្តថា ក្មេងរងគ្រោះខាងលើឈ្មោះ អេង គឹមលាង ភេទប្រុស អាយុ៥ឆ្នាំ រស់នៅភូមិឈ្នួរ ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ ដែលមានឪពុកឈ្មោះ ពៅ រ័ត្ន អាយុ៣៣ឆ្នាំ និងម្ដាយឈ្មោះ ប៉ែន ជួន អាយុ៣៤ឆ្នាំ ទាំងពីរនាក់ប្តីប្រពន្ធទៅធ្វើការនៅប្រទេសថៃ ។
បើតាមលោកយាយឈ្មោះ ឈិម ថែន អាយុ៧៤ឆ្នាំ ជាជីដូនចៅរងគ្រោះខាងលើបានរៀបរាប់ប្រាប់ថា នៅវេលារសៀលថ្ងៃខាងលើនេះ គាត់បាននាំចៅប្រុសទៅស្តាប់ព្រះសង្ឃសូត្រធម៌នៅវត្តប្រាសាទស្រះឈ្នួរ ឃុំឈ្នួរមានជ័យ ស្រុកព្រះនេតព្រះ ។ ហើយនៅពេលទៅដល់វត្ត រូបគាត់ក៏បានឡើងទៅលើសាលាឆាន់ រួចទុកចៅរងគ្រោះនៅរត់លេងខាងក្រោម ជាមួយក្មេងដទៃទៀត ។
លោកយាយក្មេងប្រុសរងគ្រោះបន្តថា លុះដល់ម៉ោងប្រមាណជា៥ល្ងាច ក៏មានក្មេងមួយក្រុមមិនស្គាល់ឈ្មោះ បានរត់មកប្រាប់គាត់ថា «ឃើញឈ្មោះ គឹមលាង លង់ទឹកក្នុងស្រះលោកខាងកើតព្រះវិហារ» ។ ពេលឮដូច្នោះ គាត់ជាជីដូនក៏ប្រញាប់ប្រញាល់ផ្តល់ដំណឹងដល់បងប្អូន និងពុទ្ធបរិសទ្ធ រួមទាំងព្រះសង្ឃក្នុងវត្ត ទើបមានការភ្ញាក់ផ្អើលចេញទៅជួយសង្គ្រោះ ។
លោកយាយបន្តថា ខណៈពេលនោះមានឈ្មោះប៉ែន ជៀន ភេទស្រី អាយុ៣៨ឆ្នាំ ត្រូវជាអ៊ំរងគ្រោះ បានចុះរាវរកក្នុងទឹកស្រះ ក៏ស្រាប់តែរកឃើញក្មេងប្រុសរងគ្រោះ រួចក៏បានស្រង់ជនរងគ្រោះឡើងលើគោក ប៉ុន្តែជាអកុសលនៅពេលនោះជនរងគ្រោះបានបាត់បង់អាយុជីវិតទៅហើយនោះ ៕
ចែករំលែកព័តមាននេះ