ខេត្តបាតដំបង ៖ បុរសម្នាក់ត្រូវបានសមត្ថកិច្ចឃាត់ខ្លួន កាលពីម៉ោង១រំលងអធ្រាត្រឈានចូលថ្ងៃទី៣០ ខែតុលា ឆ្នាំ២០២០ ខណៈសមត្ថកកិច្ចប្រទះឃើញពេលកំពុងជួញដូរគ្រឿងញៀន នៅចំណុចភូមិ១៣មករា សង្កត់ព្រែកព្រះស្ដេច ក្រុងបាត់ដំបង និងបានដកហូតនូវត្ថុតាងមួយចំនួនផង។
អធិការក្រុងបាត់ដំបង លោក ឆាង វណ្ណឆៃ បានឲ្យដឹងថា ជនសង្ស័យខាងលើឈ្មោះ កែវ សំណាង ហៅឆាង អាយុ៣១ឆ្នាំ រស់នៅភូមិរំចេក៤ សង្កាត់រតនៈ ក្រុងបាត់ដំបង។
លោកបន្តថា ជននេះ ត្រូវបានកម្លាំងផ្នែកប្រឆាំងគ្រឿងញៀន ចេញល្បាត ហើយក៏ប្រទះឃើញខណៈពេលកំពុងតែប្រព្រឹត្តបទល្មើសគ្រឿងញៀនជាក់ស្ដែង ហើយត្រូវបានឃាត់ខ្លួនភ្លាមៗតែម្ដង។
បើតាមរបាយការណ៍ បានឲ្យដឹងថា ជាមួយនឹងការឃាត់ខ្លួននេះ មន្ត្រីជំនាញក៏ដកហូតបានថ្នាំញៀនប្រភេទមេតំហហ្វេតាមីន ICE (ម៉ាទឹកកក) ចំនួន៤ថង់ សម្ភារៈសម្រាប់វេចខ្ចប់គ្រឿងញៀន សម្ភារៈសម្រាប់ប្រើប្រាស់ និងម៉ូតូ១គ្រឿងជាមធ្យោបាយសម្រាប់ជិះប្រព្រឹត្តបទល្មើស។
ក្រោយពេលឃាត់ខ្លួនបានហើយ ជនសង្ស័យរូបនេះបានសារភាពថា ថ្នាំញៀន និងវត្តុតាងនានា ដែលសមត្ថកិច្ចបានដកហូតនេះ ពិតជារបស់ខ្លួនមែន។ ហើយជនសង្ស័យរូបនេះបានអះអាងថា ខ្លួនទើបតែប្រព្រឹត្តបទល្មើសគ្រឿងញៀននេះជាលើកដំបូងប៉ុណ្ណោះ។
ប៉ុន្តែផ្ទុយពីការចោទប្រកាន់របស់សមត្ថកិច្ចដែលអះអាងថា ជននេះជាមុខសញ្ញាចាស់ ដែលធ្លាប់ជូញដូរគ្រឿងញៀននេះ ហើយមន្ត្រីជំនាញក៏ធ្លាប់តាមដានសកម្មភាពជននេះដែរ ទើបឈានដល់ការឃាត់ខ្លួនបាន ខណៈពេលកំពុងធ្វើសកម្មភាពលើកចុងក្រោយ។
លោកឆាង វណ្ណឆៃ អធិការក្រុងបាត់ដំបង បានបញ្ជាក់ថា ជនសង្ស័យ មិនបានសារភាពប្រាប់ពីប្រភពដែលខ្លួនបានទិញថ្នាំញៀនយកមកលក់ដូរបន្តនោះទេ តែបានសារភាពទទួលស្គាល់វត្ថុតាងនានា ដែលមន្ត្រីជំនាញបានរឹបអូស។
ទោះយ៉ាងណា ពេលនេះមន្ត្រីជំនាញ បាននិងកំពុងសួរនាំ ដើម្បីកសាងសំណុំរឿងបញ្ជូនទៅតុលាការហើយ៕
ចែករំលែកព័តមាននេះ