ខេត្តឧត្តរមានជ័យ ៖ ស្ត្រីវ័យក្មេងម្នាក់បានបាត់បង់ជីវិត ខណៈនៅពេលបញ្ជូនមកដល់មន្ទីរពេទ្យបង្អែកស្រុកអន្លង់វែង និង៣នាក់ផ្សេងទៀតរងរបួសធ្ងន់-ស្រាល ខណៈពេលដែលជិះម៉ូតូ១គ្រឿងដែលមានមនុស្សជិះរហូតដល់ទៅ៤នាក់ដោយមិនពាក់មួកសុវត្ថិភាព លុះមកដល់ផ្លូវកោងកាច់ចង្កូតមិនទាន់ក៏ជ្រុលទៅបុកបង្គោលសុវត្ថិភាពផ្លូវតែម្តង បង្កឱ្យមានការភ្ញាក់ផ្អើលកាលពីម៉ោង៩ព្រឹកថ្ងៃទី៣០ ខែតុលា ឆ្នាំ២០២០ នៅតាមបណ្តោយផ្លូវជាតិលេខ២៥-២៦ ស្ថិតក្នុងភូមិទួលព្រិច ឃុំថ្លាត ស្រុកអន្លង់វែង។
បើតាមប៉ូលិសផ្នែកចរាចរណ៍ស្រុកអន្លង់វែ ងបានឱ្យដឹងថា ហេតុការណ៍នៃការគ្រោះថ្នាក់ចរាចរណ៍នេះ បណ្តាលមកពីមិនគោរពច្បាប់ចរាចរណ៍ បើកបរជិះមានគ្នារហូតទៅដល់៤នាក់ ថែមទាំងមិនពាក់មួកសុវត្ថិភាព និងបើកបរក្នុងល្បឿនលឿនទៀត លុះពេលធ្វើដំណើរមកដល់ចំណុចផ្លូវកោងកាច់ចង្កូតមិនទាន់ ក៏ជ្រុលចង្កូតទៅបុកបង្គោលសុវត្ថិភាពផ្លូវ បណ្តាលឱ្យមនុស្សបាត់បង់ជីវិតម្នាក់ និង៣នាក់រងរបួសធ្ងន់និងស្រាលតែម្តង។
ជនរងគ្រោះខាងលើឈ្មោះ ឈឹង ស្រីឃាន់ ភេទស្រី អាយុ១៤ឆ្នាំ រស់នៅភូមិទួលក្រឡាញ់ ឃុំថ្លាត ស្រុកអន្លង់វែង ជាអ្នកបើកបរម៉ូតូម៉ាកហុងដាឌ្រីម ពណ៌ក្រហម សេរីឆ្នាំ២០០៨ គ្មានផ្លាកលេខ បើកបរក្នុងទិសដៅពីកើតទៅលិចទៅកើត (រងរបួសធ្ងន់) និងអ្នករួមដំណើរ៣នាក់ទៀត ១-ឈ្មោះ ប៉ែន មនោរម្យ ភេទប្រុស អាយុ១២ឆ្នាំ រស់នៅភូមិថ្នល់ទទឹង ឃុំអន្លង់វែង ស្រុកអន្លង់វែង (រងរបួសធ្ងន់) ២-ឈ្មោះសារី សៅនី ភេទស្រី អាយុ១៤ឆ្នាំ រស់នៅភូមិថ្កូវ ឃុំផ្អាវ ស្រុកត្រពាំងប្រាសាទ (បាត់បង់ជីវិតពេលបញ្ជូនដល់មន្ទីរពេទ្យ) និង៣-ឈ្មោះ ឃន ចិត្រា ភេទស្រី អាយុ១៤ឆ្នាំ រស់នៅភូមិកោះថ្មី ឃុំអន្លង់វែង ស្រុកអន្លង់វែង (រងរបួសស្រាល) ។
ប៉ូលីសបានបញ្ជាក់ថា ក្រោយពេលកើតហេតុ សាកសពស្ត្រីវ័យក្មេងខាងលើនេះ ត្រូវបានសមត្ថកិច្ចជំនាញផ្នែកចរាចរណ៍ពិនិត្យ រួចប្រគល់ទៅឱ្យក្រុមគ្រួសា ដើម្បីយកទៅធ្វើបុណ្យទៅតាមប្រពៃណី ចំណែកម៉ូតូវិញត្រូវបានយកមករក្សាទុកនៅប៉ុស្តិ៍រដ្ឋបាលឃុំថ្លាត រង់ចាំធ្វើការដោះស្រាយតាមនីតិវិធីផ្លូវច្បាប់៕
ចែករំលែកព័តមាននេះ