ការផ្ទុះជំងឺកូវីដ១៩ បានបង្កជាបញ្ហាហិរញ្ញវត្ថុសម្រាប់មនុស្សរាប់លាននាក់ជុំវិញពិភពលោក។ មនុស្សដែលមានសំណាងក្នុងការរក្សាភាពនឹងនរហិរញ្ញវត្ថុអាចយកពេលនេះ ដើម្បីផ្តោតស្មារតីលើស្ថាបការហិរញ្ញវត្ថុរបស់អ្នក និងត្រៀមខ្លួនសម្រាប់ភាពមិនប្រាកដប្រជាក្នុងសេដ្ឋកិច្ច ខណៈដែលប្រទេសដែលមានសេដ្ឋកិច្ចធំៗកំពុងជួបនូវវិបត្តិ។
ខាងក្រោមនេះ គឺជាគន្លឹះមួយចំនួនដែលអាចជួយអ្នកក្នុងការសន្សំលុយ និងរៀបចំផែនការចំណាយឡើងវិញ ៖
១. ធ្វើឲ្យការចាយវាយក្លាយទៅជាការសន្សំ ៖
ប្រសិនបើអ្នកមានសំណាងក្នុងការធ្វើការនៅផ្ទះ នោះមានន័យថា អ្នកមិនចាំបាច់ត្រូវចំណាយលើការធ្វើដំណើរ លើថ្លៃកាហ្វេ ឬថ្លៃបាយថ្ងៃត្រង់ជាមួយមិត្តរួមការងារទៀតទេ។ ការចាយវាយទាំងនេះ អាចក្លាយជាការសន្សំរបស់អ្នកបាន ជាពិសេសគឺទុកពេលមានអាសន្ន។
អ្នកជំនាញផ្តលយោបល់ឲ្យមនុស្សម្នាក់ៗមានប្រាក់សន្សំយ៉ាងតិចស្មើការចាយវាយប្រចាំខែចំនួន ៣ ទៅ ៦ខែ ទុកពេលមានអាសន្ន។ ប្រសិនបើអ្នកមានប្រាក់សន្សំបម្រុងនេះហើយ អ្នកអាចទុកលុយដែលអ្នកធ្លាប់តែយកទៅបង់ថ្លៃសមាជិកកន្លែងហាត់ប្រាណ ឬសម្រាប់វិស្សមកាលទុកសម្រាប់ថ្ងៃអនាគតបានដែរ។
២. ចរចាប្រសិនបើអ្នកមានបញ្ហាហិរញ្ញវត្ថុ ៖
បើអ្នកមានបំណុលជាប់ខ្លួន ហើយអ្នកមានបញ្ហាហិរញ្ញវត្ថុ ឬចង់ទុកថវិកាបម្រុងសម្រាប់ថ្ងៃមុខសិន អ្នកអាចចរចាជាមួយម្ចាស់បំណុលរបស់អ្នកបាន។ បើអ្នកមានបញ្ហាបង់ថ្លៃជួលផ្ទះ ឬបង់រំលស់សម្រាប់សម្ភារៈផ្សេងៗនោះ អ្នកអាចព្យាយាមលើកឡើងពីបញ្ហាដែលអ្នកជួបប្រទះ និងសុំពន្យាពេលបង់ផងដែរ។
៣. ចូលរួមជួយដល់សហគមន៍ ៖
ចំណុចនេះ ប្រហែលជាមិនអាចជួយដល់ស្ថានការហិរញ្ញវត្ថុរបស់អ្នកប៉ុន្មានទេ តែវាជួយឲ្យអ្នកចូលរួមជួយដល់សហគមន៍របស់អ្នក។ ប្រសិនបើអ្នកនៅមានភាពនឹងនរផ្នែកហិរញ្ញវត្ថុនៅឡើយក្នុងកំឡុងពេលនេះ អ្នកគួរតែជួយដល់អាជីវកម្មតូចៗ ឬបរិច្ចាគជាថវិកា កម្លាំង ឬសម្ភារៈផ្សេងៗដល់អ្នកដទៃដែលកំពុងជួបនូវបញ្ហា។ ដកស្រង់ចេញពីវេបសាយ ៖ theladders
ចែករំលែកព័តមាននេះ