ខេត្តបាត់ដំបង ៖ សំណុំរឿងស្ទាក់ «ប្លន់» យកកាបូបលុយពីស្ត្រីម្នាក់ដែលបង្កដោយជនសង្ស័យចំនួន២នាក់ ប្រដាប់ដោយដាវសាំមូរ៉ៃកាលពីជិតមួយសប្ដាហ៍ហើយ នៅឃុំគោកឃ្មុំ ស្រុកថ្មគោល ត្រូវបានគេបិតស្ងាត់ឈឹង រហូតមកដល់ត្រឹមព្រឹកថ្ងៃទី៣០…
ខេត្តបាត់ដំបង ៖ សំណុំរឿងស្ទាក់ «ប្លន់» យកកាបូបលុយពីស្ត្រីម្នាក់ដែលបង្កដោយជនសង្ស័យចំនួន២នាក់ ប្រដាប់ដោយដាវសាំមូរ៉ៃកាលពីជិតមួយសប្ដាហ៍ហើយ នៅឃុំគោកឃ្មុំ ស្រុកថ្មគោល ត្រូវបានគេបិតស្ងាត់ឈឹង រហូតមកដល់ត្រឹមព្រឹកថ្ងៃទី៣០ ខែតុលា ឆ្នាំ២០២០នេះ ទើបបែកធ្លាយដំណឹង។ មិនតែប៉ុណ្ណោះ ថ្នាក់ដឹកនាំការិយាល័យជំនាញ លោកស្នងការរងទទួលផែនព្រហ្មទណ្ឌ សុទ្ធតែអះអាងថា «មិនបានដឹងរឿងប្លន់នេះថែមទៀតផង»។
បើតាមប្រជាពលរដ្ឋបានទម្លាយព័ត៌មាននេះ មកកាន់កោះសន្តិភាពនៅព្រឹកថ្ងៃទី៣០ ខែតុលានេះ ក្រោយពីចំណាត់ការរបស់សមត្ថកិច្ចហាក់ស្ងាត់ឈឹងមិនកម្រើក។ ប្រភពនេះបានប្រាប់ថា អំពើ «ប្លន់» នេះ បានកើតឡើង កាលពីម៉ោង៤និងនាទីទៀបភ្លឺ នាថ្ងៃទី២៦ តុលា នៅចំណុចផ្សារ «គោកឃ្មុំ» ស្ថិតនៅក្នុងឃុំគោកឃ្មុំ ស្រុកថ្មគោល ដែលជនរងគ្រោះមានឈ្មោះ សន ចាន់ណា ភេទស្រី អាយុ៣៨ឆ្នាំ មានមុខរបរលក់ដូរ រស់នៅភូមិកណ្ដាលត្បូង ឃុំគោកឃ្មុំ ស្រុកថ្មគោល។
បើតាមជនរងគ្រោះអ្នកស្រី សន ចាន់ណា បានរៀបរាប់ប្រាប់កោះសន្តិភាពតាមទូរស័ព្ទ នៅព្រឹកថ្ងៃទី៣០ ខែតុលានេះថា ចោរដែល «ប្លន់» អ្នកស្រី មានបក្សពួក២នាក់ប្រដាប់ដោយដាវសាំមូរ៉ៃ និងជិះម៉ូតូម៉ាក MSX តែគាត់មិនចាំស្លាកលេខទេ។ គាត់និយាយថា មុនពេលកើតហេតុ គាត់បានដឹកអីវ៉ាន់តាមម៉ូតូយកទៅដាក់លក់នៅផ្សារ «គោកឃ្មុំ» ដូចសព្វដង តែពេលជិះដល់ខាងមុខប៉ុស្ដិ៍នគរបាលគោកឃ្មុំ ស្រាប់តែប្រទះឃើញជនសង្ស័យ២នាក់ (ចោរ)។ លុះពេលគាត់ជិះដល់ផ្សារ ស្រាប់តែជន២នាក់នោះជិះទៅឈប់ពីក្រោយគាត់ដែរ។
អ្នកស្រី ចាន់ណា បាននិយាយថា ពេលឈប់ម៉ូតូភ្លាម ជនម្នាក់បានចុះដើរទៅក្បែរគាត់ រួចសួរនាំគាត់យ៉ាងដូច្នេះថា «មីងទិញក្រូចអត់?» ខ្ញុំថា «អត់ទិញទេ»។ ពេលនោះស្រាប់តែជននោះដកដាវចេញពីក្នុងអាវ រួចភ្ជង់គាត់គំរាមទារយកកាបូបពីខ្ញុំ»។
គាត់បានបញ្ជាក់ថា ពេលនោះគាត់រត់ឡើងឈរលើគ្រែឡើងញ័រខ្លួន រួចស្រែកឲ្យគេជួយ តែគ្មានមនុស្សនៅទីនោះទេ ខណៈពួកចោរលើកដាវគំរាមរកកាប់គាត់យ៉ាងរន្ធត់ទៀតផង។ ដោយសារភ័យស្លន់ស្លោរពេក ទើបគាត់បង្ខំចិត្តបោះកាបូបលុយនោះឲ្យទៅចោរតែម្ដង ព្រោះខ្លាចលោកចោរយកដាវសាំមូរ៉ៃកាប់។ អ្នកស្រីបានប្រាប់ថា នៅក្នុងកាបូបនោះ មានលុយចំនួន៤៦ម៉ឺនរៀល ទូរស័ព្ទម៉ាក VIVO មួយគ្រឿង និងសោរផ្ទះទៀតផង។
ពាក់ព័ន្ធនឹងសំណុំរឿងប្លន់នេះ បើតាមស្វាមីស្ត្រីរងគ្រោះ បានប្រាប់កោះសន្តិភាពដែរថា ក្រោយពេលត្រូវចោរប្លន់ ភ្លាមៗនោះប្រពន្ធរបស់គាត់បានជិះម៉ូតូចូលទៅដល់ប៉ុស្ដិ៍នគរបាល ដើម្បីប្ដឹងមន្ត្រីប៉ុស្ដិ៍ជួយអន្តរាគមន៍ តែមិនមានមន្ត្រីណាម្នាក់ភ្ញាក់ផ្អើលទេ បើទោះជាប្រពន្ធគាត់ស្រែកហៅយ៉ាងណាក្ដី ដោយឃើញតែម៉ូតូនៅខាងមុខប៉ុស្ដិ៍ តែមិនឃើញមន្ត្រី។
គាត់បានបញ្ជាក់ថា ពេលនោះគាត់បានឌុបប្រពន្ធទៅមើលអីវ៉ាន់នៅក្នុងផ្សារ ហើយបន្តិចក្រោយមកក៏ជិះត្រឡប់ទៅប្ដឹងមន្ត្រីប៉ុស្ដិ៍ម្ដងទៀត នៅតែមិនឃើញសមត្ថកិច្ចដដែល ហៅក៏មិនឆ្លើយទៀត។ លុះថ្ងៃរះច្បាស់ គាត់ក៏ឌុបប្រពន្ធទៅប្ដឹងជាលើកទី៣ ទើបជួបលោកមន្ត្រីប៉ុស្ដិ៍ រួចក៏ដាក់ពាក្យបណ្ដឹងបានសម្រេច ហើយមន្ត្រីប៉ុស្ដិ៍បានប្រាប់ថា «គាត់ដេកជ្រុល»។ ប៉ុន្តែរហូតមកដល់ព្រឹកថ្ងៃទី៣០ ខែតុលា ចំណាត់ការរបស់សមត្ថកិច្ចហាក់ដូចជាស្ងាត់ឈឹង គ្មានដំណឹងពីរឿងលោកចោរសោះឡើយ។
បើតាមប្រភពបានឲ្យដឹងថា ករណីខាងលើនេះមិនត្រូវបានគេរាយការណ៍ជាក់លាក់ទៅកាន់លោកស្នងការខេត្តថា ជាអំពើ «ប្លន់» នោះទេ តែមន្ត្រីថ្នាក់ក្រោមរាយការណ៍បំភ្លៃថា ជាករណីលួចកំប៉ិកកំប៉ុក ដែលបង្កឡើងដោយពួកក្មេងទំនើង។ កោះសន្តិភាព បានព្យាយាមសុំការបំភ្លឺពីលោក គឹម ពោ មេប៉ុស្ដិ៍រដ្ឋបាលគោកឃ្មុំ ស្ដីទី តែមិនអាចទំនាក់ទំនងបានឡើយ នៅព្រឹកថ្ងៃទី៣០ តុលានេះ ជុំវិញករណីក្រុមចោរសាមូរ៉ៃ ប្លន់អ្នកលក់ដូរខាងលើនេះ។
រីឯប្រធានការិយាល័យព្រហ្មទណ្ឌកំរិតធ្ងន់ លោក កោ ស៊ុនកាំង បានបញ្ជាក់ប្រាប់តាមទូរស័ព្ទថា លោកមិនបានដឹងរឿងនេះទេ ព្រោះមន្ត្រីប៉ុស្ដិ៍មិនរាយការណ៏។ ដោយឡែក លោក លឹម ពុទ្ធីឡា ស្នងការរងទទូលផែនព្រហ្មទណ្ឌ ក៏បានផ្ដល់ចម្លើយដូចលោកកោ ស៊ុនកាំង ដែរថា លោកក៏មិនបានដឹងរឿងនេះដែរ។
សូមបញ្ជាក់ថា អំពើចោរកម្មដូចជា «ចោរលួច ចោរឆក់ ចោរគាស់លំនៅឋាន ចោរកាប់សោរ.កលួចម៉ូតូ» ដែលបង្កឡើងដោយជនមិនស្គាល់មុខ ហាក់កំពុងបង្កើនសកម្មភាពយ៉ាងគគ្លើននាបច្ចុប្បន្ននេះ ខណៈសមត្ថកិច្ចបែរជាព្យាយាមបិទបាំងបទល្មើស ដែលកើតឡើងនៅក្នុងមូលដ្ឋានរបស់ខ្លួន។
លោកឧត្តមសេនីយ៍ត្រី សាត គឹមសាន ស្នងការខេត្ត បានដាក់ចេញនូវវិធានការជាបន្តបន្ទាប់ចាប់តាំងពីលោកទើបចូលកាន់តំណែងថ្មីនេះមកម្ល៉េះ ដល់មន្ត្រីក្រោមឱវ៉ាតក្នុងការទប់ស្កាត់ ឬ បង្ក្រាបបទល្មើស រួមទាំងវិធានការបើកចំហរជើងមេឃ ផ្ដល់លេខទូរស័ព្ទជាសាធារណៈ ដើម្បីងាយស្រួលសម្រាប់ពលរដ្ឋទំនាក់ទំនង ផ្ដល់ព័ត៌មាន ឬដាក់ពា្យបណ្ដឹងផង។ ប៉ុន្តែវិធានការនេះ ហាក់នៅមិនទាន់មានប្រសិទ្ធភាពនៅឡើយទេ ព្រោះពលរដ្ឋដែលរងគ្រោះនៅតែជួបការលំបាកដដែល ក្នុងការដាក់ពាក្យបណ្ដឹង ឬទំនាក់ទំនងសុំអន្តរាគមន៍ពីមនន្ត្រីមូលដ្ឋាន៕
ចែករំលែកព័តមាននេះ