រាជធានីភ្នំពេញ ៖ បុរសកម្លាំងយក្សម្នាក់ដែលត្រូវគេសង្ស័យថា បែកថ្នាំ បានវាយបំផ្លិចបំផ្លាញរបស់របរក្នុងផ្ទះសំណាក់ និងផ្ទះប្រជាពលរដ្ឋ ហើយក៏ត្រូវសមត្ថកិច្ចឃាត់ខ្លួនបានភ្លាមៗផងដែរ បង្កឱ្យមានការភ្ញាក់ផ្អើលកាលពីម៉ោង៣ទៀបភ្លឺ ថ្ងៃទី២៩ ខែតុលា ឆ្នាំ២០២០ នៅផ្ទះសំណាក់ «រាសី ស្រីរ័ត្ន» ស្ថិតនៅភូមិប៉ប្រកខាងជើង សង្កាត់កាកាបទី១ ខណ្ឌពោធិ៍សែនជ័យ ។
បុរសខាងលើមានឈ្មោះ ធី ឆែន អាយុ៣៨ឆ្នាំ ទើបប្រឡងជាប់សន្តិសុខ ស្នាក់នៅសង្កាត់កាកាបទី១ ខណ្ឌពោធិ៍សែនជ័យ។
តាមប្រភពពីអ៊ុំម្ចាស់ផ្ទះសំណាក់បានឱ្យដឹងថា នៅវេលាម៉ោង៩យប់ ថ្ងៃទី២៨ ខែតុលា គេឃើញបុរសខាងលើ ជិះម៉ូតូមកដេកផ្ទះសំណាក់មានគ្នា២នាក់ដែលជិះម៉ូតូ២គ្រឿង ដោយបុរសកម្លាំងយក្សរូបនេះជិះម៉ូតូម៉ាកអាយខន ពណ៌ផ្កាឈូក ពាក់ស្លាកលេខ កោះកុង 1A-9860 ចំណែកមិត្តភក្តិម្នាក់ទៀតដែលមកជាមួយជិះម៉ូតូធូដេ ពណ៌ក្រហម។
ប្រភពពីអ៊ុំម្ចាស់ផ្ទះសំណាក់បានបន្តទៀតថា ខណៈពេលចូលដេកផ្ទះសំណាក់របស់គាត់បានមួយសន្ទុះធំ បុរសខាងលើក៏អុកឡុកក្នុងផ្ទះសំណាក់ ដោយបោករបស់របរក្នុងផ្ទះសំណាក់ រួចដេញឲ្យបុរសដែលមកជាមួយគ្នានោះចេញ ហើយវាយទាំងអ្នកមកជាមួយទៀត ទើបទាក់ទងទៅសមត្ថកិច្ចឱ្យជួយអន្តរាគមន៍ភ្លាមៗផងដែរ។
ប្រភពដដែលបន្តថា បន្ទាប់ពីសមត្ថកិច្ចបានមកដល់ បុរសខាងលើបានឌឺដងដាក់សមត្ថកិច្ច ហើយដេញសមត្ថកិច្ចចេញពីផ្ទះសំណាក់ខាងលើផងដែរ ដោយនិយាយថា ជាផ្ទះរបស់គាត់ ហើយបានវាយផ្ទះប្រជាពលរដ្ឋជាច្រើនផ្ទះ បណ្តាលឲ្យផ្អើលប្រជាពលរដ្ឋភ័យញ័រពេញខ្លួន។ ភ្លាមៗនោះ សមត្ថកិច្ចនគរបាលប៉ុស្តិ៍បានសហការជាមួយកម្លាំងនគរបាលខណ្ឌពោធិ៍សែនជ័យ បានឃាត់ខ្លួនជនបង្កខាងលើ បានភ្លាមៗផងដែរ។
ក្រោយពេលកើតហេតុ ជនសង្ស័យដែលបង្កអុកឡុកបង្កជាហិង្សាខាងលើនេះ បានយកទៅសាកសួរនៅប៉ុស្តិ៍នគរបាលសង្កាត់កាកាបទី១ ដើម្បីចាត់ការតាមនីតិវិធីបន្ត ៕
ចែករំលែកព័តមាននេះ