រាជធានីភ្នំពេញ ៖ ជនសង្ស័យ2នាក់ជិះម៉ូតូចំនួន2គ្រឿងបានធ្វើសកម្មភាពឆក់ទូរស័ព្ទដៃពីជនជាតិចិនមិនបានសម្រេច ក៏ត្រូវអ្នកបើកម៉ូតូកង់បីកៀរ បណ្តាលឲ្យដួលកៀបជាប់គ្នាជាមួយនឹងកង់បីធ្វើឲ្យជនសង្ស័យភ័យស្លន់ស្លោក៏រត់ឡើងម៉ូតូបក្សពួកខ្លួនមួយគ្រឿងទៀត រត់គេចខ្លួនបាត់ស្រមោល ហើយបន្សល់ទុកតែម៉ូតូមួយគ្រឿងនៅកន្លែងកើតហេតុ បង្កឱ្យមានការភ្ញាក់ផ្អើលកាលពីម៉ោង2និង40នាទីរំលងអធ្រាត្រឈានចូលថ្ងៃទី29 ខែតុលា ឆ្នាំ2020 នៅចំណុចស្តុបផ្សារកាប់គោ ផ្លូវ294កែងនឹងមហាវិថីព្រះនរោត្តម ស្ថិតក្នុងសង្កាត់បឹងកេងកងទី1 ខណ្ឌបឹងកេងកង។
ម៉ូតូដែលជនសង្ស័យជិះធ្វើសកម្មភាពខាងលើនេះ ម៉ាកហុងឌ្រីម ពណ៌ខ្មៅ ស៊េរីឆ្នាំ2019 ពាក់ស្លាកភ្នំពេញ 1HN-3925 ជនសង្ស័យមិនត្រូវបានស្គាល់អត្តសញ្ញាណនោះទេ ព្រោះតែរត់គេចខ្លួនបាត់ស្រមោល។
យោងតាមប្រភពពីម្ចាស់ម៉ូតូកង់បីបានប្រាប់ឲ្យដឹងថា មុនកើតហេតុ គឺរូបគាត់បានដឹកភ្ញៀវជនជាតិចិនប្រុស2នាក់ ពីម្តុំស្តុបពេទ្យចិន ក្នុងគោលបំណងទៅណាហ្គាវើរ ដោយធ្វើតាមបណ្តោយផ្លូវលេខ294 លុះមកដល់កន្លែងកើតហេតុកែងនឹងផ្លូវព្រះនរោត្តម គាត់ក៏ឈប់ម៉ូតូកង់បីរង់ចាំភ្លើងស្តុបចរាចរណ៍ពណ៌ក្រហម ចំណែកភ្ញៀវជនជាតិចិនទាំងពីរនាក់អង្គុយលេងទូរស័ព្ទនៅក្នុងកង់បី ។ ភ្លាមៗនោះ ក៏មានជនសង្ស័យ2នាក់ជិះម៉ូតូ2គ្រឿង ដោយមួយគ្រឿងម៉ាកហុងដាឌ្រីម និងមួយគ្រឿងទៀតម៉ាកហុងដាស្កុបពី មកឈប់ពីក្រោយកង់បីគាត់ រួចក៏មើលកាយវិការគួរឲ្យសង្ស័យ គាត់ក៏បន្ថែមការប្រុងប្រយ័ត្ន។
ម្ចាស់ម៉ូតូកង់បីបន្តថា លុះនៅភ្លើងស្តុបចរាចរណ៍លោតទៅពណ៌ខៀវ គាត់ក៏បន្តដំណើរទៅមុខ ភ្លាមៗនោះជនសង្ស័យដែលជិះម៉ូតូម៉ាកហុងដាឌ្រីម បានជិះមកអែបកៀនខាងស្តាំ និងបានធ្វើសកម្មភាពឆក់ទូរស័ព្ទដៃមិនស្គាល់ម៉ាកពីជនជាតិចិនអង្គុយក្នុងកង់បីគាត់នោះ តែមិនបានសម្រេច ដោយឃើញដូច្នោះ គាត់ក៏ងាកចង្កូតកង់បីកៀរម៉ូតូជនសង្ស័យ បណ្តាលឲ្យដួលកៀបជាប់គ្នាជាមួយកង់បីគាត់ ទើបធ្វើឱ្យជនសង្ស័យភ័យស្លន់ស្លោ រួចក៏រត់ឡើងម៉ូតូបក្សពួកគេមួយគ្រឿងទៀត ជិះរត់គេចខ្លួនបាត់ស្រមោល ដោយបន្សល់ទុកតែម៉ូតូធ្វើសកម្មភាពនៅនឹងកន្លែងកើតហេតុ។
ក្រោយពេលកើតហេតុ ជនរងគ្រោះមិនបានទៅដាក់ពាក្យបណ្ដឹងឡើយ ចំណែកម៉ូតូជនសង្ស័យត្រូវបានសមត្ថកិច្ចប៉ុស្តិ៍នគរបាលបឹងកេងកង ដើម្បីយកទៅរក្សាទុកចាត់ការបន្តតាមនីតិវិធី ៕
ចែករំលែកព័តមាននេះ