រាជធានីភ្នំពេញ ៖ ក្រសួងសុខាភិបាលបានបញ្ជាក់ថា រកឃើញបុរសជនជាតិខ្មែរម្នាក់ឆ្លងជំងឺកូវីដ១៩ ក្នុងចំណោមអ្នកដំណើរ៨៧នាក់ (ក្នុងនោះស្រី២៥នាក់ កុមារ៤នាក់ ទារកម្នាក់ និងបុរស៥៧នាក់) ធ្វើដំណើរមកពីប្រទេសស៊ូដង់ខាងត្បូង រួចបន្តហោះហើរទៅប្រទេសកូរ៉េខាងត្បូង។
ក្រសួងសុខាភិបាលបានឲ្យដឹងនៅថ្ងៃទី៣០ ខែតុលា ឆ្នាំ២០២០ បានឲ្យដឹងថា រកឃើញបុរសជនជាតិខ្មែរម្នាក់ អាយុ៥១ឆ្នាំ មានអាសយដ្ឋានស្នាក់នៅខណ្ឌទួលគោក រាជធានី ភ្នំពេញ ដែលជាមន្ត្រីផ្នែកប្រតិបត្តិការរបស់អង្គការសហប្រជាជាតិប្រចាំបេសកកម្មនៅ South Sudan (UNMISS) ។
ក្រសួងបន្តថា បុរសខាងលើនេះ ធ្វើដំណើរមកពីប្រទេសស៊ូដង់ខាងត្បូង រួចបន្តហោះទៅប្រទេសគុយបា នឹងបន្តជើងហើរនៅប្រទេសអេត្បូងពី (Eihiopia) រួចក៏បន្តជើងហោះហើរទៅប្រទេសកូរ៉េខាងត្បូងទៀត លុះមកដល់កម្ពុជានៅថ្ងៃទី២៨ ខែតុលា នេះ ។ ជាលទ្ធផលនៃការធ្វើតេស្តលើបុរសរូបនេះ គឺរកឃើញថា វិជ្ជមានវីរុសកូវីដ១៩ ដែលផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ ហើយបច្ចុប្បន្នអ្នកជំងឺត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ក្រសួងបានគូសបញ្ជាក់ថា អ្នកដំណើរតាមយន្តហោះជាមួយអ្នកជំងឺខាងលើនេះ សរុបទាំងអស់មានចំនួន៨៧នាក់ (ក្នុងនោះស្រី២៥នាក់ កុមារ៤នាក់ ទារកម្នាក់ និងបុរស៥៧នាក់) ដែលក្នុងចំនួននេះមានអ្នកជំងឺខាងលើនេះផងដែរ ។ រីឯអ្នកចំនួន៨៦នាក់ផ្សេងទៀត ដែលមានលទ្ធផលធ្វើតេស្តអវិជ្ជមាននោះ ត្រូវបានដាក់ឱ្យធ្វើចត្តាឡីស័កចំនួន១៤ថ្ងៃ ដោយនៅវិទ្យាល័យពោធិ៍ចិនតុងចំនួន២៤នាក់ សណ្ឋាគារមួយក្នុងរាជធានីភ្នំពេញចំនួន១៤នាក់ សណ្ឋាគារមួយទៀតក្នុងរាជធានីភ្នំពេញចំនួន៣នាក់ សណ្ឋាគារមួយផ្សេងទៀតក្នុងរាជធានីភ្នំពេញចំនួន៤៣នាក់ និងសណ្ឋាគារមួយទៀតក្នុងរាជធានីភ្នំពេញចំនួន២នាក់។
សូមជម្រាបថា បច្ចុប្បន្នអ្នកជំងឺកូវីដ១៩ ចំនួន២៩១នាក់ ព្យាបាលជាសះស្បើយ២៨៣នាក់ កំពុងសម្រាកព្យាបាល៨នាក់ បុរសជនជាតិខ្មែរ៤នាក់ ស្ត្រីជនជាតិខ្មែរម្នាក់ បុរសជនជាតិប៉ូឡូញម្នាក់ បុរសជនជាតិបារាំងម្នាក់ និងស្ត្រីជនជាតិបារាំងម្នាក់៕
ចែករំលែកព័តមាននេះ