រាជធានីភ្នំពេញ ៖ បងប្អូនសាច់ថ្លៃពីរនាក់បានជិះម៉ូតូហុងដាប៊ីតមួយគ្រឿង ដឹកគ្នាចេញពីធ្វើការ រួចក៏ជិះម៉ូតូវ៉ារថយន្ត បណ្ដាលឲ្យទាក់ដៃចង្កូតនឹងរថយន្ត បណ្តាលឱ្យដួលបុរសជាបងថ្លៃ ហើយក៏ត្រូវរថយន្តកិនអូស៥០០ម៉ែត្របាត់បង់ជីវិតភ្លាមៗយ៉ាងអាណោចអាធ័មតែម្តង ចំណែកបុរសជាប្អូនថ្លៃរងរបួសស្រាល បង្កឱ្យមានការភ្ញាក់ផ្អើលកាលពីម៉ោង៨និង៣០នាទីយប់ ថ្ងៃទី២៨ ខែតុលា ឆ្នាំ២០២០ ត្រង់ចំណុចក្បែរវត្តគោកអំពិល តាមបណ្ដោយផ្លូវ៥០ម៉ែត្រកែងនឹងផ្លូវបេតុង ស្ថិតក្នុងសង្កាត់ព្រែកជ្រៃ ។
ជនរងគ្រោះជាបងថ្លៃដែលបាត់បង់ជីវិតមានឈ្មោះ វ៉ាន់ នីរិទ្ធបញ្ញាសិដ្ឋ ភេទប្រុស អាយុ៣២ឆ្នាំ មុខរបរកម្មកររោងចក្រ ។ ចំណែកឯប្អូនថ្លៃមានឈ្មោះ នីម ឃឿន ភេទប្រុស អាយុ២៨ឆ្នាំ មុខរបរកម្មកររោងចក្រ អ្នកទាំងពីរស្នាក់នៅភូមិដំណាក់សង្កែ សង្កាត់ព្រែកកំពឹស ។
តាមប្រភពពីកន្លែងកើតហេតុបានឲ្យដឹងថា នៅមុនកើតហេតុ គេឃើញបុរសម្នាក់បើកបររថយន្តសណ្តោងដឹកទំនិញមួយគ្រឿងទៀតម៉ាកហ៊ីណូ ពាក់ស្លាកលេខ ព្រះសីហនុ3A-0846 ធ្វើដំណើរតាមបណ្ដោយផ្លូវ៥០ម៉ែត្រ ពីលិចទៅកើត ក្នុងល្បឿនលឿន លុះមកដល់ចំណុចកើតហេតុ ក៏ស្រាប់តែមានម៉ូតូមួយគ្រឿងម៉ាកហុងដាប៊ីត ពណ៌ក្រហម ពាក់ស្លាកលេខ ភ្នំពេញ 1HI-4409 បើកបរដោយបុរសពីរនាក់ជាបងប្អូនថ្លៃនឹងគ្នាក្នុងទិសដៅស្របទិសគ្នា តាមពីក្រោយរថយន្ត ដែលទើបតែជិះចេញពីកន្លែងធ្វើការនៅម្តុំព្រែកជ្រៃ គោលបំណងឌុបគ្នាទៅផ្ទះនៅព្រែកកំពឹស។
ប្រភពដដែលបន្តថា លុះក្រោយមកបងប្អូនថ្លៃទាំង២នាក់បានជិះម៉ូតូព្យាយាមបើកវ៉ាជែងខាងឆ្វេងរថយន្តសណ្តោងដឹកទំនិញខាងលើ តែវ៉ាមិនផុតក៏ទាក់ដៃចង្កូតដួល រួចខ្ទាតបងថ្លៃដែលជាអ្នករួមដំណើរជាមួយចូលក្រោមរថយន្តកិនអូសទៅខាងមុខចម្ងាយប្រមាណ៥០០ម៉ែត្រពីកន្លែងកើតហេតុ ទើបឈប់រថយន្ត រួចចុះរត់គេចខ្លួនចេញពីកន្លែងកើតហេតុបាត់ស្រមោលតែម្តង បណ្តាលឲ្យបុរសរងគ្រោះបាត់បង់ជីវិតនៅនឹងកន្លែងកើតហេតុ ។
ប្រភពដដែលបន្តទៀតថា ចំណែកឯប្អូនថ្លៃដែលជាអ្នកបើកម៉ូតូវិញ បានរងរបួសស្រាល រីឯម៉ូតូរងការខូចខាតបន្តិចបន្តួច។ បន្ទាប់មកក៏មានសមត្ថកិច្ចមូលដ្ឋានបានចុះមកធ្វើការអន្តរាគមន៍ភ្លាមៗផងដែរ។
ក្រោយពេលកើតហេតុ ម៉ូតូ និងរថយន្តត្រូវបានសមត្ថកិច្ចជំនាញធ្វើការវាស់វែង រួចយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយទៅតាមផ្លូវច្បាប់ជាបន្តទៀត។ ដោយសពបុរសរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារ ដឹកយកទៅធ្វើបុណ្យទៅតាមប្រពៃណីនៅឯផ្ទះ៕
ចែករំលែកព័តមាននេះ