អ្នកប្រហែលជាធ្លាប់បានលឺដំបូន្មានពីមិត្តរួមការងារ អ្នកថ្នាក់លើ ឬអ្នកមានបទពិសោធន៍ដទៃហើយថា អ្នកមិនគួរសុំលាឈប់ពេលដែលមិនទាន់ធ្វើការបាន១ឆ្នាំជាមុនសិនទេព្រោះវាអាចបង្ហាញថាអ្នកជាមនុស្សដែលមិនមានការប្តេជ្ញាទៅនឹងការងារដែលអាចធ្វើឲ្យស្ថាប័នការងារដទៃមិនមានទំនុកចិត្តលើអ្នកជាដើម។
ប៉ុន្តែយោងទៅតាមការស្ទង់មតិមួយរបស់ TalentWorks បានឲ្យដឹងថា សូម្បីតែធ្វើការបាន១ឆ្នាំហើយគឺមិនទាន់គ្រប់គ្រាន់ផង។ ការស្ទង់មតិនេះបានសិក្សាពីពាក្យសុំការងាររបស់បេក្ខជនចំនួន ៦,៩៧៦នាក់នៅទីក្រុងចំនួន ៣៦៥ក្នុងសហរដ្ឋអាមេរិក ក្នុងវិស័យចំនួន ១០១ និងបានប្រទះឃើញថា អ្នកដែលត្រូវបានគេបណ្តេញ ឬសុំលាឈប់ក្នុងរយៈពេល ១៥ឆ្នាំដំបូងអាចប៉ះពាល់ដល់ឱកាសជោគជ័យក្នុងការរកការងារថ្មីប្រមាណ ៤៣%។
TalentWorks បានប្រាប់មកថា មូលហេតុគឺមកពីអ្នកជ្រើសរើសបុគ្គលិកអានប្រវត្តិរូបសង្ខេបត្រួសៗប៉ុណ្ណោះដូច្នេះពេលដែលពួកគេឃើញថាអ្នកមិនបានធ្វើការនៅកន្លែងចាស់បានយូរ វាប្រៀបដូចជាមុខសញ្ញាមិនល្អមួយប្រាប់ដល់ពួកគេផងដែរជាពិសេសប្រសិនបើអ្នកមានបទពិសោធន៍ច្រើនឆ្នាំ ព្រោះអ្នកជ្រើសរើសបុគ្គលិកមានស្តង់ដារខ្ពស់ជាងពេលដែលពួកគេវិភាគប្រវត្តិរូបរបស់អ្នកមានបទពិសោធន៍ការងារច្រើនឆ្នាំ។
ការសិក្សាខាងលើបានឲ្យដឹងទៀតថា មនុស្សគួរតែធ្វើការយ៉ាងតិចណាស់ឲ្យបាន ១៨ ខែជាមុនសិន មុនពេលសម្រេចចិត្តចាកចេញពីស្ថាប័នការងារមួយ ប៉ុន្តែរយៈពេល ២៤ខែ ឬពីរឆ្នាំជាកំឡុងពេលដែលល្អជាងគេ។ មានន័យថា ប្រសិនបើអ្នកមានគម្រោងការសុំឈប់មុនពេលនេះ អ្នកគួរតែអត់ធ្មត់និងទ្រាំនៅឲ្យបានគ្រប់ ១៨ ឬ ២៤ខែសិន។
ប្រសិនបើអ្នកត្រូវបានបញ្ឈប់ពីការងារនោះ អ្នកមិនមានជម្រើសច្រើនទេ ប៉ុន្តែអ្នកស្រីអាមេនដា អូហ្គូស្ទីន (Amanda Augustine) ដែលជាអ្នកជំនាញផ្នែកអាជីពបានប្រាប់ថា អ្នកត្រូវតែព្យាយាមរកការងារធ្វើក្នុងកំឡុងពេលដែលអ្នកមិនទាន់មានការងារពេញម៉ោង។ គ្រាន់តែការងារក្រៅម៉ោងក៏ល្អសម្រាប់អ្នកដែរ។
ជាក់ស្តែង ការសិក្សាខាងលើគឺយោងទៅតាមស្ថានការទីផ្សារការងារក្នុងសហរដ្ឋអាមេរិកដែលមានភាពប្រកួតប្រជែងជាងប្រទេសកម្ពុជា។ ទោះជាយើងមិនអាចយកវាមកប្រើក្នុងប្រទេសកម្ពុជាទាំងស្រុងពិតមែនក្តី ការសិក្សាខាងលើអាចផ្តល់ជាការឮំលឹកសំខាន់មួយសម្រាប់អ្នកដែលមានទម្លាប់ឧស្សាហ៍ប្តូរការងារក្នុងរយៈពេលខ្លី ៕
ចែករំលែកព័តមាននេះ