ខេត្តបាត់ដំបង ៖ ពួកចោរប្លន់ និងចោរលួចយ៉ាងតិចចំនួន០៣នាក់ ក្នុងចំណោមជាច្រើននាក់ ដែលប្រព្រឹត្តបទល្មើសលួច និងប្លន់ ដាច់ដោយឡែកៗពីគ្នា ត្រូវបានកម្លាំងការិយាល័យព្រហ្មទណ្ឌកំរិតស្រាល នៃស្នងការខេត្ត…
ខេត្តបាត់ដំបង ៖ ពួកចោរប្លន់ និងចោរលួចយ៉ាងតិចចំនួន០៣នាក់ ក្នុងចំណោមជាច្រើននាក់ ដែលប្រព្រឹត្តបទល្មើសលួច និងប្លន់ ដាច់ដោយឡែកៗពីគ្នា ត្រូវបានកម្លាំងការិយាល័យព្រហ្មទណ្ឌកំរិតស្រាល នៃស្នងការខេត្ត ធ្វើការស្រាវជ្រាវបង្ក្រាបបានជាបន្តបន្ទាប់តែក្នុងរយៈពេលមួយថ្ងៃ ។ នេះបើតាមលោក ឈឿង គឹមសុង ប្រធានការិយាល័យព្រហ្មទណ្ឌកំរិតស្រាល។
យោងតាមរបាយការណ៏ លោកឈឿង គឹមសុង ប្រធានការិយាល័យព្រហ្មទណ្ឌកំរិតស្រាល បានឲ្យដឹងថា ក្នុងចំណោមបទល្មើសចំនួន០៣ករណីដែលកម្លាំងរបស់លោកបង្ក្រាបបានខាងលើនេះ មានអំពើលួចចំនួន០២ករណី និង អំពើប្លន់០១ករណី និង បានឃាត់ខ្លួនជនដៃដល់បានចំនួន០៣នាក់ ជាបន្តបន្ទាប់ ថែមទាំងដកហូតបានវត្ថុតាង (ម៉ូតូ) ចំនួន០៣គ្រឿង ។ នៅក្នុងរបាយកាណ៏បានឲ្យដឹងថា កិច្ចប្រតិបត្តិការណ៏បង្ក្រាបអំពើចោរកម្មទាំង០៣លើកខាងលើនេះ គឺករណីទី១ កម្លាំងការិយាល័យជំនាញខាងលើ បានធ្វើការបង្ក្រាបអំពើ«ប្លន់» នៅវេលាម៉ោង១និង២៥នាទីរំលងអធ្រាត្រឈានចូលថ្ងៃទី២៨ តុលា នៅចំណុចខាងមុខផ្ទះសំណាក់ កែវ មុនី ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ឃាត់ខ្លួនជនសង្ស័យម្នាក់ ឈ្មោះ ខ្វឿង យ៉ាំងជុង អាយុ១៧ឆ្នាំ នៅភូមិព្រែកមហាទេព សង្កាត់ស្វាយប៉ោ និង ដកហូតម៉ូតូ១គ្រឿងម៉ាកZoomer Xពណ៏ខ្មៅ ស៊េរីឆ្នាំ២០១៨ ពាក់ស្លាកលេខ បាត់ដំបង 1AB.1591។
របាយការណ៏បានបញ្ជាក់ថា ជននេះរួមជាមួយបក្សពួកចំនួន០៣នាក់ទៀត បានធ្វើសកម្មភាពព្រូតគ្នាវាយទៅលើជនរងគ្រោះឈ្មោះ ស៊ សឺ ប្រុសអាយុ១៧ឆ្នាំ ពេលកំពុងច្រៀងក្នុងបន្ទប់ខារ៉ាអូខេយីហោ«ត្រចៀកកាំ» ជាមួយគ្នា កាលពីវេលាម៉ោង១០និង៣០នាទីយប់ថ្ងៃទី២៧ តុលា ស្ថិតនៅក្នុងភូមិរំចេក៣ សង្កាត់រតនៈ ក្រុងបាត់ដំបង ។ ក្រោយវាយជនរងគ្រោះ ក្រុមជនល្មើសទាំង០៤នាក់ បានប្លន់យកម៉ូតូជនរងគ្រោះជិះគេចខ្លួនបាត់។ ប៉ុន្តែក្រោយពីទទូលបានបណ្ដឹងជនរងគ្រោះបានមួយថ្ងៃ ទើបកម្លាំងជំនាញការិយាល័យព្រហ្មទណ្ឌកំរិតស្រាល តាមឃាត់ខ្លួនបានម្នាក់ រីឯ០៣នាក់ទៀតបានរត់គេចខ្លួន ។
ចំពោះករណីទី២ កម្លាំងការិយាល័យដដែល បានធ្វើការបង្ក្រាបអំពើលួចម៉ូតូ និងឃាត់ខ្លួនជនសង្ស័យម្នាក់ កាលពីវេលាម៉ោង១និង២៥នាទីរំលងអាធ្រាត្រឈានចូលថ្ងៃទី២៨ តុលា នៅក្នុងស្ថានីរថភ្លើង ស្ថិតក្នុងភូមិកម្មករ សង្កាត់ស្វាយប៉ោ។ ជនសង្ស័យឈ្មោះ ឡៃ ហាំម៉ាត់ អាយុ២០ឆ្នាំ នៅភូមិឡឥដ្ឋ សង្កាត់ព្រែកព្រះស្ដេច ។
បើតាមលោក ឈឿង គឹមសុង បានប្រាប់ថា ជននេះបានធ្វើសកម្មភាពលួចយកម៉ូតូជនរងគ្រោះឈ្មោះ ចន ចេក ហៅ ង៉ោល អាយុ១៨ឆ្នាំ នៅភូមិគោកដូង ឃុំពាមឯក ស្រុកឯកភ្នំ។ លុះជនដៃដល់ជិះចេញមកដល់ស្ថានីរថភ្លើង ទើបត្រូវកម្លាំងរបស់លោកឃាត់បានទាំងមនុស្សទាំងម៉ូតូម៉ាកហុងដាឌ្រីមសេ១២៥ ពណ៏ខ្មៅស៊េរី ឆ្នាំ២០០៥ ពាក់ស្លាកលេខ បាត់ដំបង 1L.4369 ។ លោកបានបញ្ជាក់ថា តាមពិតជនរងគ្រោះ និង ជនដៃដល់គឺជាមនុស្សស្គាល់គ្នាជិតដិត ថែមទាំងធ្លាប់ដើរលេងជាមួយគ្នាទៀតផង (ពាលស៊ីពាល)។
ដោយឡែកករណីទី៣ កម្លាំងរបស់លោក ឈឿង គឹមសុង បានធ្វើការបង្ក្រាបនិងឃាត់ខ្លួនជនសង្ស័យម្នាក់ឈ្មោះ វង្ស ផាន់រ៉ា ប្រុសអាយុ៣៤ឆ្នាំ គ្មានផ្ទះពិតប្រាកដទេ ។
នៅក្នុងរបាយការណ៏បានបញ្ជាក់ថា ជននេះ បានធ្វើសកម្មភាពលួចយកម៉ូតូមួយគ្រឿងម៉ាកហុងដាឌ្រីមស៊េរីឆ្នាំ២០១១ ពាក់ស្លាកលេខ បាត់ដំបង 1I.3335 របស់ជនរងគ្រោះឈ្មោះ វ៉ន វ៉ាន់ ប្រុស កាលពីយប់ថ្ងៃទី២២ តុលា នៅភូមិឡាក់ហុកពីរ ឃុំកំរៀង ស្រុកកំរៀង។
ប៉ុន្តែក្រោយពីលួចបានជននេះបានសម្ងំលាក់ទុកសិន លុះនៅរសៀលថ្ងៃទី២៨ តុលា ជនសង្ស័យបានជិះម៉ូតូនោះយកមកអំពាវនាវលក់នៅក្នុងស្ថានីរថភ្លើង ក្នុងក្រុងបាត់ដំបង ធ្វើឲ្យមានការសង្ស័យ ពលរដ្ឋក៏បានរាយការណ៏ប្រាប់សមត្ថកិច្ច ហើយកម្លាំងការិយាល័យជំនាញក៏ចុះនាំជនសង្ស័យ ទៅសួរនាំ ទើបបែកធ្លាយរឿងលួចម៉ូតូគេពីស្រុកកំរៀង ក៏ត្រូវមន្ត្រីការិយាល័យជំនាញ ធ្វើការឃាត់ខ្លួនជននេះតែម្ដង។
ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង បាននិយាយថា ជនសង្ស័យដែលលួចនិងប្លន់០២ករណីខាងលើ គឺជាបក្សពួកតែមួយ ដែលធ្លាប់ធ្វើសកម្មភាពបែប«ពាលស៊ីពាល»នេះជាញឹកញ៉ាប់កន្លងមក ។ រីឯបក្សពួកជននេះមួយចំនួនដែលកំពុងរត់គេចខ្លួន ក៏ធ្លាប់ជាប់គុកដោយសារប្រព្រឹត្តអំពើចោរកម្មផងដែរ។ ប៉ុន្តែយ៉ាងណា លោកឈឿង គឹមសុង បានបញ្ជាក់ថា ពេលនេះមន្ត្រីជំនាញរបស់លោក កំពុងសួរនាំជនសង្ស័យទាំង០៣នាក់នេះ ដើម្បីកសាងសំណុំរឿងបញ្ជូនទៅតុលាការហើយ រីឯម៉ូតូដែលដកហូតបានទាំង០៣គ្រឿង បើតាមគោលការណ៏ លោកស្នងការខេត្ត ប្រហែលប្រគល់ជួនជនរងគ្រោះវិញ៕
ចែករំលែកព័តមាននេះ