ខេត្តកំពង់ឆ្នាំង ៖ ប្រជាពលរដ្ឋរស់នៅឃុំឆ្នុកទ្រូ ស្រុកបរិបូរណ៌ ដែលធ្លាប់រស់នៅលើផ្ទះបណ្តែតទឹក ហើយត្រូវបានអាជ្ញាធរខេត្តរៀបចំឱ្យឡើងមករស់នៅលើគោក អស់រយៈប្រមាណ២ឆ្នាំកន្លងទៅនេះ ពួកគាត់បានសម្របខ្លួនរស់លើគោកបានហើយ ជាងនេះទៅទៀត ពួកគាត់មិនចង់ចុះទៅរស់នៅក្នុងទឹកដូចមុនទៀតឡើយ ព្រោះការរស់នៅលើគោកងាយស្រួលជាង ។ នេះជាការអះអាងរបស់អាជ្ញាធរឃុំឆ្នុកទ្រូ ។
យ៉ាងនេះក្តីក៏ពួកគាត់ចៀសមិនរួចពីរស់នៅក្នុងទឹកខ្លះដែរ ព្រោះទីតាំងដែលអាជ្ញាធររៀបចំឱ្យពួកគាត់រស់នៅជាដីលិចទឹក អាចនិយាយបានថា ពួកគាត់រស់នៅ៦ខែលើទឹក ៦ខែគោក ។
លោក សាំង គីមស៊ន មេឃុំឆ្នុកទ្រូ ស្រុកបរិបូរណ៌ បានប្រាប់ភ្នាក់ងារយើងនៅព្រឹកថ្ងៃទី២៩ ខែតុលានេះថា ៖ ប្រជាពលរដ្ឋ បានបន្លាស់ទីផ្ទះបណ្តែតទឹក មករស់នៅលើគោកចាប់ពី ថ្ងៃទី១ ខែតុលា ឆ្នាំ២០១៨ មកដល់ថ្ងៃនេះ ២៩ខែតុលា ឆ្នាំ២០២០ គឺបានរយៈពេល២ឆ្នាំហើយ ។ មកដល់ពេលនេះ បងប្អូនប្រជាពលរដ្ឋ បានទម្លាប់ខ្លួនរស់នៅលើគោកបានហើយ ។ ពួកគាត់ប្រាប់ថា៖ងាយស្រួលជាងរស់នៅក្នុងទឹក ព្រោះការរស់នៅក្នុងទឹក ពួកគាត់ត្រូវចំណាយ ប្រាក់យ៉ាងច្រើនសម្រាប់ទិញដើមឬស្សី , ទិញពាង, ឬទិញធុងជ័រ ក្នុង១ឆ្នាំម្តងដើម្បីយកមកទ្រផ្ទះ ឱ្យអណ្តែតលើទឹក ។
ម្យ៉ាងទៀតការរស់នៅលើទឹក ពិតជាជួបបញ្ហាហានិភ័យច្រើន ដូចជា ពេលភ្លៀងខ្យល់ម្តងៗ ត្រូវប្រុងប្រយ័ត្នដោយត្រូវចងខ្យែ ឱ្យបានរឹងមាំ បើមិនដូចឆ្នេះទេ ផ្ទះច្បាស់ជាអណ្តែតតាមខ្យល់ ឬ ត្រូវខ្យល់វៃដាច់ខ្យែបោកលិចជាពុំខាន ។ ពេលពួកគាត់មករស់នៅលើគោក គឺជើងសសរផ្ទះជាប់ដី មិនពិបាកដូចមុនទៀតឡើយ ។
យ៉ាងនេះក្តីលោក មេឃុំឆ្នុកទ្រូ បានបញ្ជាក់ថា ៖ ថ្វីបើពួកគាត់រស់នៅលើគោកពិតមែន តែដីដែលពួកគាត់រស់នៅ គឺជាដីលិចទឹក ដូចឆ្នាំពេលរដូវទឹកឡើង ពួកគាត់ត្រូវនៅលើទឹក គ្រាន់តែផ្ទះគាត់សសរជាប់ដី និយាយជារួម ពួកគាត់រស់នៅ៦ខែទឹក ៦ខែគោក ។ លោកបានបញ្ជាក់ថា កន្លងទៅនេះអាជ្ញាធរឃុំបានខិតខំអភិវឌ្ឍន៍ ដោយជីកប្រឡាយធ្វើផ្លូវទឹក លើកផ្លូវគោកសម្រាប់បង្កលក្ខណៈឱ្យប្រជាពលរដ្ឋ ដែលបានបន្លាស់ទីងាយស្រួលក្នុងការរស់នៅ ។
សូមបញ្ជាក់ថា៖ ឃុំឆ្នុកកទ្រូមាន ៣ភូមិ គឺភូមិឆ្នុកទ្រូ ភូមិសេះស្លាប់ និងភូមិយុគន្ឋ មានប្រជាពលរដ្ឋសរុប ២១៦៩គ្រួសារ ស្មើនិងជិត១ម៉ឺននាក់ ។ ប្រជាពលរដ្ឋមានមុខរបរ ធ្វើស្រែចំការ និងនេសាទ ។ពួកគាត់ត្រូវបានបន្លាស់ទីមករស់នៅលើគោក ១០០% ហើយនៅសល់តែបែត្រីខ្លះតែប៉ុណ្ណោះ ។ ចំណែក ស្ថានីយប្រេង និងរោងសិប្បកម្មខ្លះនៅសល់ ព្រោះចាំទឹកឡើងបន្តិចទៀត នឹងអូសទៅដាក់គោលដៅដែលបានកំណត់ ដោយអាជ្ញាធរមូលដ្ឋានហើយ ៕
ចែករំលែកព័តមាននេះ