ខេត្តកំពង់ឆ្នាំង ៖ ដំណាំម្រះ ថ្វីបើមិនសូវមានគេយកចិត្តទុកដាក់ដាំដុះបានច្រើនរាប់សិបហិកតាដូចដំណាំផ្សេង តែសម្រាប់កសិករនៅខេត្តកំពង់ឆ្នាំងដែលមានដីចម្ការតាមដងទន្លេ បានឆ្លៀតទុកដីមួយផ្នែកសម្រាប់ដាំដំណាំនេះព្រោះតែការប្រមូលផលរបស់វាមានរយៈពេលវែងមធ្យម និងអាចរកចំណូលបន្ថែមពីដំណាំផ្សេៗទៀត ធ្វើឲ្យជីវភាពរបស់ពួកគាត់ធូរធារមួយកម្រិត ។
លោក សោម ស៊ីថា អាយុ៥២ឆ្នាំ មានទីលំនៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ដែលធ្លាប់តែដៃកាន់អាវុធប្រយុទ្ធក្នុងសមរភូមិតតាំងជាមួយទាហានខ្មែរក្រហម គ្រាដែលគាត់នៅជាអតីតយោធា កងយោធពលខេមរភូមិន្ទ បានរៀបរាប់ថា លោកបានបោះបង់ចោលអង្គភាពជាទាហានជាង២២ឆ្នាំហើយ គឺតាំងពីឆ្នាំ១៩៩៣មកម្ល៉េះ តែពេលនេះ លោកឈប់កាន់កាំភ្លើងមកកាន់ចប កាំបិតធ្វើស្រែចម្ការជាមួយប្រពន្ធកូនវិញ ។ លោកបន្តថា សព្វថ្ងៃលោកមានដីធ្វើស្រែប្រាំង និងដីចម្ការសមល្មមនឹងអាចជួយដោះស្រាយជីវភាពចិញ្ចឹមកូន៥នាក់ រស់ក្នុងកម្រិតមធ្យម គ្រាន់តែហត់នឿយបន្តិច។ ជារៀងរាល់ឆ្នាំ លោកដាំល្ង សណ្តែកបាយ ម្ទេស តែមិនភ្លេចដាំម្រះឡើយ។ គិតមកដល់ខែឧសភានេះ ដំណាំម្រះរបស់លោកដល់ចុងរដូវហើយ គឺបេះបានតែ២០ទៅ៣០គីឡូក្រាមប៉ុណ្ណោះ ព្រោះបានប្រមូលផលតាំងពីខែកុម្ភៈ មកម្ល៉េះ។ ការកាត់ផ្លែលក់លើកដំបូង បានពី៤០ទៅ៥០គីឡូក្រាម និងកាត់លើកទី២ ទី៣ បានកើនឡើងដល់ជិត២០០គីឡូក្រាម ដោយ២ទៅ៣ថ្ងៃ យើងធ្វើការប្រមូលផលម្តង ។
ស្ត្រីម្នាក់កំពុងយកក្រដាស់កាសែតចងក្តោបក្តឹបម្រះកុំឲ្យសត្វទិច ឈ្មោះ ញឹម សុផល ជាភរិយារបស់អតីតទាហានរូបនេះបានរៀបរាប់ដែរថា ឆ្នាំនេះម្រះបានថ្លៃបន្តិច គឺពី២.០០០ទៅ២.៥០០រៀលក្នុង១គីឡូក្រាម ដែលខុសពីឆ្នាំមុនថ្លៃខ្ពស់អស់ត្រឹមតែ១.៨០០រៀលតែប៉ុណ្ណោះ។ ដីចម្ការគាត់តាមមាត់ទន្លេនៅចុងភូមិចង្កែងជ្រុំនេះមានទំហំធំដែរ តែគាត់ឆ្លៀតទុកទំហំតែ២៥អា សម្រាប់ដាំដំណាំម្រះ ព្រោះវាអាចបេះផ្លែពី២ទៅ៣ថ្ងៃម្តងក្នុងរយៈពេលជាង៣ខែ គឺពីខែកុម្ភៈដល់ចុងឬដើមខែមិថុនា ដែលអាចរកចំណូលសម្រាប់ជីវភាពប្រចាំថ្ងៃបានយ៉ាងសមរម្យ ។ គាត់ប្រាប់ថា ស្តាយណាស់ដែលទីផ្សារម្រះ មិនធំទូលាយដូចជាល្ង សណ្តែក ឬម្ទេស និងដំណាំផ្សេងទៀត បើសិនជាមានទីផ្សារនាំចេញវិញ គាត់នឹងពង្រីកដីដាំម្រះឲ្យធំជាងនេះបន្ដិច ។ នៅក្នុងចម្ការរបស់គាត់មានដំណាំល្ង និងសណ្តែក ដែលបានប្រមូលផលរួចរាល់ហើយ ។
លោក ងិន ហ៊ុន ប្រធានមន្ទីរកសិកម្មខេត្ត បានឲ្យថា ដំណាំម្រះជាប្រភេទបន្លែគ្មានទីផ្សារនាំចេញ ដូចជាល្ង ពោត ឬដំឡូងទេ គឺមានតែទីផ្សារក្នុងស្រុក ម្ល៉ោះហើយកសិករយើងដាំជាលក្ខណៈគ្រួសារតែប៉ុណ្ណោះ ដែលអ្នកដាំច្រើនបំផុតមានត្រឹមតែដី២៥អាប៉ុណ្ណោះ ។ ដំណាំនេះពេលប្រមូលផលមួយរដូវ ពេលខ្លះអាចឡើងថ្លៃដល់៥.០០០រៀលក្នុង១គីឡូក្រាមក៏មានដែរ ៕
ចែករំលែកព័តមាននេះ