ខេត្តកំពង់ឆ្នាំង ៖ នារីម្នាក មានអាយុ២០ឆ្នាំម្នាក់បានបាត់បង់ជីវិតនៅនឹងកន្លែង ក្នុងហេតុការណ៍គ្រោះថ្នាក់ចរាចរណ៍មួយបានកើតឡើងនៅវេលាម៉ោង11 និង 15 នាទីយប់ ថ្ងៃទី28 ខែតុលា ឆ្នាំ 2020 នៅតាមបណ្ដោយផ្លូវជាតិលេខ 5 ត្រង់ចំណុចមុខវិទ្យាល័យព្រះបាទសុរាម្រឹត ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ខណៈដែលនារីរងគ្រោះជិះម៉ូតូបុកជាមួយនឹងរថយន្តធុនធំមួយគ្រឿង ក្នុងដំណើរច្រាស់ទិសគ្នា ។
លោក មុយ អ៊ីម នាយផ្នែកនគរបាលចរាចរណ៍ក្រុងកំពង់ឆ្នាំង បានបញ្ជាក់ឲ្យដឹងថា ៖ នារីរងគ្រោះមានឈ្មោះ នួន ស្រីហៀង អាយុ20 ឆ្នាំ មានទីលំនៅភូមិកោះត្រឡាច សង្កាត់ផ្សារឆ្នាំង ក្រុងកំពង់ឆ្នាំង ជិះម៉ូតូម៉ាកស្យូម៉ឺអ៊ិច ពាក់ស្លាកលេខកំពង់ឆ្នាំង.1G.7851 ។ ចំណែករថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3E. 7181 ។
ក្នុងករណីគ្រោះថ្នាក់ដែលបានបណ្តាលឱ្យនារីម្នាក់បានបាត់បង់ជីវិតនេះត្រូវបាននាយផ្នែកចរាចរណ៍ ក្រុងកំពង់ឆ្នាំងបញ្ជាក់ថា ៖ មុនពេលកើតហេតុនារីរងគ្រោះបានជិះម៉ូតូមួយគ្រឿងតែម្នាក់ឯង ក្នុងដំណើរពីកើតមកលិចលុះមកដល់ចំណុចកើតហេតុ ស្រាប់តែបុកជាមួយនឹងរថយន្តមួយគ្រឿងក្នុងដំណើរច្រាស់ទិសគ្នា បណ្ដាលឲ្យរថយន្តរុញម៉ូតូ និងនារីរងគ្រោះអូសជាង 100 ម៉ែត្រទើបអស់ល្បឿនឈប់នៅនឹងកន្លែង ។ ចំណែកអ្នកបើកបររថយន្ត ឃើញស្ថានភាពបែបនេះបានចុះគេចខ្លួនបាត់ ។
ក្រោយពេលកើតហេតុ សពនារីរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី ចំណែករថយន្តបង្ក រួមទាំងម៉ូតូត្រូវបានយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្ត ដើម្បីរង់ចាំការដោះស្រាយតាមនីតិវិធី ៕
ចែករំលែកព័តមាននេះ