ខេត្តកែប ៖ ទោះជាមានការធ្វើតូបបិទផ្លូវសសៀរក្បែរមាត់សមុទ្រយ៉ាងនេះក្ដី អាជ្ញាធរខេត្តកែបកាលពីរសៀលថ្ងៃទី២៧ ខែតុលា ឆ្នាំ២០២០ បានប្រជុំបង្កើតគណៈកម្មាការរៀបចំសណ្ដាប់ធ្នាប់សាធារណៈដែលមានឯកឧត្តម សោមពិសិដ្ឋ អភិបាលនៃគណៈអភិបាលខេត្តកែប និងជាប្រធានគណៈកម្មាការផងក្នុងនោះមានលោក អ៊ុកថា អភិបាលរងខេត្ត មានលោកស្រី ទិត្យ សុខា អភិបាលក្រុងកែប អនុប្រធាន និងមន្ត្រីមកពីមន្ទីរផ្សេងៗនៅជុំវិញខេត្តជាសមាជិក និងអាជីវកលក់នៅឆ្នេរកែបជាច្រើននាក់ទៀត។
ឯកឧត្តម សោម ពិសិដ្ឋមានប្រសាសន៍ដោយត្រង់ៗថា ការសាងសង់តូប ឬធ្វើខ្យុះសសៀរនៅតាមបណ្ដោយឆ្នេរសមុទ្រនៅចំណុចជ្រោយដូងនេះត្រូវតែអាជីវករុះរើដោយខ្លួនឯង។ ឯកឧត្តម សោម ពិសិដ្ឋ បញ្ជាក់ប្រាប់អាជីវករថា ការធ្វើតូបនៅលើខឿនតាមបណ្ដោយឆ្នេរសមុទ្រនេះធ្វើឲ្យប៉ះពាល់ដល់ភ្ញៀវទេសចរណ៍ព្រោះអត់មានផ្លូវដើរសសៀរមាត់ទឹក។ ឯកឧត្តមបញ្ចាក់ថា ខឿនចំនួន៤ម៉ែត្រសុំអាជីវករកុំយកអី្វទៅដាក់ឲ្យសោះ។ ឯកឧត្តម សោម ពិសិដ្ឋ មានប្រសាសន៍ថា អ្នកធ្វើតូបលើផ្លូវសាធារណក៏ត្រូវរុះរើដោយខ្លួនឯងដែរ។ ឯកឧត្ដមបានលើកឡើងថា សូម្បីតែចតរថយន្តនៅមុខតូប ឬផ្លូវសាធារណៈ ហើយភ្ញៀវមិនបានហូបបាយនៅតូបខ្លួនក៏ពួកគាត់បានដេញភ្ញៀវដែរ។
ឯកឧត្តម សោម ពិសិដ្ឋ មានប្រសាសន៍ទៅកាន់អាជីវកថា ដីសង់តូបនៅតាមបណ្ដោយឆ្នេររាប់ទាំងកន្លែងលេងទឹក និងចំណុចជ្រោយដូងនេះកុំច្រឡំថា ដីកម្មសិទ្ធរបស់ខ្លួនឲ្យសោះគឺជាដីសាធារណៈ។ តែរឿងនៅតូបលក់ដូរត្រូវអ្នកលក់ និងអ្នកទិញឬអ្នកអង្គុយលេងលើខ្យុះត្រូវមានការចរចាគ្នាឲ្យហើយចៀសវាងមានជជែកគ្នា។ អាជីវកម្នាក់ឈ្មោះ ជួបចាន់ណា ភេទស្រី អាយុ៥៨ឆ្នាំ បាននិយាយកាលពីព្រឹកថ្ងៃទី២៨ ខែតុលានេះថា គាត់បានមកលក់ដូរនៅជ្រោយដូងនេះជាង៣០ឆ្នាំ ហើយអាជីវកររូបនោះនិយាយប្រាប់បន្តថា រូបគាត់មិនជំទាស់ និងអាជ្ញាធរទេព្រោះគាត់ទទួលស្គាល់ថា អ្នកធ្វើតូបពិតជាធ្វើលើផ្លូវ និងបិទផ្លូវសសៀរមាត់សមុទ្រនោះមែន។
ឯកឧត្តម សោម ពិសិដ្ឋ មានប្រសាសន៍ថា ឈប់ឲ្យអាជីវកចេញមកបក់ដៃហៅភ្ញៀវឲ្យចូលតូបរបស់ខ្លួនទៀតទៅនឹងមួយទៀតមិនឲ្យមានការក្រាលកន្តេលនៅលើខឿនទៀតទេ បើមានក្រុមការងារ និងដកហូតកន្តេលឡើងហើយ។ លោកស្រី ទិត្យ សុខា អភិបាលក្រុងកែបក៏បានមានប្រសាសន៍ថា ខាងក្រុងបានធ្វើកិច្ចសន្យាជាមួយក្រុមអាជីវកនោះដែរថាមិនឲ្យជិះម៉ូតូដេញហៅភ្ញៀវ ឬបោយដៃហៅភ្ញៀវទេរហូតដល់ដាក់ពិន័យទៀតផងក៏នៅតែពួកគាត់មិនរាងចាល៕ ដោយ ៖ កែវ ឆាត
ចែករំលែកព័តមាននេះ