រាជធានីភ្នំពេញ ៖ តាមប្រភពព័ត៌មានច្បាស់ការណ៍ពីមន្ត្រីពន្ធនាគាររាជធានីភ្នំពេញ ឬហៅថា(ប៉េហ្ស៊ី)បានបង្ហើបប្រាប់មុននេះបន្តិចថា អតីតឧកញ៉ា ហូ ចំរើន ដែលមានរឿងអាស្រូវ និងបណ្តឹងជាច្រើនករណីពាក់ព័ន្ធបទល្មើសឆបោកប្រាក់ក្រុមហ៊ុនចិនរាប់លានដុល្លារអាមេរិក ត្រូវបានដោះលែងឲ្យមានសេរីភាពឡើងវិញហើយ នាព្រលប់ថ្ងៃទី២៨ ខែតុលា ឆ្នាំ២០២០ នេះ។ កន្លងមកអតីតឧកញ៉ា ហូ ចំរើន ធ្លាប់ត្រូវបានតុលាការផ្តន្ទាទោសដាក់ពន្ធនាគាររយៈពេល១៨ខែ ក្នុងសំណុំរឿងគំរាមបាញ់សម្លាប់ប្រពន្ធ នៅក្នុងភូមិគ្រឹះរបស់ខ្លួន ស្ថិតក្នុងខណ្ឌដង្កោ កាលពីខែមេសា ឆ្នាំ២០១៨។
គួរំលឹកថា អ្នកវិនិយោគជនជាតិចិនចំនួន២នាក់ និងជនជាតិកូរ៉េម្នាក់ បានដាក់ពាក្យបណ្តឹងដាច់ដោយឡែកៗពីគ្នា ទៅតុលាការ ដែលមានកម្មវត្ថុប្តឹងអតីតឧកញ៉ា ហូ ចំរើន ពីបទស៊ីដាច់លុយជាង២០០លានដុល្លារអាមេរិក តាមរូបភាពអភិវឌ្ឍន៍មន្ទីរពេទ្យទំនើបនៅទីក្រុងតាខ្មៅ និងគម្រោងអភិវឌ្ឍន៍មួយចំនួនទៀត។ លោក ហូ ចំរើន អាយុ៣៨ឆ្នាំ ជាមន្ត្រីយោធាក្រសួងការពារជាតិថ្នាក់ឧត្តមសេនីយ៍ឯក ត្រូវបានព្រះមហាក្សត្រតែងតាំង ជាឧកញ៉ា នៅថ្ងៃទី១២ ខែមេសា ឆ្នាំ២០១៨ និងមានមុខងារជាទីប្រឹក្សាថ្នាក់ដឹកនាំកំពូល។
ប៉ុន្តែក្រោយពេល ជាប់ឃុំនៅពន្ធនាគារព្រះមហាក្សត្របានចេញព្រះរាជក្រឹត្យ បញ្ចប់មុខតំណែងទាំងអស់រាប់ទាំងមុខងារជាឧកញ៉ា ផងដែរ។ បន្ទាប់ពីសាលក្រមសាលាដំបូងរាជធានីភ្នំពេញ បានប្រកាសផ្តន្ទាទោសអតីតឧកញ៉ា ហូ ចំរើន ដាក់ពន្ធនាគារកំណត់១៨ខែ លោក ហូ ចំរើន កើតទុកមិនសុខប្តឹងឧទ្ធរណ៍ជំទាស់នឹងសាលក្រមនោះ និងប្តឹងរហូតដល់តុលាការកំពូលទៀតផង។ ដូច្នេះព័ត៌មានទាក់ទិននឹងការដោះលែងលោក ហូ ចំរើន ឲ្យនៅក្រៅឃុំនេះ ក៏អាចមានការសម្រេចពីថ្នាក់កំពូលមកវិញដែរ៕ ដោយ ៖ ឃឹម ប៊ុនណាក់
ចែករំលែកព័តមាននេះ