ខេត្តកណ្ដាល ៖ បុរស២នាក់ដែលជាអ្នករស់នៅក្នុងភូមិជាមួយគ្នា ប៉ុន្តែមិនដែលស៊ីសង្វាក់គ្នាសោះ ពួកគាត់តែងតែបានឈ្លោះប្រកែកវាយតប់គ្នាជាញឹកញាប់ និងច្រើនលើកច្រើនដងរួចមកហើយ តែកន្លងមកពុំដែលមានភាគីណាមួយប្ដឹងសមត្ថកិច្ចម្ដងណាឡើយ។ លុះដល់ពេលចុងក្រោយនេះពួកគាត់បានផឹកស៊ីស្រវឹងរៀងខ្លួនហើយបានមានទំនាស់ពាក្យសម្ដីគ្នាម្ដងទៀត ហើយខណៈដែលភាគីម្ខាងកំពុងដេកលើអង្រឹងស្រាប់តែភាគីម្ខាងទៀតយកកាំបិតចុងស្រួចចាក់បណ្ដាលឲ្យរងរបួស បន្ទាប់មកជនដៃដល់ត្រូវនគរបាលចាប់ខ្លួន។
ហេតុការណ៍នេះបានកើតឡើងវេលាម៉ោង១០ និង៣០នាទីព្រឹកថ្ងៃទី២៧ ខែតុលា ឆ្នាំ២០២០ នៅក្នុងភូមិប្រសិទ្ធិ ឃុំម្កាក់ ស្រុកអង្គស្នួល ខេត្តកណ្តាល។ បុរសដែលត្រូវនគរបាលឃាត់ខ្លួនក្រោយចាក់គូទំនាស់បណ្ដាលឲ្យរងរបួសនោះឈ្មោះ ហ៊ល ណាប់ អាយុ៤១ឆ្នាំ ជនជាតិខ្មែរ មុខរបរកសិករ មានទីលំនៅក្នុងភូមិកើតហេតុខាងលើ ហើយបុរសនេះក៏របួសភ្នែកខាងស្ដាំ និងរលាត់ស្បែកក្បាលជង្គង់ខាងស្ដាំផងដែរ។
ដោយឡែកបុរសដែលរងរបួសដោយសារតែបុរសខាងលើចាក់នោះឈ្មោះ ហ៊ន នឿន អាយុ៤០ឆ្នាំ ជនជាតិខ្មែរ មុខរបរកសិករ មានទីលំនៅក្នុងភូមិជាមួយគ្នានោះដែររងរបួសត្រង់ពោះ។ នគរបាលបានឲ្យដឹងថា កន្លងមករវាងជនសង្ស័យ និងជនរងគ្រោះតែងតែមានទំនាស់វាយតប់គ្នាជាច្រើនលើកច្រើនសារមកហើយ ប៉ុន្តែអ្នកទាំង២មិនដែលធ្វើការប្ដឹងផ្ដល់គ្នានោះឡើយ។ លុះមកដល់ថ្ងៃកើតហេតុអ្នកទាំង២បានផឹកស្រាស្រវឹងដូចគ្នា ហើយបានឈ្លោះទាស់គ្នាដោយពាក្យសម្ដីគ្នាទៅវិញទៅមកជាថ្មីម្ដងទៀត។
បន្ទាប់មកជនរងគ្រោះបានដេកលើអង្រឹងក្នុងតូបលក់ផ្លែឈើខាងមុខផ្ទះ ស្រាប់តែជនសង្ស័យបានយកកាំបិតចុងស្រួចទៅចាក់ពោះមួយកាំបិតបណ្ដាលឲ្យរងរបួស ហើយបុរសរងគ្រោះ ឈ្មោះ ហ៊ន នឿន ក៏បានក្រោកឡើងធ្វើការប្រវាយប្រតប់តបតវិញបណ្ដាលឲ្យបុរសឈ្មោះ ហ៊ល ណាប់ រងរបួសដែរ ខណៈនោះបង្កឲ្យមានការភ្ញាក់ផ្អើលយ៉ាងខ្លាំង ហើយអ្នកជិតខាងជួយឃាត់បំបែក។ ប្រភពដដែលបានបន្តថា បន្ទាប់មកបុរសរងគ្រោះក៏បានចាកចេញទៅកាន់មណ្ឌលសុខភាពឃុំម្កាក់ដើម្បីព្យាបាលរបួសរបស់ខ្លួន ហើយក្រោយពេលកើតហេតុកម្លាំងនគរបាលប៉ុស្តិ៍ម្កាក់បានចុះទៅអន្តរាគមន៍ និងធ្វើការឃាត់ខ្លួនបុរសដែលជាខ្មាន់កាំបិតនាំទៅសាកសួរ និងកសាងសំណុំរឿងបញ្ជូនទៅសាលាដំបូងខេត្តកណ្ដាលចាត់ការតាមច្បាប់៕ ដោយ ៖ យន់ ស៊ីថា
ចែករំលែកព័តមាននេះ